Gumonesa Gudi Yone 9:1-21
9 Muanjelo wa thano washigile phungi yenji. Ngamonele themua yakatugile mu dilu yabua hashi. Ayihanele* saphi jia wina dishigo nu gisugishilo.
2 Themua yene yakangudile* wina dishigo nu gisugishilo, mishi yazogele mu wina diene gifua mishi ya jigo diakoma dia tshuya. Kumbi nu muhehe wabuile phipha mukunda nu mishi ya wina diene.
3 Matulu azogele mu mishi yene, amuanganele ha mavu. A ahuile ngolo gifua ngolo jiana khala najio tuminyi-minyi tua ha mavu.
4 A awambelele egi abolesago muangu wa ha mavu nga mayiji ako nga mitshi, uvi asagese phamba athu anyi ashigo nu njimbu ya Nzambi ha mbombo jiawo.
5 Ahanelego matulu ene ngolo ha gushiya athu, uvi ha guasagesa mbeji thano. Lamba akhalele muhana athu diakhalele gifua lamba diana vua muthu gula gaminyi-minyi gamusuma.
6 Mu masugu ene athu mbaakamba gufua, uvi mbaashigo gugumona nga hazonda, athu mbaatshigina gawo gufua, uvi gufua mbagualenga.
7 Matulu ene akhalele mumonega gifua tubalu tualondewa ha guya mulua ita; akhalele nu ima imoshi yakhalele mumonega gifua ifulu ya ufumu ya wolo holu dia mito yawo, phala jiawo jiakhalele mumonega gifua phala jia athu,
8 akhalele nu sanga gifua masanga a akhetu, mazo awo akhalele gifua mazo a khoshi,
9 akhalele nu tuzagu tua ita gifua tuzagu tua ita tualondewe nu utadi. Matululu a mahambu awo akhalele gifua matululu a phusu-phusu jidi munanewa gudi tubalu tudi muya gu ita.
10 Akhalele nji nu mikila ya songi gifua ya tuminyi-minyi. Gu mikila yawo, guene gudi ngolo jiawo ha gusagesa athu mbeji thano.
11 Adi nu fumu, fumu muene udi muanjelo wa wina ushigo nu gisugishilo. Mu Hebelu ana gumutamega egi Abadona,* uvi mu Greke ana gumutamega egi Apoliyona.*
12 Lamba phamba dimoshi diabalega gale. Tegelela! Malamba ako mbadi adi muza gungima dia ndaga eji.
13 Muanjelo wa samano washigile phungi yenji. Ngavile dijui mukatuga mu mbinga jia giwotshielo gia wolo gidi gutuama dia Nzambi.
14 Dijui diene diawambelele muanjelo wa samano wakhalele nu phungi egi: “Jitulula anjelo nguana adi agujitshiga gu muta wakoma wa Efrata.”
15 Anjelo nguana anyi abambewe* mukunda nu tangua nu lusugu nu mbeji nu givo ajituluiwe ha gushiya gitshinyi gimoshi mukatshi dia itshinyi thathu ya athu.
16 Mutango wa masuta akhalele muwenda holu dia tubalu wakhalele 200 000 000; ngavile mutango wawo.
17 Lulu luholo ngamonele tubalu mu vizio nu athu akhalele holu. Athu ene akhalele agusudiga tuzagu tua ita tuabenga gifua tshuya, tua ble nu tula maji-maji gifua sufre. Mito ya tubalu yakhalele gifua mito ya khoshi. Tshuya nu mishi nu sufre yakhalele muzoga mu makano a tubalu tuene.
18 Gitshinyi gimoshi mukatshi dia itshinyi thathu ya athu giashiyiwe gu ndola eji thathu: Gu tshuya, gu mishi nu gu sufre yakhalele muzoga mu makano a tubalu.
19 Handaga ngolo jia tubalu jidi mu makano enji nu mu mikila yenji. Mikila yenji idi gifua nyoga, idi nu mito, tuana sagesa athu nu mito yene.
20 Uvi athu anyi ashiyiwego gu ndola eji abalumuinego mutshima gu midimo ya mago awo. Abembele ndo gukombelela bademo, nu isongo ya wolo, nu ya utadi wa siliva, nu ya kuivre, nu ya maseso, nu ya mitshi, inyi yajiyilego gumona nga guvua nga guwenda.
21 Abalumuinego mutshima mu khadilo diawo dia gushiya athu nu mu midimo yawo ya phipha nu mu uthambi* wawo nu mu unzangi wawo.
Mbimbi goshi'a diyiji
^ Nga “amuhanele.”
^ Nga “wakangudile.”
^ Yakotelesa egi: “Gushiya nga Gubolesa.”
^ Yakotelesa “Mushiyi nga Muboleshi.”
^ Nga “alondewe.”
^ Mu Greke: porneya. Tala Ukoteleshi wa Mbimbi.
