Gudi Enya gu Kolosai 2:1-23
2 Ngumutshigina mujiye egi ngudi mulua ita yakoma mukunda nu enue nu mukunda nu enya gu Laodise nu mukunda nu athu anyi adi khenji angumonele gale ndo.
2 Gutshigina guami gudi egi akhale nu gikhesa, akhale nji hamoshi mu guzumba, ngenyi mbaaheta umonyi, yakotelesa egi ukoteleshi wabonga nu ujiyi wa giamatshidia watadila gisuegi gia gijila gia Nzambi. Gisuegi giene gidi Klisto.
3 Umonyi wagasue wa ndunge nu wa ujiyi udi wagusuega muabonga gudi muene.
4 Ngudi gumiwambela ndaga eji hagula nga muthu mumoshi gamihuigigo nu mbimbi jia mulebo.
5 Ngudi gualeha n’enu mu muila uvi ngudi n’enu mu matangi. Ngudi musuanguluga ha gumona luholo mudi mukalagala ndaga mu luholo luabonga, nu ha gumona gutshigina guenu guakola mudi nago mukunda nu Klisto.
6 Hene luholo muatshiginyile Fumu Klisto Yesu, landulenu guwenda hamoshi n’enji,
7 jigenu miji gudi muene, ditungenu gudi muene, khalenu nu gutshigina guakola gifua luholo amilongesele. Khalenu nji muhana Nzambi mersi.
8 Temenu hagula muthu gamibuishigo ahiga a filozofi nga a malongo a mambo adi gudivua nu kutime jia athu, malongo adi gudivua nu ndaga jia githuhu jia ha mavu awa, uvi ashigo gudivua nu Klisto.
9 Handaga Klisto wakhala wa guzala pha nu makalegelo agasue a Nzambi.
10 Enue muahetele ima yagasue mu njila yenji, muene udi fumu wa baguvernema agasue nu ya ufumu wagasue.
11 Mukunda nu ufuta muakuatele n’enji, muambiwego gu mukanda gifua luholo athu ana gumbiwa gu mukanda, uvi amikatudile muila wa masumu handaga idi luholo alandudi a Klisto adi naye gumbiwa gu mukanda.
12 Muafundiwe n’enji mu gubatijiwa guenji, muafuzumuiwe n’enji mu ufuta muakuatele n’enji mu njila ya gutshigina muahagele mu ngolo jia Nzambi, yonu wafuzumuine Klisto mu gufua.
13 Muakhalele ya gufua mukunda nu gubola guenu nu luholo muakhalelego ya gumbiwa gu mukanda, uvi Nzambi wamihanele monyo hamoshi nu Klisto. Watutotesele gubola guetu nu mutshima umoshi,
14 wamuangele nji mukanda wa mikhuala wasonegewe ha gutufuisa milonga. Wawukatuile tangua diawukhokhele muene ha mutshi wa lamba.*
15 Muene wabingile baguvernema nu mafumu mu njila ya mutshi wa lamba,* waadijigile gu meso a athu agasue gifua athu abingiwe. Waatuamezele mu mulongo wa athu abingile.
16 Hene, muthu gamisophesago mu ndaga yatadila gudia nu gunua nga gukalagala wano nga mukunda nu mbeji ihe-ihe nga mukunda nu lusugu lua guhuluguga.
17 Ndaga eji jiakhalele gifuanesa gia ndaga jidi muza. Uvi giamatshidia gidi Klisto.
18 Mubembigo egi athu anyi ana monesa gudibulumuisa gua mambo nu ana kombelela anjelo amikange njila ha guheta gishimbigo gienu. Ene “ana khala agujinginyina” mu ndaga amonele. Ana khala nu lulendo luavula mukunda nu ndaga jia githuhu ana tangiza ene.
19 Athu a luholo elu ana khalago agujinginyina nu muto, wago wana hana muila wa mudidi ima udi nayo funu, wana kalagala nji egi itshinyi yagasue ya muila ikhale hamoshi nu wana kuatesa muila ha gukula mu ngolo jia Nzambi.
20 Enue muafuile hamoshi nu Klisto gu ndaga yatadila ndaga jia githuhu jia ha mavu awa. Na mukunda natshi mudi mukalagala ndaga gifua enya ha mavu? Mudi mutumagela mikhuala eyi:
21 “Uzudigo, ulodigo, ukuatshigo.”
22 Mikhuala eyi idi mutadila ima yana bola gula athu ayidia nga ayinua. Idi mikhuala yana longesa athu.
23 Mikhuala eyi yana monega gifua idi yabonga, uvi yana kuatesa ndo athu ha gutuna gutagenesa nzala jia mila yawo. Yana kalegewa ngenyi handaga athu ene ana tomba hakhawo luholo adi naye gukombelela Nzambi. Ana monesa gudibulumuisa gua mambo nu ana sagesa muila wawo.
