Gudi Enya gu Kolosai 4:1-18
4 Enue mafumu, kalegelenu ahiga enu ndaga mu luholo luabonga nu luatagana. Jiyenu egi enue nji mudi nu Fumu wenu udi mu dilu.
2 Fubidilenu mu gisambu, mubembigo gukombelela, khalenu muhana nji Nzambi mersi.
3 Khalenu nji mukombelela mukunda nu esue hagula Nzambi atuhane luendu lua gulongesa mbimbi yenji nu gisuegi gia gijila giatadila Klisto, handaga ngudi mu bologo mukunda nu muene,
4 hagula ngajiya gulongesa nu guzuelela gisuegi giene gifua luholo ngudi naye guzuela.
5 Wendenu nu gutema mukatshi dia athu anyi ashigo mukatshi dia hungu dia Uklisto, kalegelenu tangua dienu mu luholo luabonga.
6 Mbimbi jienu jikhale jiabonga tangua diagasue, jia gumba mungua hagula mujiye luholo lua guhana muthu wagasue mvutu.
7 Tishike mun’etu wa guzumba, mukuateshi wa gufubidila mu mudimo wa Fumu, muhiga na muku’etu, uza gumitela mene jiagasue jiangutadila ame.
8 Ngudi gumitumila n’enji hagula mujiye luholo tudi nu ha gumihana gikhesa.*
9 Udi muza hamoshi nu Onesimo, phangi’ami wa gujinginyina ngana zumba muavula, muenya gumbo dienu, adi muza gumitela ndaga jiagasue jidi mubalega haha.
10 Aristarke, futa diami wa bologo wamitumila lumene. Mako gisonyi gia Barnabase (munu ngamiwambelele egi gula waza gumbo dienu mbamumuyamba muabonga), wamitumila nji lumene.
11 Yesu munu wana tamegewa egi Yustuse wamitumila nji lumene. Mukut’awo agasue adi athu ambiwe gu mukanda. Phamba ene adi mafut’ami a mudimo mukunda nu Ufumu wa Nzambi. Ana gunguhana diago gikhesa muavula.*
12 Epafrase, muhiga wa Klisto Yesu, muenya gumbo dienu wamitumila lumene. Tangua diagasue wana samba muavula mukunda nu enue hagula muajiya gukhala athu a gukula nu muhage gutshigina guakola mu ndaga jiagasue mbajikalagala Nzambi.
13 Ngudi gumiwambela egi muene wana gudisagesa muavula mukunda nu enue nu mukunda nu aphangi adi gu Laodise nu gu Hielepholise.
14 Munganga Luka tuana zumba muavula nu Demase amitumila lumene.
15 Hanenu aphangi a gu Laodise moyo nu phangi Nimfa nu hungu diana gudibungisa mu inzo yenji.
16 Gula muatanga mukanda wuwu tshitenu yagasue hagula utangewe nji mu hungu dia Laodise. Enue nji mutange mukanda ngatumila aphangi a gu Laodise.
17 Wambelenu Aleshiphe egi: “Tshita yagasue ha gutagenesa mudimo wa Fumu watshiginyile.”
18 Ame Phaula ngasonega mukanda owu nu koko diami, ngamitumila lumene. Mujimbilago egi ngudi mu bologo. Khenda jiavula jia Nzambi jikhale nu enue.
