Gumonesa Gudi Yone 3:1-22
3 “Sonegela muanjelo wa hungu dia gu Sarde egi: Muthu udi nu nyuma sambadi jia Nzambi nu themua sambadi udi muzuela egi: ‘Ame mujiya makalegelelo aye, ngudi mujiya nji egi athu ana mona egi udi nu monyo, uvi udi ya gufua.
2 Monesa gutema, kolesa ima yasala yinyi yakhalele hehi nu gufua, handaga ngamoni egi khenji utagenesa ndo muabonga midimo yaye gutuama dia Nzambi wami.
3 Landula gutangiza* ndaga wahetele nu jinyi wavile, jibambe muabonga, balumuna mutshima. Gula watemele ndo, mbangugujila gifua nzangi, mbawushigo mujiya nga hazonda tangua mbangugujila.
4 “‘Uvi udi nu athu* ako mu hungu dia Sarde adi khenji abolesa ndo milele yawo, ene mbaawenda nu ame hamoshi nu milele yaphelegeta, handaga adi atagana ha guheta luendu lulu.
5 Muthu mbawubinga, mbawusudigishiwa milele ilaphe nu mbangumuangigo* nga hazonda jina dienji mu mukanda wa monyo. Uvi mbangutshigina gutuama dia Tata nu gutuama dia anjelo enji egi ngajiya jina dienji.
6 Muthu udi nu matshui a guvua avue ndaga nyuma idi muwambela mahungu.’
7 “Sonegela muanjelo wa hungu dia gu Filadelefiya egi: Muthu wa gijila, muthu wa giamatshidia,* munu udi nu saphi ya Davidi, wana kangula hagula muthu muko gakangigo nu wana kanga hagula muthu muko gakangulago udi muzuela egi:
8 ‘Ame mujiya makalegelo aye. Tegelela! Ngahagi mufulo waguzulula gutuama diaye unu muthu muko gajiyilego gujidiga. Ame mujiya egi ushigo nu ngolo jiavula, uvi wana tumagela mbimbi yami watunyilego nji jina diami.
9 Tegelela! Athu a mu sinagoga ya Satana, anyi ana zuela egi adi enya Yuda, uvi ene ashigo enya Yuda adi enya mambo. Tala! Mbangutshita egi aze afugame gu malu aye, mbangutshita nji hagula ajiye egi ngaguzumbile.
10 Handaga wabambele mbimbi yatadila gukolesela guami,* ame nji mbangugubamba mu tangua dia gulolewa gunu mbagujila mavu agasue ha gulola athu agasue.
11 Ame muza muphushi, kuata mangololo ndaga udi najio, hagula nga muthu mumoshi gatambulago gifulu giaye gia ufumu.
12 “‘Muthu mbawubinga, mbangumubuisa kunji dia tempelo ya Nzambi wami, muene mbagazogigo muene nga hazonda. Mbangusonega jina dia Nzambi wami ha mbombo yenji nu jina dia dimbo dia Nzambi wami, Yelusalema ihe-ihe idi mukatuga mu dilu gudi Nzambi wami mubulumuga hashi, mbangumusonega nji jina diami dihe-dihe.
13 Muthu udi nu matshui a guvua avue ndaga nyuma idi muwambela mahungu.’
14 “Sonegela muanjelo wa hungu dia gu Laodise egi: Muthu wana tamegewa egi Amen, temue wa gujinginyina nu wa giamatshidia, gisendeselo gia ima yafugile Nzambi, udi muzuela egi:
15 ‘Ngumujiya midimo yaye, ngumujiya nji egi ushigo nu guhuma, ushigo nji nu tshuya. Ngumutshigina egi ukhale nu guhuma, nga ndo ukhale nu tshuya.
16 Luholo udi lama-lama, ushigo nu tshuya, ushigo nu guhuma, mbangugulusa mu kano diami.
17 Handaga aye udi muzuela egi: “Ame ngudi muenya umonyi, ngahetshi umonyi wavula, ngushigo mukamba nga gima gimoshi,” uvi ushigo mujiya egi udi mu lamba, udi muhana gikenene, udi phutu, udi gifofo, udi nji thowa.
18 Ngudi gugutemesa hagula usumbe gudi ame wolo waphelegetesewe gu tshuya, hagula ubue muenya umonyi nu usumbe milele ilaphe, hagula usudige, ngenyi athu amonyigo thowa yaye hagula uvue musonyi, usumbe gihemba gia meso, ukunge gu meso aye hagula umone.
19 “‘Athu agasue ngana zumba, ngana guabalela* nu ngana guahana ndola. Khala nu gikhesa, balumuna mutshima.
20 Tegelela! Ngudi gale ha mufulo, ngudi mukokola, gula muthu wavua dijui diami nu wakangula mufulo, ame mbangungina monzo yenji mbatudia n’enji hamoshi mu ngueze.
21 Muthu wagasue mbawubinga, mbangumuhana luendu lua gukhala nu ame ha nguasa yami ya ufumu, gifua luholo ame ngabingile nu ngana khala nu Tata wami ha nguasa yenji ya ufumu.
22 Muthu udi nu matshui a guvua avue ndaga nyuma idi muwambela mahungu.’”
Mbimbi goshi'a diyiji
^ Nga “guwunguluga.”
^ Mu Greke: “majina a athu.”
^ Nga “mbagukatulago.”
^ Nga “wana zuela giamatshidia tangua diagasue.”
^ Nga ndo yajiya gukhala egi, “walanduile gifezegeselo gia gukolesela guami.”
^ Nga “ngana kuadingila.”
