Gudi Enya Hebelu 9:1-28
9 Gikotelo gikulu giakhalele nu mikhuala mukunda nu mudimo wa gijila, fundo dienji dia gijila diakhalele ha mavu.
2 Inzo ya tenta yatungiwe mu itshinyi mbadi. Gitshinyi gia thomo giakhalele nu gihagelo gia muenda nu mesa nu mapha ahanewe gudi Nzambi. Giana tamegewa egi Fundo dia Gijila.
3 Uvi gungima dia rido ya mbadi, guakhalele nu gitshinyi giko gia inzo ya tenta giana tamegewa egi Fundo Diabalega Gijila.
4 Mukatshi muakhalele nu giwotshielo gia uhafu gia utadi wa wolo nu mushete wa gikotelo wakhalele wa gukunga utadi wa wolo muila wagasue. Mukatshi dia mushete wene muakhalele nu bungu dia wolo diakhalele nu mana nu muhango wa Alona unu wazolele yaji nu maseso akhalele agusonega mbimbi jia gikotelo.
5 Holu dia mushete hakhalele nu basheribe a lutumbu. Mahambu awo akhalele mutshuiga fundo diana hanewa milambu ha gutotesela gubola.* Uvi didi dishigo tangua dia guzuelela ndaga eji imoshi-imoshi.
6 Halondewe ndaga eji jiagasue, nganga-nzambi jiakhalele mungina tangua nu tangua mu gitshinyi gia thomo gia inzo ya tenta ha gukalagala midimo ya gijila.
7 Uvi nganga-nzambi wakoma wana ngina hakhenji mu gitshinyi gia mbadi gia inzo ya tenta mbala imoshi mu givo. Wana ngina nu mahatshi ha guhana mukunda nu gubola guenji nu mukunda nu athu anyi akalagala masumu uvi ene gujiya ndo.
8 Nyuma ya Nzambi idi mumonesa haphelo egi njila khenji imonegelego ha gungina ha fundo dia gijila, handaga tenta ya thomo yakhalele yiyi genji ya gumagana.
9 Inzo ya tenta eyi idi gifuanesa gia ndaga jidi mukalegewa mangino nu idi mumonesa egi misomonyi nu milambu yana hanewa guene yana phelegetesago mutshima wa muthu udi mukalagala mudimo wa gijila.
10 Misomonyi nu milambu yakhalele mutadila phamba ima ya gudia nu ya gunua nu ndaga jiavula jiatadila guzua meya.* Yakhalele mikhuala yatadila muila, yahagewe uu nu mu tangua diatombewe ha guvutula ndaga jiagasue mu njila.
11 Uvi tangua diajile Klisto gifua nganga-nzambi wakoma wa ndaga jiabonga jiana khala gale guene, wanginyile mu tenta yakoma nu yabalega gubonga inyi yatungiwego nu mago a athu, yakotelesa egi yana khalago ha mavu.
12 Wanginyile mu fundo dia gijila, ganginyilego nu mahatshi a khombo nga a mitumba ya ngombe, uvi wanginyile nu mahatshi enji giphungu gimoshi nu watukuatesele ha guhuluishiwa mayilago.
13 Gula mahatshi a khombo nu a ngombe jia milume nu fuphi ya mitumba ya ngombe jia mikaji yana kungiwa athu akalagala gubola, nu yana kuatesa ha guphelegetesa muila,
14 Klisto gakhalelego nga nu gubola gumoshi. Wadihanele gudi Nzambi mu njila ya nyuma ya mayilago. Mahatshi enji ajiyilego guphelegetesa mitshima yetu mu makalegelo etu abola hagula tukalegele Nzambi wa monyo mudimo wa gijila ba?
15 Gishina giene, muene udi mutageneshi wa gikotelo gihe-gihe. Wabuile mutageneshi hagula athu anyi atamegewe ahete laji dia monyo wa mayilago. Gufua guenji guakalegele egi ndaga eji jiagasue jitagenesewe hagula mu njila ya mulambu akatule athu agasue mu gubola akalegele mu gikotelo gikulu.
16 Gula muthu wakota gikotelo nu Nzambi, idi nu ndando egi muthu muene afue,
17 handaga gikotelo giana khala nu ndando gula muthu wagikotele wafua. Uvi gula muthu wakotele gikotelo giene yowu nu monyo, giana khala ndo nu ndando.
18 Gishina giene, gikotelo gikulu giakhalelego naye gusendesa gula nga mahatshi ambombuesewe ndo.
19 Hamanesele Moize guwambela athu agasue ndaga jiagasue jiatadila Mukhuala, wazudile mahatshi a mitumba ya ngombe nu ya khombo, waabungishile nu meya, wazudile linene yabenga nu thango jia isophe, wasendesele gunyanga mahatshi ene gu mukanda* nu gudi athu agasue.
20 Wazuelele egi: “Wawa mahatshi a gikotelo ginyi Nzambi udi gumitoga ha guginemesa.”
21 Muene wanyangele mahatshi gu inzo ya tenta nu ikadigilo yagasue ya mudimo wa gijila.
22 Mukhuala wana zuela egi ima yagasue idi naye guphelegetesewa nu mahatshi. Gula mahatshi ambosele ndo, ajiyilego gutotesela muthu gubola.
23 Yakhalele nu ndando egi ifuanesa ya ima idi mu dilu iphelegetesewe mu luholo elu. Uvi ima idi mu dilu yana toga milambu yabalega gubonga.
24 Handaga Klisto ganginyilego mu fundo dia gijila dialondewe nu mago a athu, dinyi didi gifuanesa gia fundo dia gijila dia giamatshidia, uvi wanginyile diago mu dilu. Wamuenegene gutuama dia* Nzambi mukunda nu gubonga guetu.
25 Muene ganginyilego ha gudihana mbala jiavula gifua luholo nganga-nzambi wakoma wakhalele mungina ha fundo dia gijila givo nu givo nu mahatshi, uvi mahatshi ene akhalelego enji.
26 Ngenyi wakhalele naye gumona malamba matangua avula sendese gu gisendeselo gia mavu. Uvi wamonegele mbala imoshi gu gisugishilo gia mavu awa,* ha gukatula masumu mu njila ya mulambu wenji.
27 Gifua luholo muthu wagasue udi naye gufua mbala imoshi, gungima udi naye gusophesewa,
28 luholo lumoshi nji, Klisto wahanewe mbala imoshi gifua mulambu mukunda nu gukatula masumu a athu avula. Mbala ya mbadi mbayimonega muene mbagashigo muza ha gukatula masumu.* Muene mbawumonega gudi athu agasue ana gumunenga mukunda nu guhuluishiwa.
Mbimbi goshi'a diyiji
^ Nga “gitshuigilo gia mushete wa gikotelo.” Tala Ukoteleshi wa Mbimbi.
^ Mu Greke: “gubatijiwa gua maluholo avula.”
^ Nga “rulo.”
^ Mu Greke: “gutuama dia phala ya.”
^ Nga “gindongo.” Tala Ukoteleshi wa Mbimbi.
^ Nga “mbagashigo muza mukunda nu ndaga yatadila masumu.”
