Gumonesa Gudi Yone 7:1-17
7 Gungima dia ndaga jiji, ngamonele anjelo nguana mumagana gu songi nguana jia mavu, akhalele mukuata funji nguana jia mavu, hagula nga funji imoshi ibundigo ha mavu, nga mu kianga, nga gu mutshi umoshi.
2 Ngamonele muanjelo muko mukanduga gu khanda ya mazogelo a kumbi, wakhalele nu gima gia guhagela athu njimbu giamuhanele Nzambi wa monyo. Wazuelele mu dijui diakola gudi anjelo nguana anyi ahanewe ngolo jia guzangela mavu nu kianga
3 egi: “Mubolesago mavu, nga kianga, nga mitshi uu nu tangua mbatuhaga njimbu ha mbombo jia ahiga a Nzambi wetu.”
4 Ngavile mutango wa athu ahagewe njimbu, akhalele 144 000 a mu iphuta yagasue ya ana a Isalele:
5 Mu giphuta gia Yuda athu 12 000 ahagewe njimbu;mu giphuta gia Lubene athu 12 000;mu giphuta gia Gade athu 12 000;
6 Mu giphuta gia Asele athu 12 000;mu giphuta gia Nefetali athu 12 000;mu giphuta gia Manase athu 12 000;
7 mu giphuta gia Simeone athu 12 000;mu giphuta gia Levi athu 12 000;mu giphuta gia Yisakale athu 12 000;
8 mu giphuta gia Zabulona athu 12 000;mu giphuta gia Yozefe athu 12 000;mu giphuta gia Benyamine athu 12 000 ahagewe njimbu.
9 Gungima dia ndaga eji, ngamonele thundu yakoma ya athu, inyi nga muthu mumoshi gajiyilego gutanga; athu a ifutshi yagasue, a iphuta yagasue, a ilema ya muila ya gudisha nu a mazuelelo agasue akhalele agumagana gutuama dia nguasa ya ufumu nu gutuama dia Mun’a Gimeme agusudiga malopho alaphe, akhalele nu mandalala a samba ha mago awo.
10 Ene akhalele mulandula guzuela mu dijui diakola egi: “Guhuluga guakatuga gudi Nzambi wetu udi ha nguasa ya ufumu nu gudi Mun’a Gimeme.”
11 Anjelo agasue akhalele agujieta nguasa ya ufumu nu akulu nu ba sheribe muwana, afugamele phala mu mavu gutuama dia nguasa ya ufumu nu akombelele Nzambi,
12 azuelele egi: “Amen! Nzambi wetu udi nu ndunge nu ufumu nu ngolo atumbuishiwe nu anemesewe, muthu wagasue udi naye gumuhana mersi ivo nu ivo. Amen.”
13 Mukulu mumoshi wanguhudile egi: “Athu wawa adi agusudiga malopho alaphe adi akuatshi nu akatuga gui?”
14 Ngamuvutudile mbala imoshi egi: “Fumu aye udi mujiya.” Muene wanguwambelele egi: “Ene adi athu akatuga mu lamba diakola, awevele malopho awo nu a aphelegetesele nu mahatshi a Mun’a Gimeme.
15 Gishina giene adi gutuama dia nguasa ya ufumu ya Nzambi, adi gumukalegela mudimo wa gijila phipha nu muanya mu tempelo yenji. Muthu udi wa gukhala ha nguasa ya ufumu mbawaatshuiga tenta yenji.
16 Ene mbaashigo luko muvua nzala nga luhungu, muanya nu kiza giabala mbagishigo guasagesa nga hazonda,
17 handaga Mun’a Gimeme munu udi hakatshi dia nguasa ya ufumu mbawukhala mubambi wawo nu mbawaatuameza gu ito* ya meya a monyo. Nzambi mbawukukumuna masoji agasue gu meso awo.”
Mbimbi goshi'a diyiji
^ Nga “mididi.”
