Gudi Enya Hebelu 7:1-28
7 Melekisedeke muene wakhalele fumu ya gu Salema, nganga-nzambi wa Nzambi ya Gudinyinyiga. Tangua Abalahama wabingile mafumu, hakhalele muene muvutuga, Melekisedeke wayile gumutagana nu wamusuanguluishile.
2 Abalahama wamuhuile giakumi gia ima yagasue. Thomo, jina dienji diana balumuiwa egi “Fumu Wana Kalagala Ndaga Jiabonga,” nu udi nji fumu ya gu Salema, yakotelesa egi “Fumu ya Guhuima.”
3 Muene gakhalelego nu tata, nga mama, nga nu senga ya akhakha. Gushigo nji nu fundo dimoshi diana zuelela guvualewa guenji nga gufua guenji. Uvi luholo wabuishiwe gifua Mun’a Nzambi, muene udi musala nganga-nzambi mayilago.
4 Muene wakhalele diago muthu wakoma. Khakha wetu* Abalahama wamuhanele giakumi gia ima yabonga yatambudile muene gu ita.
5 Ha gutadila Mukhuala, ana a Levi anyi ana tombewa ha gubua nganga-nzambi, ana guatoga ha guzangula giakumi gudi athu; athu ene adi aphangi’awo ikhale adi ajigulu a Abalahama.
6 Melekisedeke gakhalelego muenya giphuta gia enya Levi, uvi wazudile giakumi gudi Abalahama, watumbuishile Abalahama muthu wahetele malaji a Nzambi.
7 Idi yadiago egi muthu wazonda udi mutumbuishiwa gudi muthu wakoma.
8 Enya Levi adi muzula giakumi adi athu ajiya gufua, uvi muthu muko udi muzula giakumi udi nu monyo gifua luholo Mukanda wa Nzambi udi guyimonesa.
9 Tuajiya guzuela egi ikhale muene Levi udi muzula giakumi, wafutshile nji giakumi mu njila ya Abalahama.
10 Levi mujigulu wa Abalahama wakhalele khenji gavualewago* tangua Melekisedeke wayile mutagana nu Abalahama.
11 Gila unganga-nzambi wa enya Levi wakhalele mukatula gubola gua athu (handaga yakhalele mukatshi dia Mukhuala ahanele gudi athu), na mukunda natshi yakhalele luko nu funu egi nganga-nzambi muko azoge gifua Melekisedeke, uvi ndo gifua Alona?
12 Luholo unganga-nzambi wasombegesele, idi nji mutoga egi Mukhuala usombegesewe.
13 Handaga muthu adi muzuelela ndaga eji wajile mu giphuta giko. Mu giphuta giene guakhalelego nga muthu wakhalele mukalagala mudimo gu giwotshielo.
14 Idi yadiago egi Fumu’etu wavualewe mu giphuta gia Yuda. Moize gazuelelego nga gima gimoshi giatadila nganga-nzambi mukunda nu giphuta egi.
15 Ndaga eyi yamonega diago haphelo tangua nganga-nzambi muko wazoga udi gifua Melekisedeke.
16 Muene gashigo nganga-nzambi mukunda nu giphuta giavualewe muene gifua luholo mukhuala wakhalele mutoga. Uvi udi nganga-nzambi mukunda udi nu ngolo jiana gumuhana monyo unu wajiyilego gufua.
17 Mukanda wa Nzambi udi muzuela fundo dimoshi mukunda nu muene egi: “Aye udi nganga-nzambi mayilago gifua muakhalele Melekisedeke.”
18 Mukhuala wa thomo wakatudiwa handaga udi waleba nu ushigo nu funu.
19 Mukhuala wabuishilego nga gima gimoshi giatagana, uvi felela diabonga tudi nadio diabuishile ima yatagana. Diana gutukuatesa ha gusuena hehi nu Nzambi.
20 Handaga Nzambi wadilogele tangua diahagele muene Yesu nganga-nzambi.
21 (Idi yadiago egi Nzambi gadilogelego tangua athu ako abuile nganga-nzambi. Uvi wadilogele mukunda nu muthu mumoshi wabuile nganga-nzambi. Wazuelele egi: “Yehowa wadiloga nu mbagashigo musombegesa matangi’enji. ‘Aye udi nganga-nzambi mayilago’”).
22 Gishina giene Yesu wabuile gijiyishilo gidi mumonesa egi gikotelo giabonga mbagitagenesewa.
23 Nganga-nzambi jiavula jiakhalelego mulandula gukalagala mudimo wawo handaga akhalele mufua. Gishina giene athu ako akhalele guahingana ha gukalagala mudimo wene.
24 Uvi luholo muene wana khala nu monyo mayilago, gushigo nu muthu mbawumuhingana mu mudimo wenji wa unganga-nzambi.
25 Muene wajiya guhuluisa athu ana suena hehi nu Nzambi mu njila yenji, handaga muene udi nu monyo tangua diagasue ha gububila Nzambi mukunda nu ene.
26 Idi yatagana egi tukhale nu nganga-nzambi wakoma gifua yowu udi wagujinginyina, gashigo nu gubola gumoshi, gashigo nu usala, udi gualeha nu enya masumu nu wakanduishiwe gosa gualeha mu dilu.
27 Muene gashigo gifua nganga-nzambi jiko jiakoma. Gashigo nu funu ya guhana milambu ya lusugu nu lusugu mukunda nu masumu enji nu mukunda nu athu ako, handaga muene wakalegele ngenyi mbala imoshi tangua diadihanele muene.
28 Handaga athu anyi Mukhuala wana tomba ha gubua nganga-nzambi jiakoma adi enya masumu. Uvi gudiloga guakalegewe gungima dia Mukhuala guatombele Mona, mona muene wabuishiwe watagana mayilago.
