Gudi Enya Hebelu 13:1-25
13 Landulenu gudizumba gifua aphangi.
2 Khalenu nu khadilo dia guyamba,* handaga athu ako akhalele nu khadilo edi ayambele anjelo uvi ajiyilego.
3 Khalenu mutangiza athu adi mu bologo,* gifua mudi mu bologo hamoshi nawo. Khalenu nji mutangiza athu adi mumonesewa lamba, handaga mudi nu muila wa luholo lumoshi nu ene.*
4 Ulo unemesewe gudi athu agasue, gitanda gia ulo gibuishiwago gia usala, handaga Nzambi mbawusophesa athu adi mukalagala uthambi,* ikhale anyi adi undumbu nga anyi adi mu ulo.
5 Mukhadigo muzumba mbongo mu monyo wenu. Suangulugenu nu ima mudi nayo, handaga muene wazuelele egi: “Ame mbangugutunyigo nga hazonda nu mbangugubembigo nga hazonda.”
6 Ngenyi tuajiya guzuela nu gikhesa giagasue egi: “Yehowa udi mukuateshi wami; mbangushigo muvua woma. Itshi muthu wajiya gungutshita?”
7 Tangizenu athu adi gumituameza, anyi amiwambelele mbimbi ya Nzambi. Ha mudi mutadila makalegelo awo abonga, landulenu gifezegeselo gia gutshigina guawo.
8 Yesu Klisto udi luholo lumoshi hamene, mangino nu ivo nu ivo.
9 Muwunganesewago mu malongo a luholo nu luholo, anyi ashigo gudivua nu anyi tuatshiginyile, handaga idi yabonga egi mutshima ukolesewe mu khenda jiavula jia Nzambi, uvi ndo gu ima ya gudia* inyi ishigo mubata gubonga nga gumoshi gudi athu ana gudihana muavula gu ima yene.
10 Tudi nu giwotshielo ginyi athu ana kalagala mudimo wa gijila gu inzo ya tenta ahanewego njila ya gudia ima idi holu dia giwotshielo giene.
11 Gula nganga-nzambi wakoma wangina nu mahatshi a shitu ha fundo dia gijila, ha guhana gifua mulambu wa gutotesela gubola, mila ya shitu jiene yakhalele mumbiwa ha tshuya gonze gualeha nu tenta jia enya Isalele.
12 Gishina giene, Yesu nji wamonele malamba gonze ya dimbo,* hagula mu njila ya mahatshi enji athu abue athu a gijila.
13 Esue nji tuyenu gonze ya dimbo fundo didi muene, tuvishiwe musonyi gifua muavishiwe muene.
14 Handaga haha tushigo nu dimbo diana khala ivo nu ivo, uvi tudi munengena nu nzala yagasue dimbo dinyi mbadiza.
15 Tutumbuisenu Nzambi tangua diagasue mu njila ya Yesu, handaga idi gifua mulambu tudi gumuhana; yakotelesa egi mbimbi jia mu kano dietu jiana longesa jina dienji ha meso a athu agasue.
16 Mujimbilago gutshita ndaga jiabonga nu gukhapha ima mudi nayo nu athu ako, handaga Nzambi wana suanguluga nu milambu ya luholo elu.
17 Khalenu mutumagela athu adi gumituameza, khalenu nji guanemesa, handaga ana gumitadila tangua diagasue nu mbaasophesewa mukunda nu makalegelo awo. Gula mudi guatumagela, ene mbaakalagala mudimo wawo nu gusuanguluga, mbaakhadigo nu gikenene, handaga mbayikhala ndaga yabola mukunda nu enue.
18 Khalenu mukombelela tangua diagasue mukunda nu esue, handaga tudi nu gutshigina egi tudi nu mutshima waphelegeta,* luholo tudi mutshigina gudituameza mu luholo luabonga mu ndaga jiagasue.
19 Uvi ngudi gumitoga ha gusamba muavula hagula ngajiya guvutuga muphushi gudi enue.
20 Nzambi wa guhuima munu wafuzumuile mubambi wakoma wa imeme mu gufua, Fumi’etu Yesu nu mahatshi a gikotelo gia mayilago
21 amihane ima yagasue yabonga ha gukalagala gutshigina guenji. Atutshitshile ndaga idi yabonga gu meso enji mu njila ya Yesu Klisto. Muene atumbuishiwe ivo nu ivo. Amen.
22 Aphangi, ngudi gumitoga ha gutegelela mbimbi jidi muhana gikhesa nu guhuiminyina guagasue, handaga mukanda ngamisonegela udi wahihia.
23 Ngudi mutshigina gumiwambela egi phangi’etu Timote wazolewa gale mu bologo. Gula waza gatshididi, mbanguza n’enji hagula ngumimone.
24 Nguhanelenu lumene gudi athu agasue adi gumituameza nu gudi athu agasue a gijila. Aphangi a gu Italiya amitumila nji lumene.
25 Khenda jiavula jia Nzambi jikhale nu muthu wagasue mukatshi dienu.
Mbimbi goshi'a diyiji
^ Nga “khalenu nu gisemo gudi ngenji.”
^ Mu Greke: “adi agujitshigiwa malenge.”
^ Nga ndo yajiya gukhala egi, “gifua mudi mumonesewa lamba hamoshi nawo.”
^ Tala Ukoteleshi wa Mbimbi.
^ Yakotelesa egi mikhuala yatadila ima ya gudia.
^ Mu Greke: “mufulo.”
^ Mu Greke: “wabonga.”
