Gudi Enya Hebelu 1:1-14
1 Mu tangua dikulu Nzambi wakhalele muzuela nu akhakh’etu mbala jiavula nu mu maluholo avula mu njila ya baprofete.
2 Uvi gu gisugishilo gia masugu awa, wazuelele nu esue mu njila ya Mona watombewe ha guhinyina ima yagasue. Ima* yagasue gosa nu hashi yafugiwe mu njila yenji.
3 Muene wana monesa lutumbu lua Nzambi, udi diago mumoneshi watagana wa umuthu wa Nzambi, wana kuata ima yagasue nu ngolo jia mbimbi yenji. Watuphelegetesele mu gubola guetu, gungima wakhalele gu koko dia madia dia Fumu wakoma mu dilu.
4 Muene wabuile nu ndando yavula gubalega anjelo, hene amuhanele jina diabonga gubalega majina a anjelo ako.
5 Ha gufezegesa, gudi nga nu muanjelo mumoshi Nzambi gawambelele gale egi: “Aye udi mun’ami; mangino ame ngabua sh’aye”? Nga ndo egi: “Ame mbangukhala sh’enji, muene mbawubua mun’ami”?
6 Uvi tangua diatuma muene luko Mun’enji wa Somi ha mavu, udi muzuela egi: “ Anjelo agasue a Nzambi amufugamele.”
7 Mukunda nu anjelo muene udi muzuela egi: “Watumile anjelo enji gifua nyuma, enya mudimo wenji waatumile gifua dimi dia tshuya.”
8 Uvi mukunda nu Mona, muene udi muzuela egi: “Nzambi udi nguasa yaye ya ufumu ivo nu ivo. Muhango waye wa Ufumu udi muhango wana kalagala ndaga mu luholo luabonga.*
9 Aye wazumbile gutshita ndaga jiabonga, watunyile gushiya mukhuala. Gishina giene, Nzambi waye wagumbile maji a gusuanguluga gubalega mafumu ako.”*
10 Udi muzuela luko egi: “Fumu, mu gisendeselo aye wahagele fondasio jia mavu, dilu diana khala midimo ya mago aye.
11 Dilu nu mavu mbaafua, uvi aye mbawusala; ima eyi yagasue mbayibola gifua muana bola mulele.
12 Mbawuyiwonga gifua luholo ana wonga mulele nu mbayisombegesa. Uvi aye ushigo musombegesa, ivo yaye ishigo nu gisugishilo.”
13 Uvi gudi nga nu muanjelo mumoshi Nzambi wawambelele gale egi: “Khala gu koko diami dia madia uu nu tangua mbanguhaga mbalagaji jiaye goshi’a ikanzo yaye” ba?
14 Anjelo* ashigo guene mukunda nu mudimo wa gijila ba? Ene atumiwego ha gukalagala mudimo mukunda nu athu anyi mbahuluishiwa ba?
Mbimbi goshi'a diyiji
^ Nga “ulondegi wa ima.” Tala mbimbi ‘Gindongo’ ha Ukoteleshi wa Mbimbi.
^ Nga “mu luholo luatagana.”
^ Yakotelesa egi: mafumu ako a mu giphuta gia Davidi.
^ Mu Greke: “nyuma; pneuma.”
