Gumonesa Gudi Yone 18:1-24
18 Gungima dia ndaga eji, ngamonele muanjelo muko mukatuga mu dilu mubulumuga nu uhinyinyi wakoma, gungedima gua lutumbu luenji guaphelegetesele mavu.
2 Muene wakalugile mu dijui diakola egi: “Muene wabua! Babilona Yakoma wabua, wabua fundo bademo ana khala nu fundo diana gudisuega nyuma jiagasue jiabola nu tunjila tuagasue tua usala nu tuana tunyiwa!
3 Mukunda nu matombe a nzala yenji yakola ya uthambi,* ifutshi yagasue yakuatewe matombe* enji, mafumu a ha mavu akalegele n’enji uthambi, enya mungenda* a ha mavu abuile enya umonyi mukunda nu guvula gua ima yenji ya ndando inyi muene ganago guvila musonyi.”
4 Ngavile dijui diko mukatuga mu dilu muzuela egi: “Athu ami, zogenu mukatshi dienji gula mushigo mutshigina gudibungisa n’enji mu gubola guenji nu gula mushigo mutshigina guheta malamba aza gumubuila.
5 Handaga gubola guenji guadivudisa nu guakanduga uu nu mu dilu. Nzambi wawunguluga makalegelo enji abola.*
6 Mutshitshilenu ndaga gifua luholo luakalegele muene athu ako. Ayi, mu ndaga jiakalegele muene, mutshitshilenu najio mbala jiyadi, mu khopho dialondele muene matombe, mulondelenu nawo mbala jiyadi.
7 Luholo luadihalele muene nu luakhalele muene nu ima ya ndando inyi muene ganago guvila musonyi, muhanenu nji lamba nu gikenene luholo lumoshi. Handaga muene udi mulandula guzuela mu mutshima wenji egi: ‘Ame ngudi fumu ha gife gia ufumu, ngushigo mukhetu wa gafunda, mbangushigo muvua gikenene nga hazonda.’
8 Gishina giene malamba enji mbaamujila lusugu lumoshi: gufua nu gikenene nu nzala, mbawukondewa diago gu tshuya handaga Yehowa Nzambi munu wamusophesa udi nu ngolo.
9 “Mafumu a ha mavu anyi akalegele n’enji uthambi* nu adihanele n’enji mu ima ya ndando inyi muene ganago guvila musonyi, mbaadila nu mbadibunda ha thulo nu gikenene giagasue tangua mbaamona mishi ya gukondewa guenji.
10 Mbaamagana gualeha nu woma mukunda nu lamba dienji nu mbaazuela egi: ‘Lamba diakola, lamba diakola, aye Babilona dimbo diakoma nu diakola, handaga usopheshi waye waji mu tangua dimoshi!’
11 “Enya mungenda a ha mavu nji mbaadila nu mbaakhala nu gikenene mukunda nu muene, handaga mbagukhadigo nga muthu mumoshi wajiya gusumba ima yawo:
12 Wolo, utadi wa siliva, nu maseso a ndando, nu misanga ya ndando, nu linene yabonga, nu milele yabenguluga, nu milele yalondewe nu wanda wa swa, nu milele yabenga, nu ima yagasue yalondewe nu mitshi yana zola vumba, nu ima yagasue yalondewe nu mazo a ngiamba, nu ima yagasue yalondewe nu mitshi yabonga, nu ya kuivre, nu ya utadi, nu ya maseso a mikubu yavula;
13 nu kanele* nu ima ya gutelegela ya gu gifutshi gia Inde, nu uhafu, nu maji a vumba diabonga, nu uhafu ulaphe, nu vinyo, nu maji a olive, nu phupha ila diege-diege, nu ble, nu ngombe, nu imeme, nu tubalu, nu phusu-phusu, nu ahiga, nu mionyo ya athu.
14 Ayi, ima yabonga inyi wakhalele mutshigina yagulenga. Ima yagasue yabonga ya gudia nu ya ndando yatota, mbayishigo mumonega luko nga hazonda.
15 “Enya mungenda anyi akhalele mudiga ima eyi abuile enya umonyi mukunda nu muene, mbaamagana gualeha, handaga mbavua woma wa lamba dienji nu mbaadila, mbavua nji gikenene,
16 mbaazuela egi: ‘Lamba diakola, lamba diakola, dimbo diakoma diakhalele dia gusudiga milele ya linene yabonga yabenguluga nu yabenga, nu diakhalele dia gudisembega nu ima ya ndando nu ya wolo nu maseso a ndando nu misanga ya ndando.
17 Umonyi wavula ngegi wabolesewe tangua dimoshi!’
“Bakapitene agasue a masuwa, nu athu agasue ana wenda mu masuwa, nu athu ana tshita mudimo mu masuwa, nu athu ana jinga mukunda nu midimo ya mu kianga amaganele gualeha,
18 akalugile mu dijui diakola tangua amonele mishi ya gukondewa guenji, azuelele egi: ‘Dimbo ditshi diajiya gufuanesewa nu dimbo edi diakoma?’
19 Adimbile fuphi mu mito yawo, akalugile, adidile nu akhalele nu gikenene. Azuelele egi: ‘Lamba diakola, lamba diakola, dimbo diakoma dinyi diabuishile athu agasue akhalele nu masuwa mu mita enya umonyi mukunda nu umonyi wenji, mu tangua dimoshi muene washiyiwa!’
20 “Oo dilu, suanguluga, nu enue athu a gijila nu apostolo nu baprofete, handaga Nzambi wamusophesa mukunda nu gubonga guenu!”
21 Muanjelo mumoshi wa ngolo wathuphuile seso, gifua seso diakoma dia gutuila mbuto, wadibishidile mu kianga, wazuelele egi: “Lulu luholo mbaabishila Babilona dimbo diakoma nu mbagamonegago luko nga hazonda.
22 Majui a ngimba jidi muyimba nu gitare* nu a athu ana shiga miziki, nu a athu ana shiga mbinga nu a athu ana shiga phungi, mbaavuiwago luko mukatshi diaye. Muthu wagasue wana tshita mudimo wa mago, ikhale wa luholo lutshi mbagamonegago luko mukatshi diaye. Matululu a seso ya gutuila mbuto mbaavuiwago luko mukatshi diaye.
23 Tshuya tua muenda mbatulemigo luko mukatshi diaye. Dijui dia yala udi muzula mukhetu mu ulo nga dia mukhetu udi muhagewa mu ulo mbadivuiwago luko mukatshi diaye. Athu aye a mungenda akhalele athu a lutumbu a mavu, wahuigile ifutshi yagasue nu midimo yaye ya phipha.
24 Ayi, mahatshi a baprofete nu a athu a gijila amonewe mukatshi dienji nu a athu agasue ashiyiwe ha mavu.”
Mbimbi goshi'a diyiji
^ Mu Greke: porneya. Tala Ukoteleshi wa Mbimbi.
^ Mu Greke: “vinyo.”
^ Nga “enya mungenda anyi anaya nu guwenda.”
^ Nga “umbundudi wenji.”
^ Tala Ukoteleshi wa Mbimbi.
^ Nga “milungo ya gutelegela ima.”
^ Gima gia gushigila miziki gia mu tangua dikulu. Giakhalele gia gudisha nu gitare gia mangino.
