Gumonesa Gudi Yone 21:1-27
21 Ngamonele dilu dihe-dihe nu mavu ahe-ahe; handaga dilu dikulu nu mavu akulu atotele, kianga gishigo luko guene.
2 Ngamonele nji dimbo dia gijila, Yelusalema Ihe-ihe, mukatuga mu dilu gudi Nzambi mubulumuga, ya gudilondega gifua luholo mukhetu udi mutshigina guzudiwa mu ulo wana gudisembega mukunda nu mulumi’enji.
3 Ngavile dijui diakola muzoga gu nguasa ya ufumu muzuela egi: “Talenu! Tenta ya Nzambi idi nu athu, muene mbawukhala mukatshi diawo, ene mbakhala athu enji. Nzambi hakhenji mbawukhala nawo.
4 Muene mbawukukumuna masoji agasue gu meso awo, gufua mbagukhadigo luko, nga gudila nga gutataganya, lamba nji mbadikhadigo luko. Ndaga jikulu jiatota.”
5 Muthu udi ha nguasa ya ufumu wazuelele egi: “Tala! Ngudi mutshita ima yagasue ihe-ihe.” Wazuelele luko egi: “Sonega, handaga mbimbi eji jidi naye guhagewa mutshima nu jidi jia giamatshidia.”
6 Wanguwambelele egi: “Jiakalegewa! Ame ngudi Alfa nu Omega,* gisendeselo nu gisugishilo. Muthu yagasue udi nu luhungu mbangumuhana meya a githuhu* adi mukatuga gu gito* gia meya a monyo.
7 Muthu wagasue mbawubinga mbawuheta ima eyi, ame mbangukhala Nzambi wenji, muene mbawukhala mun’ami.
8 Uvi enya woma, nu athu ashigo nu gutshigina, nu athu adi mukalagala ndaga jia usala, nu athu adi mushiya athu ako, nu athu adi mukalagala uthambi,* nu athu adi mutshita midimo ya phipha, nu athu adi mukombelela isongo, nu enya mambo agasue mbaabishidiwa mu kianga gia tshuya nu gia sufre. Kianga gia tshuya gidi mumonesa gufua gua mbadi.”
9 Muanjelo mumoshi mukatshi dia anjelo sambadi anyi akhalele nu malonga sambadi a guzala nu malamba sambadi a gisugishilo wajile nu wanguwambelele egi: “Iza ngugudijige mukhetu udi naye guzudiwa mu ulo, munu mbawukhala mukaji’a Mun’a Gimeme.”
10 Wangubatele mu ngolo jia nyuma uu nu holu dia mulundu wakoma waleha, wangudijigile Yelusalema dimbo dia gijila diakhalele mukatuga gudi Nzambi mu dilu mubulumuga
11 nu diakhalele nu lutumbu lua Nzambi, diakhalele mungedima gifua seso dia ndando yavula, gifua seso dia jaspe didi mungedima gifua kristale.
12 Dimbo diene diakhalele nu ibayi* yakoma nu yaleha nu mifulo 12. Anjelo 12 akhalele ha mifulo yene, mifulo yene yakhalele ya gusonega majina a iphuta 12 ya ana a Isalele.
13 Gu khanda ya mazogelo a kumbi guakhalele nu ijidigo thathu, gu khanda ya thunda ijidigo thathu, gu khanda ya mbongo ijidigo thathu, gu mayilo a kumbi ijidigo thathu.
14 Ibayi ya dimbo diene yakhalele nji nu maseso 12 a fondasio, holu dia maseso ene hakhalele ha gusonega majina 12 a apostolo 12 a Mun’a Gimeme.
15 Muanjelo munu wakhalele muzuela nu ame wakhalele nu muhango wa wolo wa guthesela, ha guthesa dimbo nu mifulo yenji nu ibayi yenji.
16 Khanda jiagasue nguana jia dimbo jiakhalele luholo lumoshi, ulehelo wenji nu ukomelo wenji wakhalele luholo lumoshi. Wathesele dimbo nu muhango, diakhalele ba stade 12 000;* ulehelo wenji nu ukomelo wenji nu gitala gienji yakhalele luholo lumoshi.
17 Wathesele nji ibayi, yakhalele bakude 144* ha gutadila luholo athu ana thesa, muanjelo nji wathesele luholo lumoshi gifua muana thesa athu.
18 Ibayi yatungiwe nu jaspe, dimbo diatungiwe nu wolo wabonga wakhalele gifua thala-thala idi mungedima.
19 Fondasio jia ibayi ya dimbo jiakhalele jia gulondega muabonga nu maseso a ndando a maluholo agasue. Fondasio ya thomo yakhalele ya jaspe, ya ngiadi yakhalele ya safire, ya thathu ya kaleseduane, ya nguana ya emelode,
20 ya thano yakhalele ya sardonise, ya samano yakhalele ya sarduane, ya sambadi yakhalele ya krizolite, ya nage yakhalele ya belile, ya divua yakhalele ya topaze, ya kumi yakhalele ya krizoprase, ya kumi nu imoshi yakhalele ya yasente, ya kumi nu iyadi yakhalele ya ametiste.
21 Mifulo 12 yakhalele misanga 12 ya ndando. Mufulo nu mufulo wakalegewe nu musanga umoshi wa ndando. Bala-bala diakoma dia dimbo diakhalele dia wolo wabonga, ula kedi-kedi gifua thala-thala.
22 Ngamonelego tempelo mu dimbo diene, handaga tempelo ya dimbo diene idi Yehowa Nzambi wa Ngolo Jiagasue nu Mun’a Gimeme.
23 Yakhalelego mutoga egi dimbo diene dikhale nu kumbi nga nu ngonda* ha guzola muanya, handaga lutumbu lua Nzambi luakhalele gifua muanya wakhalele gudiphelegetesa. Muenda wa dimbo diene wakhalele Mun’a Gimeme.
24 Ifutshi mbayiwenda mu muanya wa dimbo diene, mafumu a ha mavu mbaabata lutumbu luawo muene.
25 Mifulo yenji mbayikangewago nga hazonda mu muanya handaga phipha mbayikhadigo guene.
26 Mbaabata lutumbu nu ginemua gia ifutshi mu dimbo diene.
27 Ndaga jiagasue jiabola nu athu adi mukalagala ndaga jia usala nu jia mambo mbaashigo mungina muene nga hazonda; phamba athu anyi majina awo adi agusonega gu rulo ya monyo ya Mun’a Gimeme mbaangina.
Mbimbi goshi'a diyiji
^ Nga “A nu Z.” Alfa idi gisona gia thomo, Omega idi gisona gia gisugishilo mu zuelelo dia Greke.
^ Nga “ashigo a gufutshila falanga.”
^ Nga “mudidi.”
^ Tala Ukoteleshi wa Mbimbi ha “Uthambi.”
^ Nga “ibindji.”
^ Ba kilometre 2 220. Stade imoshi yana khala nu ba metre 185.
^ Bametre 64.
^ Nga “mbeji.”
