Gumonesa Gudi Yone 4:1-11
4 Gungima dia ndaga jiji, ngamonele mufulo wa gukangula mu dilu, dijui dia thomo ngavile diakhalele muzuela nu ame diakhalele gifua phungi, dianguwambelele egi: “Kanduga gugu, mbangugudijiga ndaga jidi naye gukalegewa.”
2 Gungima dienji, nu dishimbu ndo, nyuma ya Nzambi yajile gudi ame, ngamonele nguasa ya ufumu mu dilu, muthu mumoshi wakhalele ha nguasa yene.
3 Muthu wakhalele ha nguasa yene wakhalele mumonega gifua seso dia jaspe nu seso dia sarduane.* Mu khulo ya nguasa yene muakhalele nu khongolo yakhalele mumonega gifua emelode.
4 Mu khulo ya nguasa yene ya ufumu muakhalele muagujietesa nu nguasa jia ufumu 24. Ngamonele akulu 24 agukhala ha nguasa jiene, agusudiga milele ilaphe nu akhalele nu ipho ya ufumu ya wolo gu mito yawo.
5 Ngamonele guhenya gua mvula muzoga mu nguasa ya ufumu; ngavile nji majui nu miandu muzoga mu nguasa yene. Gutuama dia nguasa yene guakhalele nu mienda sambadi yakhalele mulema tshuya. Mienda yene idi mumonesa nyuma sambadi jia Nzambi.
6 Gutuama dia nguasa ya ufumu guakhalele nu gima gimoshi gifua kianga gia thala-thala, giakhalele muhenya gifua kristale.*
Mukatshi dia nguasa ya ufumu nu mu khulo yenji muakhalele nu ba sheribe muwana akhalele aguzala pha nu meso gutuama nu gungima.
7 Sheribe wa thomo wakhalele gifua khoshi, sheribe wa ngiadi wakhalele gifua mutumba wa ngombe, sheribe wa thathu wakhalele nu phala gifua ya muthu, sheribe wa nguana wakhalele gifua njila ya khuyi idi muzuga.
8 Sheribe wagasue mukatshi dia ba sheribe ene nguana wakhalele nu mahambu asamano. Mahambu ene akhalele aguzala pha nu meso nu holu nu goshi. Ba sheribe ene adi mulandula guzuela phipha nu muanya egi: “Yehowa udi Nzambi wa gijila, wa gijila, wa gijila, Nzambi wa Ngolo Jiagasue munu wakhalele, udi guene nu udi muza.”
9 Tangua ba sheribe adi mutumbuisa nu gunemesa nu guhana mersi gudi Muthu udi ya gukhala ha nguasa ya ufumu, Muthu munu udi nu monyo wa ivo nu ivo,
10 akulu 24 adi mufugama gutuama dia Muthu udi ya gukhala ha nguasa ya ufumu nu adi mukombelela Muthu udi nu monyo ivo nu ivo, adi mubishila ipho yawo ya ufumu gutuama dia nguasa ya ufumu nu adi muzuela egi:
11 “Yehowa Nzambi wetu, udi watagana ha guheta lutumbu nu ginemua nu ngolo, handaga aye wafugile ima yagasue. Aye watshiginyile nji egi ima yene ikhale guene nu ifugiwe.”
Mbimbi goshi'a diyiji
^ Nga “seso diabenga dia ndando yavula.”
^ kristale idi seso dimoshi diana khala gifua diama.
