Gudi Enya Hebelu 12:1-29
12 Hene, luholo tudi ya gujietewa gudi matemue avula adi gifua tuta diakoma, tubembenu ginemo giagasue nu disumu diana gutukanga njila muphushi, tukoleselenu mu phushi tudi naye guzula jinyi jiahagewa gutuama dietu,
2 hatudi muhaga meso etu gudi Yesu, handaga muene udi Mutuameji, muene wana tshita egi gutshigina guetu gukhale guatagana. Mukunda nu gusuanguluga guakhalele gutuama dienji, wakolesele ha mutshi wa lamba,* watshiginyile egi ahanewe musonyi. Henyaha udi ya gukhala gu koko dia madia dia nguasa ya ufumu ya Nzambi.
3 Hagula mulebigo muila nu mubembigo, tangizenu muabonga gifezegeselo gia muthu munu wakolesele mu ndaga jiabola jiakhalele muzuela enya gubola mukunda nu muene. Hatshitshile ene ngenyi, adifuishile milonga ene hakhawo.
4 Mu gulua guenu mukunda nu disumu diene, khenji mulua galego uu nu hazoga mahatshi enu.
5 Muajimbidile gale diago longo diamihanele Nzambi gifua an’enji egi: “Mun’ami, usegululago ndola idi guguhana Yehowa, ulebigo muila gula wagubalela,
6 handaga Yehowa wana hana ndola gudi athu ana zumba muene. Wana khuphula muthu wagasue wana zula muene gifua mun’enji.”
7 Koleselenu mu malamba mudi mutagana nawo, atadilenu gifua ndola* adi gumihana. Nzambi wana gumizula gifua an’enji. Mona mutshi wanago guhanewa ndola gudi sh’enji?
8 Uvi gula enue muahanewego ndola eyi gifua athu ako, mushigo diago an’enji, uvi mudi ana a muthu muko.
9 Mvuaji jietu jiatuvualele jiakhalele nji gutuhana ndola, uvi tuakhalele guanemesa. Esue tushigo naye nji gutumagela Tata wana tuameza monyo wetu nu nyuma yenji nu wana tshita egi tukhale nu monyo ba?
10 Handaga ene akhalele gutuhana ndola mukunda nu tangua diazonda mu gudivua nu ndaga jiakhalele ene mumona egi jidi jiabonga. Uvi Nzambi wana gutuhana ndola mukunda nu gubonga guetu hagula tubue athu a gijila gifua muene.
11 Yadiago, gula muthu wahanewa ndola, yana khalago ndaga ya gusuanguluga mu tangua diene, uvi yana hana lamba.* Gungima, muthu wana hanewa ndola wana heta guhuima nu wana khala muabonga mu monyo wenji.
12 Hene, kolesenu mago anyi adi a guhuila nu mabongo anyi adi aleba.
13 Landulenu guwenda mu njila yabonga hagula malu adi musumbuta akhakhugago, uvi akole.
14 Landulenu gukhala mu guhuima nu athu agasue, khalenu nji athu a gijila, gula ndo gushigo nu muthu mbawumona Fumu.
15 Temenu hagula muthu wagasue ahete khenda jiavula jia Nzambi. Ngenyi, nga muji umoshi wabola uzogigo ha guzola nguma nu ubuishigo athu avula enya usala.
16 Temenu nji hagula nga muthu mumoshi mukatshi dienu gakhadigo muenya uthambi* nga muthu gashigo munemesa ima ya gijila gifua Esau yago wadigile umbuta wenji mu ima ya gudia.
17 Mudi mujiya egi gungima tangua diakambele muene guheta gishimbigo, amutunyile; ngatshima watshitshile yagasue nu masoji gu meso ha gusombegesa matangi’a sh’enji, uvi gabingilego.
18 Handaga enue muasuenelego hehi nu mulundu unu athu ajiya gukuata udi mulema tshuya, nga nu tuta diabuita nga nu phipha yakola nga nu funji yakola
19 nga nu matululu a phungi nga nu dijui diakhalele muzuela jimbimbi. Tangua athu avile dijui diene, atogele Moize hagula avigo luko nga gima.
20 Handaga akhalele nu woma wa gutumagela mukhuala udi muzuela egi: “lkhale shitu, gula yakanduga holu dia mulundu, idi naye gusonewa maseso.”
21 Ndaga jiamonele ene jiakhalele mukuatesa woma, jiatumile Moize ha guzuela egi: “Ngudi muvua woma, ngudi nji mudigita.”
22 Uvi enue muasuenele hehi nu Mulundu wa Siona, nu Yelusalema ya mu dilu dimbo dia Nzambi wa monyo, nu anjelo avula*
23 agudibungisa, nu gu hungu dia ana a somi adi nu majina a gusonegewa mu dilu, nu Nzambi Nzuji ya athu agasue, nu athu abonga anyi adi mujinga mu gudivua nu nyuma ya Nzambi, anyi abuishiwe athu atagana.
24 Muasuenele nji hehi nu Yesu, mutageneshi wa gikotelo gihe-gihe, nu mahatshi amuangewe adi muzuela muabonga gubalega mahatshi a Abele.
25 Mutunyigo gutegelela muthu udi muzuela. Handaga athu a ha mavu anyi atunyile gutegelela ndaga jiakhalele muzuela Nzambi ahanewe ndola. Esue nji tuajiyilego gulenga ndola nga hazonda, gula tushigo mutegelela muthu udi muzuela mu dilu.
26 Mu tangua diene, dijui dienji dianyigishile mavu. Henyaha udi mulaya egi: “Mu mbala eyi mbangushigo munyigisa phamba mavu, uvi mbangunyigisa nji dilu.”
27 Mbimbi “mu mbala eyi” idi mumonesa egi ima inyi yanyigishiwe, inyi yalondewe, mbayikatudiwa hagula ima inyi yanyigishiwego isale.
28 Hene, luholo tudi naye guheta Ufumu unu wajiyilego gunyigishiwa, tulandulenu guheta khenda jiavula jia Nzambi. Mu njila ya khenda jiene, tuajiya gukalegela Nzambi mudimo wa gijila nu woma nu gudigita, mudimo wajiya gutshigina muene.
29 Handaga Nzambi wetu udi tshuya tuabala tuana gushididisa.
Mbimbi goshi'a diyiji
^ Tala Ukoteleshi wa Mbimbi.
^ Nga “formasio.”
^ Nga “gikenene.”
^ Tala Ukoteleshi wa Mbimbi.
^ Nga “inunu nu inunu.”
