Gudi Enya Hebelu 5:1-14
5 Nganga-nzambi wagasue wakoma wana tombewa mukatshi dia athu ha gukalegela Nzambi mudimo mukunda nu gubonga gua athu ene, hagula wajiya guhana misomonyi nu milambu mukunda nu masumu awo.
2 Wajiya guvua khenda jiavula* mukunda nu athu ashigo mujiya nga gima* nu mukunda nu athu adi mujimbila njila handaga muene hakhenji udi nji muthu waleba.
3 Muene udi naye guhana milambu mukunda nu gubola guenji gifua luholo ana hana mukunda nu athu ako.
4 Muthu gajiyilego gudibuisa nganga-nzambi wakoma muene hakhenji, uvi phamba Nzambi udi naye gumutomba, gifua luholo luatombele muene Alona.
5 Luholo lumoshi nji, Klisto gaditumbuishilego ha gudibuisa nganga-nzambi wakoma. Uvi watumbuishiwe gudi Muthu wamuwambelele egi: “Aye udi mun’ami; mangino ame ngabua sh’aye.”
6 Udi nji muzuela fundo diko mu mukanda wa Nzambi egi: “Aye udi nganga-nzambi mayilago gifua muakhalele Melekisedeke.”
7 Hakhalele Klisto ha mavu,* wakombelele Nzambi, wamububidile nu gudila guakola nu masoji, wakombelele Nzambi yonu wakhalele nu ngolo jia gumuhuluisa gu gufua. Nzambi wamuvidile, handaga muene wakhalele gumuvila woma.
8 Ngatshima wakhalele mona, uvi walongugile luholo lua gutumaga mu malamba amonele muene.
9 Watumagele mu ndaga jiagasue.* Ngenyi athu agasue adi gumutumagela ajiya guhuluishiwa nu guheta monyo wa ivo nu ivo mu njila yenji.
10 Handaga Nzambi wamutombele ha gukhala nganga-nzambi wakoma gifua muakhalele Melekisedeke.
11 Tudi nu ndaga jiavula jia guzuela mukunda nu muene, uvi idi lamba ha gumikotelesela najio, handaga guvua guenu gudi guazonda.
12 Henyaha* enue mudi naye gukhala alongeshi, uvi mudi nu funu egi muthu amilongese malongo aleba a gisendeselo a ndaga jia gijila jiazuelele Nzambi. Ha fundo dia gudia ima yakola, enue mudi muvutuga luko munua mele.
13 Handaga muthu wagasue udi mulandula gunua mele, udi mona wazonda nu gashigo mukotelesa mbimbi ya Nzambi yana gutulongesa ndaga jiabonga.
14 Uvi ima ya gudia yakola idi mukunda nu athu a gukula, handaga lusugu nu lusugu ana kalegela ndunge jiawo jinyi alongele gale, hagula ajiye gudisha gudi mukatshi dia ndaga jiabonga nu jiabola.
Mbimbi goshi'a diyiji
^ Nga “nu gisemo; nu gutuluga.”
^ Nga “enya mito yakola.”
^ Mu Greke: “mu masugu abuile muene nu muila wa muthu.”
^ Mu Greke: “tangua amubuishile muthu watagana.”
^ Mu Greke: “mu tangua edi.”
