Gumonesa Gudi Yone 20:1-15
20 Ngamonele muanjelo mukatuga mu dilu mubulumuga, wakhalele nu saphi ya wina ushigo nu gisugishilo nu malenge akoma ha koko dienji.
2 Wakuatele dragona, nyoga ya mualeha, yene Diabulu nu Satana, wamujitshigile mukunda nu ivo 1 000.
3 Wamubishidile mu wina ushigo nu gisugishilo, wakangele wina wene nu wahagele njimbu holu dienji, hagula gahuigigo luko ifutshi uu nu tangua ivo 1 000 mbayibalega. Gungima, mbaamuzola mukunda nu tangua diazonda.
4 Ngamonele nguasa jia ufumu, athu anyi akhalele ha nguasa jiene a ahanele ufumu wa gusophesa. Ayi, ngamonele mionyo* ya athu anyi ashiyiwe* handaga alongesele lukuma luatadila Yesu nu azuelele ndaga yatadila Nzambi, nu athu anyi atunyile gukombelela shitu ya mu foto nga gifuanesa gienji, nu anyi ahagewego njimbu ha mbombo jiawo nga ha koko diawo. Afuzumugile, asendesele guhinyina hamoshi nu Klisto mukunda nu ivo 1 000.
5 (Athu ako a gufua afuzumugilego uu nu tangua ivo 1 000 yabalegele.) Gugu gufuzumuga gua thomo.
6 Athu adi muzuga mu gufuzumuga gua thomo adi nu gusuanguluga nu adi athu a gijila. Gufua gua ngiadi gushigo nu ngolo gudi ene, uvi mbaabua nganga-nzambi jia Nzambi nu jia Klisto nu mbaakhala mafumu ha guhinyina n’enji mukunda nu ivo 1 000.
7 Tangua ivo 1 000 mbayitagana, Satana mbawuzolewa mu bologo dienji,
8 muene mbawuzoga ha guhuiga ifutshi idi mu khanda nguana jia mavu, Goga nu Magoga, ha guabungisa mukunda nu ita. Mutango wawo udi gifua ishegele ya mu kianga.
9 Amuanganele ha mavu agasue, ajietele fundo diakhalele athu a gijila nu dimbo diana zumbiwa. Uvi tshuya tuakatugile mu dilu, tuaakondele.
10 Diabulu munu wakhalele guahuiga wabishidiwe mu kianga gia tshuya nu gia sufre, fundo diakhalele shitu ya mu foto nu profete wa mambo. Ene mbaamonesewa lamba* phipha nu muanya ivo nu ivo.
11 Ngamonele nguasa ya ufumu yakoma ilaphe, Muthu mumoshi wakhalele ha nguasa yene, mavu nu dilu alengele gutuama dienji, guakhalelego luko nu fundo mukunda nu ene.
12 Ngamonele athu a gufua akoma nu azonda,* a gumagana gutuama dia nguasa ya ufumu, rulo jiakangudiwe. Uvi rulo iko yakangudiwe; idi rulo ya monyo. Athu a gufua asophesewe mu gudivua nu ndaga jidi jia gusonega mu rulo jiene ha gutadila makalegelo awo.
13 Kianga giazolele athu a gufua mukatshi dienji, gufua nu Malumba* azolele athu akhalele a gufua mukatshi diawo, muthu nu muthu wasophesewe ha gutadila makalegelo enji.
14 Gufua nu Malumba* abishidiwe mu kianga gia tshuya. Kianga gia tshuya gidi mumonesa gufua gua ngiadi.
15 Muthu yagasue yonu jina dienji diakhalelego dia gusonega mu mukanda wa monyo wabishidiwe mu kianga gia tshuya.
Mbimbi goshi'a diyiji
^ Mu Greke: “ashiyiwe nu giphangu.”
^ Nga “mbaakanga njila; mbaamba mu bologo.”
^ Nga “athu adi nu ndando nu athu ashigo nu ndando.”
^ Nga “Hadese,” yakotelesa egi, fundo ana funda athu agasue. Tala Ukoteleshi wa Mbimbi.
^ Nga “Hadese,” yakotelesa egi, fundo ana funda athu agasue. Tala Ukoteleshi wa Mbimbi.
