Gumonesa Gudi Yone 5:1-14
5 Ngamonele rulo ya guwonga ha koko gua madia gua Muthu wakhalele ha nguasa ya ufumu, rulo yene yakhalele ya gusonega khanda jiagasue jiyadi,* yakhalele ya gujitshiga nu njimbu* sambadi.
2 Ngamonele muanjelo mumoshi wa ngolo muzuela mu dijui diakola egi: “Nanyi udi watagana ha gukangula rulo nu njimbu jienji?”
3 Uvi guakhalelego nga muthu mumoshi ikhale mu dilu, nga ha mavu, nga goshi’a mavu wajiya gukangula rulo yene nga ha gutala mukatshi.
4 Ngadidile mangololo handaga guakhalelego nga muthu mumoshi watagana ha gukangula rulo yene nga ha gutala mukatshi.
5 Uvi mukulu mumoshi wanguwambelele egi: “Bemba gudila. Tala! Khoshi ya mu giphuta gia Yuda, muji wa Davidi wabingile, wajiya gukangula rulo yene nu njimbu jienji sambadi.”
6 Ngamonele mun’a gimeme wakhalele mumonega gifua washiyiwe, wa gumagana hakatshi dia nguasa ya ufumu nu hakatshi dia ba sheribe muwana nu hakatshi dia akulu. Mun’a gimeme wene wakhalele nu mbinga sambadi nu meso sambadi. Meso sambadi adi mumonesa nyuma sambadi jia Nzambi jiatumiwe ha mavu agasue.
7 Mun’a gimeme wayile, wazudile rulo yakhalele ha koko dia madia dia Muthu wakhalele ha nguasa ya ufumu.
8 Tangua Mun’a Gimeme wazudile rulo, ba sheribe muwana nu akulu 24 afugamele gutuama dienji. Muthu wagasue mukatshi diawo wakhalele nu gitare.* Akhalele nji nu malonga a wolo a guzala pha nu uhafu.* (Uhafu udi mumonesa isambu ya athu a gijila.)
9 Akhalele muyimba lungimbo luhe-luhe egi: “Aye udi watagana ha guzula rulo nu ha gukangula njimbu jienji, handaga aye washiyiwe, mu njila ya mahatshi aye wasumbile athu a iphuta yagasue, a mazuelelo agasue, a ilema yagasue nu a ifutshi yagasue mukunda nu Nzambi.
10 Aye waabuishile mafumu nu nganga-nzambi mukunda nu Nzambi wetu. Ene adi naye gubua mafumu ha guhinyina mavu.”
11 Ngamonele nu ngavile majui a anjelo avula a gujieta nguasa ya ufumu nu ba sheribe nu akulu. Mutango wawo wakhalele bamilio nu bamilio, inunu yavula ya bamilio,
12 akhalele muzuela mu dijui diakola egi: “Mun’a Gimeme munu washiyiwe udi watagana ha guheta ufumu nu umonyi nu ndunge nu ngolo nu lutumbu nu ginemua nu ishimbigo.”
13 Ngavile ima yagasue yafugiwe mu dilu nu ha mavu nu goshi’a mavu nu mu kianga nu ima yagasue yana khala muene muzuela egi: “Muthu udi ha nguasa ya ufumu nu Mun’a Gimeme ahete ishimbigo nu lutumbu nu ginemua nu ngolo ivo nu ivo.”
14 Ba sheribe muwana azuelele egi: “Amen!” Akulu afugamele nu akombelele.
Mbimbi goshi'a diyiji
^ Mu Greke: “ya gusonega nu mukatshi nu gu mangima.”
^ Tala Ukoteleshi wa Mbimbi.
^ Gima gia gushigila miziki gia mu tangua dikulu. Giakhalele gia gudisha nu gitare gia mangino.
^ Nga “muemue.”
