Gudi Enya Hebelu 3:1-19
3 Hene, aphangi a gijila enue muatamegewe ha guya mu dilu, hagenu matangi’enu gudi muthu tuatshiginyile gifua mupostolo nu nganga-nzambi wakoma, muthu muene Yesu.
2 Wakhalele ya gujinginyina gudi Muthu wamutombele gifua luholo Moize wakhalele ya gujinginyina gu inzo yagasue ya Nzambi.
3 Wakhalele* watagana ha gukhala nu lutumbu gubalega lua Moize, gifua luholo muthu wana tunga inzo wana khala nu lutumbu luavula gubalega inzo yene.
4 Inzo yagasue yana khala nu muthu wayitungile. Uvi muthu wafugile ima yagasue udi Nzambi.
5 Moize wakhalele muenya mudimo wa gujinginyina mu inzo yagasue ya Nzambi. Mudimo wenji wakhalele gifuanesa gia ndaga jiakhalele naye guzuelewa gungima.
6 Uvi Klisto wakhalele ya gujinginyina gifua mona mu inzo yagasue ya Nzambi. Esue tudi inzo ya Nzambi gula tudi mulandula guzuela woma ndo nu gula tuakuata felela dietu mangololo nu tudi musuanguluga nadio uu nu gu gisugishilo.
7 Gifua luholo nyuma ya Nzambi idi muzuela egi: “Mangino gula muavua dijui dienji,
8 mukolesago mitshima yenu gifua luholo akhakh’enu anguhanele khabu nu angulolele mu mavu a luselenga.
9 Angulolele ngatshima amonele ndaga jia gushimana ngakalegele guene mu ivo 40.
10 Gishina giene ngamonele athu a mu tangua diene gifua gima gia usala gu meso ami. Ngazuelele egi: ‘Tangua diagasue mitshima yawo yana tumagelago ndaga ngana zuela, nu ana jiya ndo njila jiami.’
11 Khabu jiangukuatele, hene ngadilogele egi: ‘Mbaashigo mungina mu guhuluguga guami.’”
12 Aphangi, temenu hagula nga muthu mumoshi mukatshi dienu gakudisago mutshima wabola ushigo nu gutshigina wajiya gumutuma ha gulumbugila Nzambi wa monyo.
13 Uvi landulenu gudihana gikhesa lusugu nu lusugu hatudi mujinga mu masugu awa adi mutamegewa egi “Mangino,” hagula nga muthu mumoshi gakolesago mutshima mu ngolo jia masumu jiana huiga.
14 Mbatuheta gubonga guahetele Klisto gula tuakuata mangololo gutshigina tuakhalele nago gu gisendeselo uu nu gu gisugishilo.
15 Gifua luholo mukanda wa Nzambi udi muzuela egi: “Mangino gula muavua dijui dienji, mukolesago mitshima yenu gifua luholo akhakh’enu anguhanele khabu.”
16 Akhuatshi avuile nu ahanele Nzambi khabu? Yakhalelego athu agasue anyi Moize wazolele gu Ejipitu ba?
17 Akhuatshi Nzambi wamonele gifua gima gia usala mu ivo 40? Yakhalelego athu akalegele masumu, anyi afile mu mavu a luselenga ba?
18 Gudi akhuatshi Nzambi wadilogele egi mbaashigo mungina mu guhuluguga guenji? Ishigo gudi athu amulumbugile ba?
19 Tuamona egi athu anginyilego mu guhuluguga guenji handaga akhalelego nu gutshigina.
Mbimbi goshi'a diyiji
^ Yakotelesa egi: Yesu.
