Gumonesa Gudi Yone 6:1-17
-
Mun’a Gimeme wakangula thomo njimbu samano (1-17)
-
Muthu wabingile udi holu dia gabalu galaphe (1, 2)
-
Muthu udi holu dia gabalu gabenga udi naye gukatula guhuima (3, 4)
-
Muthu udi holu dia gabalu gabuita udi naye gubata nzala (5, 6)
-
Muthu udi holu dia gabalu gawanguluga jina dienji Gufua (7, 8)
-
Athu ashiyiwe adi goshi’a giwotshielo (9-11)
-
Gudigita guakola gua mavu (12-17)
-
6 Ngamonele tangua Mun’a Gimeme wakanguile njimbu ya thomo, ngavile nji sheribe wa thomo mukatshi dia ba sheribe muwana muzuela nu dijui gifua muandu wa mvula egi: “Iza!”
2 Ngatalele, ngamonele gabalu gaphega, muthu wakhalele holu dia gabalu gene wakhalele nu uta wa manana; amuhuile gipho gia ufumu, wazogele gifua muthu wabingi mbalagaji jienji nu ha gujibinga luko uu nu gu gisugishilo.
3 Hakangudile muene njimbu ya ngiadi, ngavile sheribe ya ngiadi muzuela egi: “Iza!”
4 Gabalu gako gazogele, gakhalele gabenga, ahanele muthu wakhalele holu dia gabalu gene ngolo jia gukatula guhuima ha mavu hagula athu adishiye, amuhanele phogo ya khusa yakoma.
5 Hakanguile muene njimbu ya thathu, ngavile sheribe ya thathu muzuela egi: “Iza!” Tangua ngatalele, ngamonele gabalu gabuita, muthu wakhalele holu dia gabalu gene wakhalele nu kilo* ha koko dienji.
6 Ngavile gifua dijui mukatshi dia ba sheribe muwana muzuela egi: “Kilo gimoshi gia ble mukunda nu denye* imoshi; ba kilo thathu a orje mukunda nu denye imoshi; mubolesago maji a olive nu vinyo.”*
7 Hakanguile muene njimbu ya nguana, ngavile dijui dia sheribe wa nguana muzuela egi: “Iza!”
8 Tangua ngatalele, ngamonele gabalu gawanguluga, muthu wakhalele holu dia gabalu gene jina dienji gufua. Malumba* akhalele gumulandula hehi. A ahanele ngolo holu dia gitshinyi gimoshi mukatshi dia itshinyi nguana ya mavu, ha gushiya athu nu phogo ya khusa yaleha, nu nzala nu misongo nu shitu jia mu foto jia ha mavu.
9 Hakanguile muene njimbu ya thano, ngamonele goshi’a giwotshielo, mionyo* ya athu anyi ashiyiwe mukunda nu mbimbi ya Nzambi nu mukunda nu mudimo wa gulongesa akalegele.
10 Athu ene azuelele mu dijui diakola egi: “Fumu Wabalega Gukoma, Nzambi wa gijila nu wa giamatshidia, udi munengena uu nu tangua ditshi ha gusophesa nu ha guvutula gubola mukunda nu mahatshi etu gudi athu adi ha mavu?”
11 Ahanele muthu wagasue mukatshi diawo lopho* dia phega, nu a awambelele ha guhuluguga ndambo uu nu tangua mutango wa ahiga n’ako mbawutagana nu wa aphangi’awo anyi akhalele hehi ha gushiyiwa gifua muashiyiwe ene.
12 Ngamonele hakanguile muene njimbu ya samano, mavu adigitshile mangololo, tangua diabuitshile gifua sagi* yalondewa nu uvuji* wa buita, ngonda* yagasue yabuile gifua mahatshi,
13 themua jia mu dilu jiabuile ha mavu gifua luholo mabundu a figi a gibisu ana bua tangua funji yakola yana nyigisa mutshi wa figi.
14 Dilu diakatugile gifua luholo ana wonga rulo, milundu yagasue nu mahongo agasue akatugile mu mafundo awo.
15 Mafumu a ha mavu, nu ahinyinyi akoma, nu mafumu a masuta, nu enya umonyi, nu enya ngolo, nu ahiga agasue, nu athu agasue ashigo ahiga adisuegele mu mawina a maseso nu mukatshi dia maseso a mu milundu.
16 Alanduile guwambela milundu nu maseso egi: “Tubuilenu nu tusuegenu gu phala ya Muthu udi ha nguasa ya ufumu nu gu khabu jia Mun’a gimeme,
17 handaga lusugu luakoma lua khabu jiawo luaheta. Nanyi wajiya gumagana?”
Mbimbi goshi'a diyiji
^ Nga “gima gia guthesela ima.”
^ Makuta a utadi a enya Roma. akhalele ndando ya lufuto lua lusugu lumoshi lua mudimo.
^ Nga “matombe.”
^ Nga “Hadese,” yakotelesa egi fundo ana funda athu agasue. Tala Ukoteleshi wa Mbimbi.
^ Yajiya gukhala egi idi mumonesa mahatshi awo abunduiwe holu dia giwotshielo. Tala Ukoteleshi wa Mbimbi.
^ Nga “mutuphu.”
^ Nga “ngombo.”
^ Yajiya gukhala uvuji wa khombo
^ Nga “mbeji.”
