Gudi Enya gu Kolosai 1:1-29
1 Ame Phaula mupostolo wa Klisto Yesu mu gutshigina gua Nzambi hamoshi nu phangi’etu Timote,
2 ngudi musonegela athu a gijila nu aphangi a gujinginyina adi alandudi a Klisto gu Kolosai.
Nzambi Tata wetu amivile khenda jiavula amikuatese nji ha gukhala mu guhuima.
3 Tangua diagasue tuana hana mersi gudi Nzambi Tata wa Fumu wetu Yesu Klisto tangua tuana kombelela mukunda nu enue,
4 sendese tuavile egi muana sha gutshigina gudi Klisto Yesu nu muana zumba athu agasue a gijila
5 mukunda nu gubonga guana gumibambela Nzambi mu dilu. Thomo muavile ndaga yatadila gubonga guene mu njila ya giamatshidia giatadila lukuma luabonga
6 amilongesele. Lukuma luene ludi muzola mbuto nu ludi gudivudisa ha mavu agasue, ludi muzola nji mbuto mukatshi dienu sendese lusugu muavile nu muajiyile muabonga khenda jiavula jia Nzambi.
7 Mualongesewe ndaga eji gudi Epafrase, muhiga na muku’etu tuana zumba muavula udi mukalagala mudimo wa Klisto ha fundo dietu.
8 Watujiyishile nji luholo nyuma ya Nzambi idi gumikuatesa ha guzumba athu ako.
9 Gishina giene, sendese lusugu tuavuile ndaga yene, tuana landula gukombelela mukunda nu enue nu gutoga Nzambi hagula muzalesewe nu ujiyi wa giamatshidia watadila gutshigina guenji, mukhale nu gutema nu ha gukotelesa ndaga jia mu nyuma.
10 Ngenyi muajiya guwenda mu luholo luatagana ludi musuanguluisa diago Yehowa, nu ha guzola mbuto mu mudimo wagasue wabonga, nu ha gukudisa ujiyi wa giamatshidia watadila Nzambi.
11 Tudi nji musamba hagula Nzambi mu lutumbu luenji luakoma amihane ngolo jiavula jiajiya gumikuatesa ha gukolesela mu malamba nu guhuiminyina nu gusuanguluga guagasue,
12 tangua mudi muhana Tata mersi luholo wamikuatesele ha guheta umonyi hamoshi nu athu a gijila adi muwenda mu muanya.
13 Watukatudile mu phipha, watunginyishile mu ufumu wa Mun’enji wa guzumba,
14 mu njila ya Mun’enji, tuakatudiwe mu uhiga nu atutotesele gubola guetu mu ukuateshi wa gibawu.
15 Mona muene udi gifuanesa gia Nzambi yonu wana gumonega ndo, somi ya ima yagasue yafugiwe,
16 handaga ima yagasue yafugiwe mu njila yenji, ima idi mu dilu nu ima idi ha mavu, ima idi mumonega nu inyi ishigo mumonega nu nguasa jia ufumu nu ufumu nu ba guvernema nu uhinyinyi. Ima iko yagasue yafugiwe mu njila yenji, yafugiwe nji mukunda nu muene.
17 Muene wadiangele gukhala gutuama egi ima yagasue ifugiwe. Ima iko yagasue yafugiwe mu njila yenji.
18 Klisto udi muto wa muila, muila wene udi hungu. Muene udi gisendeselo, muthu wa thomo* wafuzumugile mu gufua, hagula abue muthu wa thomo mu ima yagasue.
19 Nzambi wasuangulugile ha gumuzalesa nu ima yagasue,
20 hagula mu njila yenji ima iko yagasue ikhale mu gudivua nu Nzambi, ikhale ima idi ha mavu nga inyi idi mu dilu ha guhaga guhuima mu njila ya mahatshi ahanele Mun’enji ha mutshi wa lamba.*
21 Muakhalele gualeha nu Nzambi, muakhalele nji mbalagaji jienji handaga muakhalele muhaga matangi’enu mu ndaga jiabola.
22 Nzambi wadivishile n’enu mu njila ya muila wa muthu munu wafile, hagula mukhale a gijila, mukhadigo nu ditona nga nu mulonga umoshi gutuama dienji.
23 Uvi landulenu gusha gutshigina gudi Nzambi, khalenu tenyi holu dia fondasio, khalenu nji ya gumagana. Mutotesago felela dia lukuma luabonga muavuile, lunu lualongesewe ha mavu a mudidi. Ame Phaula ngabuile muenya mudimo mukunda nu lukuma luene.
24 Henyaha ngudi nu gusuanguluga mukunda nu malamba ngudi mumona mukunda nu enue, uvi ngudi mutangiza egi khenji ngumona diago ndo malamba mukunda nu muila wa Klisto, unu udi hungu.
25 Ngabuile muenya mudimo mukunda nu hungu diene, handaga Nzambi wanguhanele ginemo gia gulongesa mbimbi yenji mukunda nu gubonga guenu,
26 yakotelesa gisuegi gia gijila. Mu sungi yabalega nu indongo yabalega, akhalelego mujiya gisuegi giene, uvi henyaha wagimonesa gudi athu enji a gijila.
27 Nzambi wasuangulugile ha guadijiga lutumbu lua umonyi wa gisuegi giene mukatshi dia enya gifutshi, yakotelesa Klisto udi mu gudivua nu enue. Ndaga yene idi mumonesa egi mudi nu felela dia gutumbuishiwa n’enji hamoshi.
28 Tuana longesa ndaga jiamutadila, tuana temesa athu agasue, tuana longesa athu agasue nu gutema guagasue hagula akhale atagana gu meso a Nzambi mu gudivua nu Klisto.
29 Gishina giene ngudi mukalagala ngolo nu gukolesela mu ukuateshi wa ngolo jiana gunguhana muene.
