Guzoga 4:1-31
4 Uvi Moize wawambelele Nzambi egi: “Henyaha itshi mbangukalagala gula ene atuna gawo gungutegelela, nga ndo atuna guvua mbimbi yami, handaga mbaazuela egi, ‘Yehowa gamonegelego gudi aye.’”
2 Yehowa wamuwambelele egi: “Itshi udi nayo ha mago?” Muene wamuvutudile egi: “Ngudi nu muhango.”
3 Nzambi wamuwambelele egi: “Umbe hashi.” Moize wawumbile hashi, muhango wene wabuile nyoga. Gungima walengele nyoga yene.
4 Uvi Yehowa wawambelele Moize egi: “Sununa koko diaye uyikuate gu ngonzo.” Moize wasunuine koko dienji, wayikuatele, nyoga yene yabalumugile luko muhango ha koko dienji.
5 Gungima Nzambi wamuwambelele egi: “Tshita ngenyi hagula enya Isalele atshigine egi Yehowa Nzambi wa akhakh’awo, Nzambi wa Abalahama, Nzambi wa Izake nu Nzambi wa Yakoba wamonega gudi aye.”
6 Yehowa wamuwambelele luko egi: “Nginyisa koko diaye moshi’a mulele waye wa holu.” Moize wanginyishile koko dienji moshi’a mulele. Hazolele muene koko diene, diakhalele dia guzala nu hute, diabuile diaphelegeta gifua neje!
7 Gungima wamuwambelele egi: “Vutula koko diaye moshi’a mulele waye wa holu.” Moize wavutudile koko dienji moshi’a mulele. Hazolele muene koko diene, diakhalelego luko nu hute, diavutugile gifua luholo diakhalele thomo!
8 Nzambi wazuelele egi: “Gula ene atuna gugutegelela nga ndo atshiginyilego ndaga ya thomo ya gushimana mbawukalagala, mbaagutshigina diago mukunda nu ndaga ya mbadi mbawutshita.
9 Uvi gula ene atshiginyilego mukunda nu ndaga mbadi jia gushimana mbawukalagala nu atuna gugutegelela, mbawuzula meya mu muta wa Nile ha guabundula mu mavu a gimigina. Meya ene mbaabalumuga mahatshi mu mavu.
10 Moize wawambelele Yehowa egi: “Ngabuba Yehowa, sendese mualeha uu nu henyaha udi muzuela nu muenya mudimo waye, ngana khalago nu ludimi lua leluga.* Ngana gukukuma, ngudi nji nu ludimi luanema.”
11 Yehowa wamuvutudile egi: “Nanyi wahanele muthu kano? Nanyi wana buisa muthu gatabu* nga gifua matshui nga gifofo? Nanyi wana kuatesa muthu ha gumona muabonga? Ishigo ame Yehowa ba?
12 Henyaha nda, mbangukhala n’aye tangua mbawuzuela.* Mbangugulongesa nji ndaga udi naye guzuela.”
13 Uvi Moize wazuelele egi: “Ngabuba Yehowa, tuma gaye muthu muko yonu watshigina gutuma.”
14 Yehowa wavidile Moize khabu, wamuwambelele egi: “Phangi’aye Alona muenya Levi gashigo guene ba? Ngudi mujiya egi wana zuela muabonga. Henyaha udi mu njila, udi muza ha gugutagana. Tangua mbaagumona, mbawusuanguluga.
15 Udi naye gumuwambela ndaga jidi naye guzuela muene. Mbangukhala nu aye nu phangi’aye tangua mbamuzuela. Mbangumilongesa ndaga mudi naye gukalagala.
16 Muene mbawuzuela nu athu ha fundo diaye. Mbawukhala muzueledi waye, uvi aye mbawukhala gifua Nzambi wenji.*
17 Mbawuzangula muhango owu ha koko diaye, mbawugukuatesa ha gukalagala ndaga jia gushimana.”
18 Hene Moize wavutugile gudi giwaji gienji Yetro, wamuwambelele egi: “Ngudi mutshigina guvutuga gu Ejipitu ha gujiya gula aphangi’ami adi guene awa gawo nu monyo.” Yetro wamuvutudile egi: “Nda mu guhuima.”
19 Gungima Yehowa wawambelele Moize gu Madiana egi: “Vutuga gu Ejipitu handaga athu agasue anyi akhalele mukamba gugushiya,* afile gale.”
20 Moize wazanguile mukaji’enji nu an’enji a mala, waanginyishile ha phunda, asendesele guvutuga gu Ejipitu. Wazanguile nji muhango wa Nzambi wa giamatshidia ha koko dienji.
21 Gungima, Yehowa wawambelele Moize egi: “Tangua mbawuvutuga gu Ejipitu, tshita yagasue ha gukalagala ndaga jiagasue jia gushimana ngaguhanele ngolo ha gutshita gutuama dia Farao. Uvi ame mbangukolesa mutshima wenji hagula gabembigo enya Isalele ha guya.
22 Udi naye guwambela Farao egi, ‘Yehowa udi muzuela egi: “Isalele udi mun’ami wa somi.
23 Ngudi guguwambela egi bemba mun’ami hagula aye angukombelele. Uvi gula watuna gumubemba, mbangushiya mun’aye wa somi.”’”
24 Hakhalele ene mu njila ha fundo diabandele ene, Yehowa wajile ha gumutagana, wakhalele mutshigina gumushiya.
25 Uvi Sefora wazanguile gaseso ga mazo,* wambile mun’enji wa yala gu mukanda. Watshitshile yagasue hagula gilema gia muila wa uyala wa mun’enji gikuate malu enji. Gungima wazuelele egi: “Ngatshita ngenyi handaga udi mulumi’ami wa mahatshi.”
26 Hene Nzambi wamubembele. Sefora wazuelele egi “mulumi’ami wa mahatshi,” handaga wambile mun’enji gu mukanda mu tangua dinyi.
27 Gungima Yehowa wawambelele Alona egi: “Nda mu mavu a luselenga ha gutagana nu Moize.” Hene Alona wayile, wataganele nu Moize gu mulundu wa Nzambi wa giamatshidia, wamuhanele beze ha gumumenega.
28 Moize wawambelele Alona ndaga jiagasue jiamulezele Yehowa, yago wamutumine. Wamuwambelele nji ndaga jiagasue jia gushimana jiamulezele Nzambi ha gukalagala.
29 Gungima, Moize nu Alona ayile, abungishile akulu agasue a enya Isalele.
30 Alona wawambelele akulu ndaga jiagasue Yehowa wawambelele Moize. Gungima, wakalegele ndaga jia gushimana gutuama dia enya Isalele.
31 Enya Isalele atshiginyile ndaga jiazuelele Moize. Tangua avile egi Yehowa wakhalele gudisagesa mukunda nu ene nu wamonele malamba awo, afugamele, ashiwugile phala mu mavu.
Mbimbi goshi'a diyiji
^ Mu Hebelu: “ngana khala nu kano dianema.”
^ Nga “mbobo.”
^ Mu Hebelu: “mbangukhala nu kano diaye.”
^ Nga “mbawukhala mumoneshi wa Nzambi mukunda nu muene.”
^ Nga “akhalele mukamba monyo waye.”
^ Nga “gaphogo ga seso.”
