Gudi Enya Hebelu 8:1-13
8 Matangi’a ndando a ndaga tudi muzuelela enyawa: Tudi nu nganga-nzambi wakoma wa luholo elu. Muene udi wa gukhala gu koko dia madia dia nguasa ya ufumu ya Fumu Wakoma mu dilu.
2 Muene udi muenya mudimo ha fundo dia gijila nu mu inzo ya tenta ya giamatshidia inyi yajigiwe gudi Yehowa, uvi gudi muthu ndo.
3 Nganga-nzambi wagasue wakoma wana tombewa ha guhana misomonyi nu milambu. Hene yakhalele nu ndando egi muthu muene nji akhale nu gima gia guhana.
4 Gila nga wakhalele ha mavu, gakhalelego naye gubua nganga-nzambi. Handaga gudi nu athu ana hana gale misomonyi gifua luholo Mukhuala udi mutoga.
5 Mudimo wa gijila athu ene adi mukalagala udi gifezegeselo nu gifuanesa gia ima idi mu dilu. Idi gifua tangua Moize wakhalele mutshigina gutunga inzo ya tenta. Nzambi wamuwambelele egi: “Tshita ndaga jiagasue gifua luholo wayimonyi mu gifuanesa holu dia mulundu.”
6 Uvi henyaha Yesu waheta mudimo wabalega gubonga, handaga udi mutageneshi wa gikotelo giabonga ginyi giakotewe mu malaji abonga.
7 Gula nga gikotelo gia thomo giakhalelego nu gubola, nga guakhalelego nu funu ya gikotelo gia mbadi.
8 Handaga Nzambi udi mubalela athu hadi muzuela muene egi: “‘Tala! Mu masugu adi muza,’ Yehowa udi muzuela, ‘mbangukota gikotelo gihe-gihe nu enya Isalele nu enya Yuda.’
9 Yehowa udi muzuela luko egi: ‘Gikotelo egi mbagishigo mukhala gifua ginyi ngakotele nu akhakh’awo lusugu ngaakuatele gu koko ha guazola mu mavu a gu Ejipitu, handaga ene abambelego gikotelo giami hene ngabembele guakuatesa.’
10 “Yehowa udi mulezela luko egi: ‘Gigi gikotelo mbangukota nu enya Isalele gungima dia masugu anyi. Ame mbangumba mikhuala yami mu matangi’awo nu mbanguyisonega mu mitshima yawo. Mbangukhala Nzambi wawo, ene mbakhala athu ami.
11 “‘Gushigo nga nu muthu mungoshi mbawulongesa muthu muko nga phangi’enji egi: “Jiya Yehowa!” Handaga sendese gudi athu a githuhu uu nu gudi enya lukuma, mukut’awo agasue mbaangujiya.
12 Handaga mbanguavila khenda mukunda nu makalegelo awo abola nu mbangutangizago luko nga hazonda gubola guawo.’”
13 Hazuelele muene ndaga ya “gikotelo gihe-gihe,” gikotelo gikulu gishigo luko nu ndando. Gidi gia ginono nu gidi hehi ha gutota.
