Gumonesa Gudi Yone 17:1-18
-
Gusophesewa gua “Babilona Yakoma” (1-18)
17 Muanjelo mumoshi mukatshi dia anjelo sambadi anyi akhalele nu malonga sambadi, wanguwambelele egi: “Iza nguguwambele usopheshi wa thambi yakoma ya mukhetu, munu udi wa gukhala holu dia mita yavula.*
2 Mafumu a ha mavu akalegele n’enji uthambi,* enya a ha mavu akuatewe matombe* a uthambi* wenji.”
3 Muene wangubatele mu ngolo jia nyuma uu nu mavu a luselenga. Ngamonele mukhetu mumoshi wa gukhala holu dia shitu ya mu foto yabenga, yakhalele ya guzala pha nu majina adi mushinga Nzambi, yakhalele nji nu mito sambadi nu mbinga kumi.
4 Mukhetu muene wakhalele ya gusudiga milele yabenguluga nu ilababa, wakhalele wa gudisembega nu wolo, nu maseso a ndando, nu misanga ya ndando, ha koko dienji wakhalele nu khopho dia wolo dia guzala pha nu ima ya usala, nu ya mvindu ya uthambi* wenji.
5 Ha mbombo yenji hakhalele ha gusonega jina dimoshi dia gisuegi, “Babilona Yakoma, gin’a thambi nu gin’a ndaga jia usala jia ha mavu.”
6 Ngamonele egi mukhetu muene wakhalele wa gukuatewa mahatshi a athu a gijila nu mahatshi a matemue a Yesu.
Tangua ngamumonele, ngadihudile muavula.
7 Muanjelo wanguwambelele egi: “Mukunda natshi udi gudihula? Ngudi guguwambela gisuegi gia mukhetu nu gia shitu ya mu foto idi gumubata inyi idi nu mito sambadi nu mbinga kumi.
8 Shitu ya mu foto wamonyi yakhalele, uvi ishigo guene, idi mutshigina guzoga mu wina dishigo nu gisugishilo gungima mbayishiyiwa. (Athu a ha mavu anyi majina awo asonegewe ndo mu rulo ya monyo sendese gu gisendeselo gia mavu), mbaadihula tangua mbaamona shitu ya mu foto inyi yakhalele, uvi ishigo guene, gungima mbayikhala guene.
9 “Ndaga eyi idi mutoga ndunge nu gutema: Mito sambadi idi mumonesa milundu sambadi, fundo mukhetu udi wa gukhala holu.
10 Mafumu adi sambadi: Mutano abui gale, mungoshi yowu guene, muko udi naye guza, uvi tangua mbadiza muene, udi naye gusala phamba mukunda nu tangua diazonda.
11 Shitu ya mu foto yakhalele uvi ishigo guene, yene nji idi fumu wa nage. Uvi yakatuga gudi mafumu sambadi, gungima mbayishiyiwa.
12 “Mbinga kumi wamonyi jidi mumonesa mafumu kumi anyi adi khenji ahetago ufumu. Uvi tangua mbaaheta ufumu, mbaahinyina mukunda nu tangua dimoshi nu shitu ya mu foto.
13 Adi nu matangi amoshi, adi muhana ngolo jiawo nu ufumu wawo gudi shitu ya mu foto.
14 Ene mbaalua nu Mun’a Gimeme, uvi luholo muene udi Fumu wa mafumu, nu Muhinyinyi wa ahinyinyi, Mun’a Gimeme mbawaabinga. Athu anyi adi n’enji, anyi Nzambi watamegele nu watombele nu adi agujinginyina gudi Nzambi mbaabinga nji.”
15 Muanjelo wanguwambelele egi: “Mita wamonyi, inyi mukhetu wa thambi udi wa gukhala holu diayo, idi mumonesa athu nu thundu jia athu nu ifutshi nu mazuelelo.
16 Mbinga kumi wamonyi nu shitu ya mu foto mbajituna mukhetu ya thambi, mbajimutambula ima yenji yagasue nu mbajimubemba thowa; mbajidia misunyi ya muila wenji nu mbajimukonda diago tshuya.
17 Handaga Nzambi wambi matangi mu mitshima yawo hagula atagenese gutshigina guenji, ayi, atagenese gutshigina guawo hakhawo, luholo ahanyi ufumu wawo gudi shitu ya mu foto uu nu tangua mbimbi jia Nzambi mbajitagenesewa.
18 Mukhetu munu wamonyi udi mumonesa dimbo diakoma didi nu uhinyinyi holu dia mafumu a ha mavu.”
Mbimbi goshi'a diyiji
^ Mu Greke: “meya avula.”
^ Tala Ukoteleshi wa Mbimbi.
^ Mu Greke: “vinyo.”
^ Mu Greke: porneya. Tala Ukoteleshi wa Mbimbi.
^ Mu Greke: porneya. Tala Ukoteleshi wa Mbimbi.
