Gudi Enya Hebelu 11:1-40
11 Gutshigina gudi guhaga mutshima egi ndaga tuana gudifelela jidi jia diago, gudi gijiyishilo gia ndaga jia giamatshidia jinyi jianago gumonega.
2 Mukunda nu gutshigina gua luholo elu, Nzambi wasuangulugile nu athu a mu tangua dikulu.*
3 Mukunda nu gutshigina, tudi mukotelesa egi ima idi mu dilu nu idi ha mavu* yalondewe mu njila ya mbimbi ya Nzambi, nu ima tuana mona yafugiwe mu njila ya ima inyi tuanago gumona.
4 Mukunda nu gutshigina, Abele wahanele Nzambi mulambu wa ndando yavula gubalega wa Gayino. Mukunda nu gutshigina guene, Nzambi wamutamegele egi muthu wabonga nu watshiginyile nji milambu yenji. Ngatshima Abele wafile gale, muene wana landula guzuela mu njila ya gutshigina guenji.
5 Mukunda nu gutshigina, Henoke wakatudiwe hagula gamonyigo lamba dia gufua. Muene gamonewego nga fundo dimoshi handaga Nzambi wamukatudile. Gutuama egi akatudiwe, Nzambi wamonesele egi wakhalele musuanguluga n’enji.
6 Gula muthu gashigo nu gutshigina, gajiyilego gusuanguluisa Nzambi. Handaga muthu wana suena gudi Nzambi udi naye gutshigina egi muene udi guene nu wana hana lufuto gudi athu ana gumukamba nu mutshima umoshi.
7 Mukunda nu gutshigina, tangua Nzambi watemesele Nowa mukunda nu ndaga jiakhalele khenji jimonega ndo, Nowa wavidile Nzambi woma, watungile masuwa ha guhuluisa enya fami yenji. Mukunda nu gutshigina guene, muene wafuishile mavu milonga. Watamegewe egi muthu wabonga mukunda nu gutshigina guenji.
8 Mukunda nu gutshigina, Abalahama watumagele tangua diamutamegele Nzambi, wazogele ha guya fundo diamutendelele Nzambi ha gumuhana. Wayile ngatshima gakhalelego mujiya fundo diakhalele muya muene.
9 Mukunda nu gutshigina, muene wayile mukhala gifua ngenji gu mavu a gutendelela. Wakhalele mujinga mu jinzo jia tenta nu Isaka nu Yakoba. Mukut’awo agasue Nzambi waahanele laji dia luholo lumoshi.
10 Handaga muene wakhalele munengena dimbo didi nu fondasio jia diago. Mulondi nu mutungi wa dimbo diene udi Nzambi.
11 Mukunda nu gutshigina nji, Sara wamitshile vumo* ngatshima wakhalele wabalegesa gale ivo ya guvuala, handaga muene wakhalele mujiya egi Muthu wahanele laji diene wana tagenesa mbimbi jienji.*
12 Gishina giene, muthu mumoshi yago wakhalele gifua muthu wa gufua wavualele ana avula gifua themua mu dilu. Ana ene adi gifua ishegele gu khulo ya muta inyi yajiyiwego gutangewa.
13 Athu awa agasue afile akhalele nu gutshigina ngatshima amonelego gutagenesewa gua mafelela. Uvi a amonele gualeha nu asuangulugile nawo. Azuelele ha meso a athu agasue egi adi ngenji nu adi mukunda nu tangua diazonda mu mavu ene.
14 Handaga athu ana zuela luholo elu, ana monegesa diago haphelo egi adi mukamba fundo diawo hakhawo.
15 Gula nga akhalele mutangiza fundo diakatugile ene, akhalele naye gukamba luholo lua guvutuga.
16 Uvi henyaha ene adi gudifelela fundo diabonga, fundo diene didi mu dilu. Nzambi gashigo muvua musonyi mukunda nu ene ha gutamegewa egi Nzambi wawo, handaga muene waalondele gale dimbo.
17 Mukunda nu gutshigina, tangua dialolewe Abalahama ha guhana mun’enji Isaka gifua mulambu, muthu yowu wahetele mafelela nu gusuanguluga guagasue, wakhalele hehi ha guhana mun’enji mumoshi’a mumoshi.
18 Uvi akhalele amuwambela gale egi: “Isaka mbawuvuala ajigulu* aye.”
19 Abalahama washile mutshima egi Nzambi wakhalele nu ngolo jia gufuzumuna mun’enji mu gufua. Hene, Nzambi wahuluishile mun’enji mu gufua. Yakhalele gifezegeselo gia ndaga mbayikalegewa mu masugu adi muza.
20 Mukunda nu gutshigina, Isaka nji wazuelele ndaga jiabonga mukunda nu Yakoba nu Esau jiatadila masugu adi muza.
21 Mukunda nu gutshigina, hakhalele Yakoba hehi nu gufua, wazuelele ndaga jiabonga mukunda nu ana mala a Yozefe. Wakombelele Nzambi hakhalele muene ya guzegemena gu songi ya muhango wenji.
22 Mukunda nu gutshigina, hakhalele Yozefe hehi nu gufua, wazuelele ndaga* yatadila guzoga gua enya Isalele. Waawambelele ndaga akhalele naye gutshita mukunda nu ifiya yenji.*
23 Mukunda nu gutshigina, tangua diavualewe Moize, mvuaji jienji jiamusuegele mbeji thathu, handaga amonele egi mona muene wakhalele wabonga. Avilego woma wa mukhuala wahagele fumu.
24 Mukunda nu gutshigina, hakudile Moize, watunyile ha gutamegewa egi mujigulu wa Farao.*
25 Watombele ha gumona lamba hamoshi nu athu a Nzambi, hafundo dia gusuanguluga tangua diazonda mu ndaga jiabola,
26 handaga wamonele egi guseguluishiwa gifua Klisto idi umonyi wabalega wa gu Ejipitu. Wahagele meso enji phamba gu lufuto.
27 Mukunda nu gutshigina, wakatugile gu Ejipitu, uvi gavilego woma mukunda nu khabu jia fumu. Walanduile gukolesela gifua wakhalele mumona Muthu yonu ganago gumonega.
28 Mukunda nu gutshigina, muene wakalegele Wano wa Pake, wakungile mahatshi ha mifulo hagula muanjelo wa Nzambi gashiyigo an’awo a somi.
29 Mukunda nu gutshigina, ene azawugile Kianga Giabenga gifua mu mavu a gimigina. Uvi tangua enya Ejipitu anginyile, ashiwugile mu muta.
30 Mukunda nu gutshigina, ibayi ya Yeliko yabuile tangua athu ayijietele masugu sambadi.
31 Mukunda nu gutshigina, Lahaba mukhetu wa thambi, gafilego hamoshi nu athu alumbugile Nzambi, handaga wayambele nu gisemo athu ayile mutala dimbo mu gisuegi.
32 Itshi ngajiya guzuela luko? Handaga tangua dishigo guene ha guzuelela ndaga yatadila Gideona nu Balaka nu Samsona nu Yefeta nu Davidi nu Samuele nu baprofete ako.
33 Mukunda nu gutshigina, ene abingile ma ufumu, akalegele ndaga jiabonga, ahetele malaji atendelele Nzambi nu akangele makano a khoshi.
34 Ajimile tshuya tuakola, alengele hagula ashiyiwago gu phogo ya khusa, abuishiwe enya ngolo ngatshima akhalele athu aleba, abuile nu ngolo mu ita, abingile masuta avula.
35 Akhetu afuishile akuaku’awo adimonele luko nawo tangua afuzumugile. Uvi mala ako amonesewe lamba handaga abembelego gutshigina guawo hagula ahuluishiwe. Akalegele ngenyi hagula mbaafuzumuiwe mu luholo luabonga.
36 Ako ataganele nu malamba tangua athu akhalele gualela nu akhalele guabeta fimbo. Ajitshigiwe malenge nu ambiwe mu bologo.
37 Asonewe maseso, alolele gutshigina guawo, abatuiwe itshinyi mbadi* nu si, ashiyiwe nu phogo ya khusa, asudigile ibanda ya imeme nu ya khombo ha guya nu guwenda naye tangua akhalele nu funu ya ukuateshi, mu lamba, nu akhalele musagesewa.
38 Mavu akhalelego atagana mukunda nu athu ene, akhalele muwungagana mu mavu a luselenga, mu milundu, mu mawina a jiseso nu mu mawina a mu mavu.
39 Athu awa agasue, ngatshima Nzambi wamonesele egi wakhalele musuanguluga nawo mukunda nu gutshigina guawo, ahetelego ndaga jiaatendelele Nzambi,
40 handaga Nzambi wadiangele gutulondela ndaga yabalega gubonga, hagula ene abuishiwago atagana gula esue tushigo nawo.
Mbimbi goshi'a diyiji
^ Nga “akhakh’etu.”
^ Nga ‘ndonga ya ima.’ Tala mbimbi ‘Gindongo egi’ mu Ukoteleshi wa Mbimbi.
^ Nga “wahetele ngolo jia gumita vumo dia guvuala ajigulu.”
^ Nga “wana shiwa mutshima.”
^ Mu Greke: “vungu.”
^ Nga “waahanele mukhuala.”
^ Nga “gufundiwa guenji.”
^ Nga “Mun’a mona mukhetu wa Farao.”
^ Nga “a abatudile ha katshi na katshi.”
