Gudi Enya Hebelu 4:1-16
4 Nzambi watutendelele ha gungina mu guhuluguga guenji. Hene, mukut’etu agasue tudi naye gutema* hagula tutotesago felela diene.
2 Esue nji tualongesewe lukuma luabonga gifua mualongesewe ene. Uvi mbimbi avile yaabatelego gubonga, handaga akhalelego nu gutshigina gifua gua athu anyi atumagele.
3 Esue tuashile gutshigina, tudi mungina mu guhuluguga gua Nzambi. Uvi mukunda nu ene Nzambi wazuelele egi: “Khabu jiangukuatele, hene ngadilogele egi: ‘Mbaashigo mungina mu guhuluguga guami.’” Wazuelele ngenyi ngatshima midimo yenji yahuile sendese gu gisendeselo gia mavu.
4 Handaga wazuelele fundo dimoshi mu mukanda wa Nzambi mukunda nu lusugu lua sambadi egi: “Nzambi wahulugugile mu lusugu lua sambadi mu midimo yenji yagasue.”
5 Udi muzuela luko egi: “Mbaashigo mungina mu guhuluguga guami.”
6 Athu ako wawa nu luholo lua gungina mu guhuluguga guene. Uvi athu anyi alongesewe thomo lukuma luabonga anginyilego handaga atumagelego.
7 Nzambi wahaga luko lusugu ludi mutamegewa egi: “Mangino”; muene wadiangele guzuelela ndaga yene mu mukanda wa ngimbo wasonegele Davidi, gifua luholo tuayimonyi gu thunda egi: “Mangino gula muavua dijui dienji, mukolesago mitshima yenu.”
8 Gula nga Yoshua waatuamezele ha fundo dia guhuluguga, nga Nzambi gakhalelego naye guzuelela lusugu luko.
9 Lusugu lua guhuluguga lulu guene mukunda nu athu a Nzambi.
10 Handaga muthu wanginyile mu guhuluguga gua Nzambi, wahulugugile nji mu midimo yenji gifua luholo Nzambi wahulugugile mu midimo yenji.
11 Tutshite yagasue ha gungina mu guhuluguga gua Nzambi, hagula nga muthu mumoshi gabuigo nu galandulago gifezegeselo gia athu alumbugile.
12 Handaga mbimbi ya Nzambi idi nu monyo nu ngolo. Idi nu mazo gubalega phogo ya khusa, yajiya gungina ha gukhaphumuna monyo* nu nyuma,* ha gukhaphumuna ifiya nu uthotho* wenji. Yajiya nji gukotelesa matangi nu ndaga jidi mu mutshima.
13 Gushigo nga gima gimoshi giafugiwe gidi gia gudisuega gu meso a Nzambi, uvi ima yagasue idi thowa nu idi haphelo gudi muthu mbawutusophesa.
14 Nganga-nzambi wetu wakoma, Yesu Mun’a Nzambi wanginyile mu dilu. Hene, tulandule guzuelela gutshigina guetu mukunda nu muene.
15 Esue tushigo nu nganga-nzambi wakoma yonu gajiyilego gutuvila khenda mu gubola guetu, uvi tudi nu nganga-nzambi wakoma munu walolewe mu ndaga jiagasue gifua esue uvi muene gatshitshilego gubola.
16 Tusuenenu gu nguasa ya ufumu ya Nzambi wana gutuvila khenda jiavula.* Tumukombelelenu nu mutshima umoshi hagula wajiya gutuvila khenda nu gutukuatesa mu tangua diabonga mu njila ya khenda jienji jiavula.
Mbimbi goshi'a diyiji
^ Mu Greke: “gukhala nu woma.”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Nga “wongo.”
^ Mu Greke: “nguasa ya ufumu ya khenda jiavula.”
