Gumonesa Gudi Yone 16:1-21
16 Ngavile dijui diakola muzoga mu fundo dia gijila muwambela anjelo sambadi egi: “Ndenu mubundule malonga sambadi a khabu jia Nzambi ha mavu.”
2 Muanjelo wa thomo wayile, wabunduile longa dienji ha mavu. Phuta ya lamba nu yabola yakuatele athu anyi akhalele nu njimbu ya shitu ya mu foto nu anyi akombelele gifuanesa gienji.
3 Muanjelo wa ngiadi wabunduile longa dienji mu kianga. Kianga giabuile mahatshi gifua mahatshi a muthu wa gufua. Ima yagasue ya monyo ya mu kianga yafile.
4 Muanjelo wa thathu wabunduile longa dienji mu mita nu mu ito* ya mita. Yabuile mahatshi.
5 Ngavile muanjelo udi nu uhinyinyi holu dia meya muzuela egi: “Aye Nzambi udi wa gujinginyina gudi athu aye, yonu udi guene nu wakhalele, udi watagana, handaga wazudi badesizio a luholo elu.
6 Ene anosesele mahatshi a athu a gijila nu a baprofete, aye waahanele mahatshi ha gunua; idi lufuto luawo.”
7 Ngavile giwotshielo muzuela egi: “Ayi, Yehowa, udi Nzambi wa Ngolo Jiagasue, usopheshi waye udi wa giamatshidia nu watagana.”
8 Muanjelo wa nguana wabunduile longa dienji holu dia kumbi. Ahanele kumbi ngolo jia gukonda athu nu muanya wenji.
9 Muanya wabala wakondele athu, uvi athu ashingile jina dia Nzambi munu udi nu ufumu holu dia malamba awa. Abalumuinego mitshima yawo nu amutumbuishilego.
10 Muanjelo wa thano wabunduile longa dienji holu dia nguasa ya ufumu ya shitu ya mu foto. Ufumu wenji wabuile phipha, athu asendesele gudidia madimi mukunda nu lamba diawo,
11 ashingile Nzambi wa mu dilu mukunda nu malamba awo nu mukunda nu phuta jiawo, uvi abalumuinego mutshima mu makalegelo awo.
12 Muanjelo wa samano wabunduile longa dienji mu muta wakoma wa Efrata, meya enji amiginyile ha gulondega njila mukunda nu mafumu adi mukatuga gu khanda ya mazogelo a kumbi.*
13 Ngamonele mbimbi jia usala* thathu gifua minonge muzoga mu kano dia dragona nu mu kano dia shitu ya mu foto nu mu kano dia profete wa mambo.
14 Jidi mbimbi jiana zuela bademo nu jidi mukalagala ndaga jia gushimana, jidi muya gudi mafumu a ha mavu agasue ha guabungisa mukunda nu ita ya lusugu luakoma lua Nzambi wa Ngolo Jiagasue.
15 “Tala, ngudi muza gifua nzangi. Gusuanguluga gudi nu muthu udi nu gikolekole nu udi mubamba milele yenji ya holu hagula gawendigo thowa nu athu amonyigo musonyi wenji.”
16 Mbimbi jiene jiaabungishile ha fundo diana tamegewa mu Hebelu egi Alemagedona.*
17 Muanjelo wa sambadi wabunduile longa dienji mu muhehe. Dijui diakola diazogele ha fundo dia gijila mu nguasa ya ufumu, diazuelele egi: “Yakalegewa!”
18 Mvula yahenyele, ngavile majui nu miandu, mavu adigitshile mangololo. Sendese athu ana khala ha mavu, mavu khenji adigitshile luholo elu ndo. Gudigita guene guakhalele diago guakola nu guavula.
19 Dimbo diakoma diadikhaphumuine mu itshinyi thathu, membo a mu ifutshi abuile; Nzambi wawungulugile* Babilona Yakoma ha guyihana khopho dia vinyo ya khabu jienji jiakola.
20 Mahongo agasue alengele, milundu nji yatotele.
21 May’a nzanza akoma akatugile mu dilu abuidile athu, seso dimoshi dia may’a nzanza diakhalele nu unemelo wa talanta* imoshi. Athu ashingile Nzambi mukunda nu lamba dia may’a nzanza handaga lamba diene diakhalele diakola diago.
Mbimbi goshi'a diyiji
^ Nga “mididi.”
^ Nga “gu est.”
^ Mu Greke: “nyuma jiabola.”
^ Mu Greke: Alemagedona, yakatuga mu mbimbi ya Hebelu idi mukotelesa egi ”Mulundu wa Megido.”
^ Nga “Nzambi wayabulukile.”
^ Talanta ya enya Greke yakhalele nu kilo 20,4.
