Guzoga 15:1-27
15 Mu tangua diene, Moize nu enya Isalele ayimbile lungimbo elu mukunda nu Yehowa egi:
“Mbanguyimbila Yehowa, handaga lukuma luenji luajiyiwa muavula.
Wabishidile tubalu nu awendeshi a tubalu tuene mu kianga.
2 Yah* udi ngolo jiami handaga wanguhuluisa.
Muene Nzambi wami, mbangumutumbuisa; Nzambi wa akhakh’ami, mbangumunemesa.
3 Yehowa udi mului wakola wa ita. Jina dienji Yehowa.
4 Muene wabishidile phusu-phusu jia Farao nu masuta enji mu kianga,Masuta enji abalega ngolo afuile mu Kianga Giabenga.
5 Meya adi muhuhua a atshuigile; ashiwugile uu nu hashi mu meya gifua seso.
6 Oo Yehowa, koko diaye dia madia didi nu ngolo jiavula diago;Oo Yehowa, koko diaye dia madia diajiya gutshiongonona mbalagaji.
7 Mu ngolo jiaye jiavula, wajiya gubinga mbalagaji jiaye;Khabu jiaye jidi gifua tshuya, jiana guakonda gifua muangu.
8 Aye wafujile muhehe waye, meya adibungishile fundo dimoshi;Amaganele gifua gibayi;Meya anyi akhalele muhuhua, adikuatele gifua seso hakatshi dia kianga.
9 Mbalagaji wazuelele egi: ‘Mbangualandula! Mbanguakuata!
Mbanguatambula umonyi wawo, mbanguatambula ima yagasue ngatshigina!
Mbanguhomona phogo yami ya khusa! Mbanguashiya!’
10 Watumine muhehe waye, kianga giaatshuigile;Ashiwugile gifua utadi wanema mu muta wakoma.
11 Oo Yehowa, nzambi mutshi udi gifua aye?
Aye wana monesa diago egi udi Nzambi wa gijila, nanyi udi gifua aye?
Aye tudi naye guvuila woma nu gutumbuisa nu ngimbo handaga wana kalagala ndaga jia gushimana.
12 Wasunuine koko diaye dia madia, mavu a aminyine.
13 Mu guzumba guaye gua giamatshidia, watuamezele athu wasumbile;Mu ngolo jiaye, mbawatuameza ha fundo diaye dia gijila.
14 Athu mbaavua ndaga yene, mbaadigita;Woma wakola* mbawukuata enya Filistiya.
15 Mu tangua diene, mafumu a iphuta ya enya Edome mbaavua woma wakola,Mafumu a ngolo* a enya Moaba mbaadigita.
Athu agasue a gu Kanana mbaaleba muila.
16 Ene mbaavua woma, mbaadigita mangololo.
Oo Yehowa, mukunda nu ngolo jia koko diaye, ene mbaasala agumagana gifua sesoUu nu tangua athu aye mbaabalega,Uu nu tangua athu wafugile mbaabalega.
17 Aye mbawatuameza ha gukhala ha mulundu waye,*Fundo walondele hagula ukhale, Oo Yehowa,Fundo dia gijila walondele nu mago aye, Oo Yehowa.
18 Yehowa mbawuhinyina ivo nu ivo.
19 Tangua tubalu tua Farao nu phusu-phusu jienji jia ita nu masuta enji akhalele muwenda holu dia tubalu anginyile mu kianga,Yehowa wavutuile meya a mu kianga, a atshuigile,Uvi enya Isalele awendele ha mavu a gimigina mukatshi dia kianga.”
20 Gungima profete* Miriame, phangi’a Alona, wazanguile gangoma ha mago, akhetu agasue amulanduile, akhalele mushiga tungoma nu gukina.
21 Ha guhana mala mvutu, Miriame wayimbile egi:
“Yimbilenu Yehowa handaga waditumbuisa muavula.
Wabishila gabalu nu muwendeshi wago mu kianga.”
22 Gungima Moize watuamezele enya Isalele, akatugile gu Kianga Giabenga, ayile mu mavu a luselenga a Shule. Awendele masugu thathu mu mavu a luselenga, uvi amonelego meya.
23 Ahetele gu Mara,* uvi anuilego meya a Mara handaga akhalele alula. Hene fundo diene diatamegewe egi Mara.
24 Hene enya Isalele akhalele muzuela ndaga jiabola mukunda nu Moize egi: “Itshi tunua giwa?”
25 Moize wabubidile Yehowa, Yehowa wamulezele mutshi umoshi. Moize wambile mutshi wene mu meya, gungima meya ene abongele.
Hakhalele ene gu Mara, Nzambi waahanele mukhuala, waawambelele nji ndaga adi naye gukalagala. Wakhalele mutshigina gujiya ndaga jiakhalele mu mitshima yawo.
26 Wazuelele egi: “Gula muategelela mbimbi ya Yehowa Nzambi wenu, muakalagala ndaga jidi jiabonga gu meso enji, gula mualandula nji muabonga mikhuala yenji, muayitumagela yagasue, mbangushigo gumihana nga ndola imoshi ya misongo gifua inyi ngahanele enya Ejipitu handaga ame Yehowa ngudi gumisaga.”
27 Gungima ahetele gu Elima. Fundo diene diakhalele nu tu ito tua mita 12 nu samba 70. Atungile phundo yawo guene, hehi nu meya.
Mbimbi goshi'a diyiji
^ Yah idi jina dia Yehowa mu guhihia.
^ Mu Hebelu: “misongo ya guvuala.”
^ Nga “mafumu a shidi, a khuta.”
^ Mu Hebelu: “mulundu wa khapho diaye.”
^ Yakotelesa egi: profete wa mukhetu.
^ Yakotelesa egi: “Gulula.”
