Gumonesa Gudi Yone 14:1-20
14 Gungima ngatalele, ngamonele Mun’a Gimeme wa gumagana holu dia Mulundu wa Siona, wakhalele nu athu 144 000 agusonega jina dienji nu jina dia Sh’enji ha mbombo jiawo.
2 Ngavile matululu mukatuga mu dilu gifua matululu a meya avula. Akhalele nji gifua matululu a muandu wakola. Matululu ngavile akhalele gifua a athu adi muyimba hamoshi nu itare.*
3 Akhalele muyimba lungimbo lunu luakhalele mumonega gifua lungimbo luhe-luhe gutuama dia nguasa ya ufumu nu gutuama dia ba sheribe muwana nu akulu. Gushigo nga muthu mumoshi wakhalele nu luholo lua gujiya lungimbo luene, phamba athu 144 000 anyi asumbiwe ha mavu.
4 Ene adibuishilego usala nu akhetu, abungishilego muila nga nu muthu mumoshi.* Ene adi athu anyi adi mulandula guhata Mun’a Gimeme guagasue gumuya muene. Asumbiwe mukatshi dia athu gifua mbuto jia thomo mukunda nu Nzambi nu mukunda nu Mun’a Gimeme.
5 Ene akhalelego mumba mambo, ashigo nga nu ditona dimoshi.
6 Ngamonele muanjelo muko muzuga ha katshi na katshi dia dilu,* wakhalele nu lukuma luabonga lua ivo nu ivo ha gulongesa athu a ha mavu, a ifutshi yagasue, a iphuta yagasue, a mazuelelo agasue nu a ilema yagasue.
7 Wazuelele mu dijui diakola egi: “Vilenu Nzambi woma nu mutumbuisenu, handaga tangua dienji dia gusophesa diatagana. Kombelelenu Muthu wafugile dilu nu mavu nu kianga nu ito* ya mita.”
8 Muanjelo muko wa mbadi walanduile, wazuelele egi: “Muene wabua! Babilona Yakoma wabua, muene wanuishile ifutshi yagasue vinyo ya nzala yakola ya uthambi* wenji!”
9 Muanjelo muko wa thathu waalanduile, wazuelele mu dijui diakola egi: “Gula muthu wakombelela shitu ya mu foto nu gifuanesa gienji nu wahagewa njimbu ha mbombo yenji nga gu koko dienji,
10 muene mbawunua nji vinyo yabala ya khabu jia Nzambi inyi idi mumbiwa mu khopho dia khabu Jienji. Mbawumonesewa lamba gu tshuya nu mu sufre ha meso a anjelo a gijila nu ha meso a Mun’a Gimeme.
11 Mishi ya lamba didi guamonesewa idi mukanduga ivo nu ivo. Athu anyi adi mukombelela shitu ya mu foto nu gifuanesa gienji nu adi muhagewa njimbu ya jina dienji ashigo muhuluguga phipha nu muanya.
12 Ndaga eyi idi mutoga egi athu a gijila anyi ana tumagela mikhuala ya Nzambi nu ana landula gutshigina gua Yesu akolesele.”
13 Ngavile dijui mukatuga mu dilu muzuela egi: “Sonega ndaga eji: Sendese mangino, athu adi mufua hamoshi nu Fumu adi nu gusuanguluga. Ayi, nyuma idi muzuela egi ahuluguge gu midimo yawo yakola, handaga ndaga atshitshile ene mbajibuitshiwago mutshima.”*
14 Gungima ngatalele, ngamonele tuta dilaphe, muthu mumoshi wakhalele gifua mun’a muthu wakhalele holu dia tuta diene, wakhalele nu gipho gia ufumu gia wolo gu muto wenji nu phogo ya mazo abala ya gukatudila mbuto ha koko dienji.
15 Muanjelo muko wazogele ha fundo dia gijila dia tempelo, wawambelele muthu munu wakhalele holu dia tuta mu dijui diakola egi: “Kalegela phogo yaye ha gukatula mbuto, handaga tangua dia gukatula mbuto diatagana gale. Mbuto jia ha mavu jiakodi gale muabonga.”
16 Muthu munu wakhalele holu dia tuta wabalegesele* phogo yenji ha mavu, mbuto jia ha mavu jiakatudiwe.
17 Muanjelo muko wazogele ha fundo dia gijila dia tempelo idi mu dilu, muene wakhalele nu phogo ya mazo abala ya gukatudila mbuto.
18 Muanjelo muko wazogele gu giwotshielo, wakhalele nu uhinyinyi holu dia tshuya. Watamegele muanjelo munu wakhalele nu phogo ya mazo abala ya gukatuila mbuto mu dijui diakola egi: “Kalegela phogo yaye ya mazo abala ya gukatuila mbuto, bungisa ikangi ya mabundu a vinyo ya ha mavu, handaga mabundu enji akodi gale.”
19 Muanjelo wabalegesele phogo yenji ya gukatuila mbuto ha mavu, wabungishile mabundu a vinyo a ha mavu, waabishidile mu gikameno giakoma gia vinyo gia khabu jia Nzambi.
20 Akamele mabundu ene a vinyo gonze ya dimbo. Mahatshi azogele mu gikameno gia vinyo giene, akandugile uu nu mu makano a tubalu mu ulehelo wa bakilometre hehi nu 296.*
Mbimbi goshi'a diyiji
^ Gima gia gushigila miziki gia mu tangua dikulu. Giakhalele gia gudisha nu gitare gia mangino.
^ Mu Greke: “adi tundongo.”
^ Nga “holu dia mutumb’a muto wami.”
^ Nga “mididi.”
^ Mu Greke: porneya. Tala Ukoteleshi wa Mbimbi.
^ Mu Greke: “mukunda ndaga akalegele jidi gualandula.”
^ Nga “wahuitshile.”
^ Mu Greke: “Ba stade 1 600. Stade imoshi yakhalele nu ba metre 185.
