Gumonesa Gudi Yone 15:1-8
15 Ngamonele ndaga* iko yakoma nu ya gushimana mu dilu, anjelo sambadi akhalele nu malamba sambadi. Wawa malamba a gisugishilo, handaga khabu jia Nzambi mbajiheta gu gisugishilo mu njila ya malamba ene.
2 Ngamonele gima gimoshi gifua kianga gia thala-thala gia gubungisa nu tshuya. Athu anyi adi mubinga shitu ya mu foto nu gifuanesa gienji nu mutango wa jina dienji, akhalele agumagana hehi nu kianga gia thala-thala, akhalele nu itare* ya Nzambi ha mago awo.
3 Akhalele muyimba lungimbo lua Moize muhiga wa Nzambi nu lungimbo lua Mun’a Gimeme, egi:
“Yehowa Nzambi wa Ngolo Jiagasue, midimo yaye idi yakoma nu ya gushimana, makalegelo aye adi atagana nu a giamatshidia, aye Fumu wa ivo nu ivo.
4 Yehowa, nanyi gajiyilego guguvila woma nga gutumbuisa jina diaye? Handaga aye hakhaye wakhala yagujinginyina gudi athu aye. Ifutshi yagasue mbayiza, nu mbayikombelela gutuama diaye, handaga mikhuala yaye yatagana yamonesewe.”
5 Gungima dia ndaga eji, ngamonele fundo dia gijila dia inzo ya tenta* ya gitageneno dia gukanguluga mu dilu.
6 Anjelo sambadi akhalele nu malamba sambadi azogele ha fundo dia gijila, akhalele agusudiga linene ilaphe nu yakhalele mungedima, akhalele nji agusudiga mikaba ya wolo ha thulo jiawo.
7 Sheribe mumoshi mukatshi dia ba sheribe nguana wahanele anjelo sambadi malonga sambadi a wolo akhalele aguzala pha nu khabu jia Nzambi, munu wana khala nu monyo ivo nu ivo.
8 Fundo dia gijila diazalele pha nu mishi mukunda nu lutumbu lua Nzambi nu mukunda nu ngolo jienji. Guakhalelego nga muthu mumoshi wakhalele naye gungina ha fundo dia gijila uu nu tangua diakhalele naye guhua malamba sambadi a anjelo sambadi.
Mbimbi goshi'a diyiji
^ Mu Greke: “gijiyishilo.”
^ Gima gia gushigila miziki gia mu tangua dikulu. Giakhalele gia gudisha nu itare ya mangino.
^ Nga “tenta ya ndaga jiazuelele Nzambi.”
