Gudi Enya Hebelu 6:1-20
6 Henyaha tuabemba malongo a thomo atadila Klisto, tutshitenu ngolo ha gubua athu a gukula, tuvutugilago luko malongo aleba* mu ndaga yatadila gubalumuna mutshima mu midimo ya githuhu* nu gusha gutshigina gudi Nzambi,
2 nu malongo a gubatijiwa nu guhaga athu mago, nu gufuzumuga gua athu a gufua, nu usopheshi wa mayilago.
3 Uvi gula Nzambi watukuatesa mbatumubua athu a gukula.
4 Mukunda nu athu akhalele thomo mu muanya anyi ahetele khapho dia mu dilu dia khenda nu ahetele nyuma ya Nzambi,
5 alolele mbimbi yabonga ya Nzambi nu ima yabonga* mbayihanewa mu masugu adi muza.*
6 Uvi ene awunganele gale, idi lamba ha guakuatesa luko ha gubalumuna mutshima handaga adi mukhokha luko Mun’a Nzambi ha mutshi wa lamba nu adi gumukuatesa musonyi ha meso a athu.
7 Mavu ana heta gubonga guana katuga gudi Nzambi tangua ana minya meya a mvula yana noga mbala nu mbala, gungima ana zola ima ya gudia yabonga mukunda nu athu ayikunyile.
8 Uvi gula mavu adi muzola miya, ashigo nu ndando. Ana khala hehi ha gutewa mukumbu. Gu gisugishilo ene mbaambiwa tshuya.
9 Uvi, ngatshima tudi muzuela ngenyi, tudi nu gutshigina egi enue aphangi’etu a guzumba mudi mu njila yabonga yana bata guhuluga.
10 Handaga Nzambi gashigo muthu wabola ha gujimbila mudimo muakalegele nu guzumba muamonesele mukunda nu jina dienji, luholo muakalegele athu a gijila mudimo nu mudi mulandula guakalegela.
11 Uvi tudi mutshigina egi muthu nu muthu mukatshi dienu akhale nu gikhesa gia luholo lumoshi, ha gukhala nu gutshigina guakola mukunda nu felela uu nu gu gisugishilo,
12 hagula mubuigo imonya, uvi mulandule gifezegeselo gia athu anyi adi muheta ndaga jialayele Nzambi handaga adi nu gutshigina nu guhuiminyina.
13 Tangua Nzambi wahanele Abalahama laji, wadilogele mu jina dienji hakhenji, handaga guakhalelego nu muthu wamubalega gukoma hagula adiloge mu jina dia muthu muene.
14 Wazuelele egi: “Ame mbangugusuanguluisa diago nu mbanguvudisa ajigulu aye.”
15 Abalahama wahetele ndaga amulayele handaga wakhalele nu guhuiminyina.
16 Athu ana gudiloga mu jina dia muthu waabalega gukoma, gudiloga guawo guana manesela giphapha adi nagio, handaga idi gijiyishilo gidi mumonesa egi ndaga yene idi ya giamatshidia.
17 Luholo lumoshi nji, tangua Nzambi wamonesele haphelo gudi athu adi naye guheta gubonga gua laji dienji egi felela* dienji diajiyilego gusombegesa, wadilogele ha gumonesa egi ndaga yene idi ya giamatshidia,
18 hagula mu njila ya ndaga mbadi jianago gusombegesa, jinyi Nzambi gajiyilego gumba mambo, esue tualengele gudi muene ha gukamba ubambi tuhete ngolo jia gukuata mangololo felela didi gutuama dietu.
19 Felela tuana khala nadio didi gifua longo dia masuwa diana kuata monyo.* Didi dia diago nu diakola, diana gutukuatesa nji ha guya gungima dia rido.
20 Yesu wanginyile guene gutuama dietu, wayikangudile ha gutulondela njila, muene wabuile nganga-nzambi wakoma mayilago gifua muakhalele Melekisedeke.
Mbimbi goshi'a diyiji
^ Mu Greke: “tuhagigo luko fondasio.”
^ Mu Greke: “midimo ya gufua.”
^ Mu Greke: “ngolo.”
^ Nga “gindongo gidi muza.” Tala Ukoteleshi wa Mbimbi.
^ Nga “longo.”
^ Nga “mukunda nu mionyo yetu.”
