Levi 26:1-46
26 “‘Mushigo naye gudilondela nzambi jia githuhu, mushigo naye nji gulonda gisongo nga kunji dia gijila. Mushigo naye nji guhaga gifuanesa gia seso mu gifutshi gienu ha gugifugamena handaga ame Yehowa Nzambi wenu.
2 Mudi naye gunemesa masugu ami a guhuluguga, mudi naye nji gunemesa* fundo diami dia gijila. Ame Yehowa.
3 “‘Gula mualandula mikhuala yami, nu muatshita ndaga mikhuala yene idi muzuela nu muayitumagela,
4 mbanguminogesela mvula yavula mu tangua diatagana. Mavu mbaazola mbuto, mitshi ya mu mahia nji mbayihaga mabundu.
5 Sungi yenu ya gukatula mbuto mbayikhala yaleha uu nu mu sungi yenu ya guhela mabundu a vinyo. Sungi ya guhela mabundu a vinyo mbayikhala yaleha uu nu mu sungi ya gukuna mbuto. Mbamudia mapha enu nu mbamukuta. Mbamukhala mu guhuima mu gifutshi gienu.
6 Mbanguhaga guhuima mu gifutshi, mbamubanda mu ubambi. Gushigo nga nu muthu mbawumivuisa woma. Mbangukatula shitu jiabala jia mu foto mu gifutshi. Phogo ya khusa ya ita mbayishigo mubalega mu gifutshi gienu.
7 Mbamulandula diago mbalagaji jienu, mbamuaashiya nu phogo ya khusa.
8 Athu enu thano mbaakaya athu 100. Athu enu 100 mbaakaya athu 10 000. Mbamushiya mbalagaji jienu nu phogo ya khusa.
9 “‘Mbangumivuila khenda,* mbangumikuatesa ha guvuala ana, mbangumivudisa. Mbangunemesa gikotelo ngakotele n’enu.
10 Tangua mbamukhala mudia mbuto jikulu jia givo giabalega, mbayitoga egi mujibishile ha gubemba fundo mukunda nu mbuto jihe-jihe.
11 Mbanguhaga inzo yami ya tenta mukatshi dienu. Mbangushigo nji gumituna.
12 Mbanguwenda mukatshi dienu, mbangukhala Nzambi wenu, enue mbamukhala athu ami.
13 Ame Yehowa Nzambi wenu wamizolele mu gifutshi gia Ejipitu hagula mukhadigo luko ahiga. Ngaboguele mihitu yenu ya uhiga hagula muajiya guwenda mito ya gumagana.*
14 “‘Uvi gula muangutegelelego nu muatumagelego mikhuala eyi yagasue,
15 gula muatuna nji mikhuala yami nu muasegulula badesizio ami hagula mulandulago mikhuala yami yagasue, gula muanemeselego nji gikotelo giami,
16 talenu ndaga mbangumitshita: Mbangumimonesa malamba ha gumihana ndola, mbangumitumina misongo ya mu thulo, nu fievre yakola. Ngenyi mbayibolesa meso enu, mbamukhadigo luko nu ngolo. Mbamulaba gukuna mbuto mu mahia enu handaga mbalagaji jienu mbajidia mbuto jiene.
17 Mbangumituna, mbalagaji jienu nji mbajimibinga. Athu adi n’enu umbalagaji mbaamimonesa lamba. Mbamulaba gudilengela ngatshima gushigo nu muthu udi gumihata.
18 “‘Uvi gula gungima dia malamba awa muangutegelelego, mbangumihana ndola mbala sambadi mukunda nu gubola guenu gubalega ha thomo.
19 Mbangumanesela lulendo luenu luakola, mbangubuisa dilu dienu gifua utadi. Mbangubuisa mavu enu gifua kuivre.
20 Mbamulaba gumanesela ngolo jienu handaga mavu enu mbaashigo muzola mbuto. Mitshi ya mu gifutshi mbayishigo nji muhaga mabundu.
21 “‘Uvi gula mualandula gungulumbugila nu muatuna genu gungutegelela, mbangumihana ndola mbala sambadi gubalega ha thomo gifua mudi gubola guenu.
22 Mbangutuma shitu jia mu foto mukatshi dienu, mbajishiya an’enu, mbajimanesela nji shitu jienu jia hembo. Mbamusala azonda, ngenyi athu mbamumuenegago mu njila jienu.
23 “‘Uvi gula gungima dia ndaga eji jiagasue muatshiginyilego ndola yami, mudi mulandula gungutuna,
24 ame nji mbangumituna. Mbangumihana ndola mbala sambadi mukunda nu gubola guenu.
25 Luholo muanemeselego gikotelo giami, mbangubemba egi mbalagaji jienu jimiluise nu phogo ya khusa ha gumihana ndola. Gula mualengela mu membo enu, mbangumitumina misongo; mbamuhanewa nji ha mago a mbalagaji jienu.
26 Tangua mbangumuanga mafundo enu a gubambela* mapha,* akhetu kumi mbaawetshia mapha enu phamba mu fulu imoshi. Mbaathesa mapha enu ha kilo, mbaamihana azonda, mbamudia uvi mbamushigo mukuta.
27 “‘Uvi gula gungima dia ndaga eji mushigo gungutegelela, nu mudi mulandula gungutuna,
28 ame nji mbangumituna diago. Mbangumihana ndola mbala sambadi mukunda nu gubola guenu.
29 Mbamudia misunyi ya an’enu a mala nu ya an’enu a akhetu.
30 Mbangumuanga mafundo enu muana kombelela nzambi jia isongo, mbangubuisa iwotshielo yenu ya uhafu, mbanguhaga imbi yenu holu dia isongo yenu ya usala* inyi mbayisala. Mbangumituna handaga muabui enya usala.
31 Mbangushiya membo enu; mafundo enu a gijila mbanguabuisa makhulu. Mbangushigo musuanguluga nu vumba diabonga dia milambu yenu.
32 Mbangubuisa gifutshi makhulu. Mbalagaji jienu jiana khala mu gifutshi giene mbajidihula tangua mbajitala gifutshi giene.
33 Mbangumimuanga mukatshi dia ifutshi; mbangutshita egi mbalagaji jienu jimiluise nu phogo ya khusa. Gifutshi gienu mbagibua makhulu, membo enu mbaamuangewa.
34 “‘Tangua mbamukhala mu gifutshi gia mbalagaji jienu, mavu enu mbahuluguga mukunda nu masugu anyi adile guhuluguga ndo. Mu tangua diene, mavu enu mbahuluguga handaga ahulugugilego.
35 Tangua mavu enu mbaasala makhulu, mbaahuluguga handaga ahulugugilego tangua muakhalele muene.
36 “‘Athu anyi mbaasala nu monyo, mbanguzalesa mitshima yawo nu woma mu ifutshi ya mbalagaji jiawo. Mbaalenga mukunda nu matululu a diyiji didi gudinyigisa gu funji. Mbaalenga gifua luholo muthu wana lenga phogo ya khusa. Mbaabua ikhale gushigo nu muthu udi guahata.
37 Mbaadikhakhula gifua athu adi mulenga phogo ya khusa ikhale gushigo nu muthu udi guakaya. Mbamushigo mumagana gutuama dia mbalagaji jienu.
38 Mbamufua mukatshi dia ifutshi. Mavu a mbalagaji jienu mbaamiminya.
39 Athu anyi mbaasala nu monyo mukatshi dienu, mbaafukha mu ifutshi ya mbalagaji jienu mukunda nu gubola guenu. Yadiago, mbaafukha mukunda nu gubola gua ash’awo.
40 Gungima, mbaatshigina gubola guawo, mbaatshigina nji gubola gua ash’awo nu luholo ash’awo akhalelego agujinginyina gudi ame. Mbaatshigina nji egi akhalelego agujinginyina gudi ame luholo angutunyile.
41 Hene ame nji ngaatunyile, ngaabatele mu gifutshi gia mbalagaji jiawo.
“‘Hagula egi matangua ako mbaashigo mukolesa mitshima yawo,* mbaadibulumuisa, ngenyi mbaatshigina gubola guawo.
42 Mbanguwunguluga gikotelo giami nu Yakoba nu Izake. Mbanguwunguluga nji gikotelo ngakotele nu Abalahama, mbanguwunguluga nji gifutshi.
43 Tangua mbamushigo mukhala mu gifutshi gienu, gifutshi giene mbagibua makhulu. Mbagihuluguga mukunda nu masugu anyi giadile guhuluguga ndo. Mu tangua diene, mbamuhanewa ndola mukunda nu gubola guenu, handaga muatunyile gunemesa badesizio ami nu muaseguluile mikhuala yami.
44 Uvi ikhale ene atshita ngenyi, tangua mbaakhala mu gifutshi gia mbalagaji jiawo, mbangushigo guaatuna diago nga guaasegulula ha guashiya. Handaga gula ngatshita ngenyi, mbangushigo munemesa gikotelo ngakotele nawo ndaga ya ngudi Yehowa Nzambi wawo.
45 Mukunda nu gubonga guawo, mbanguwunguluga gikotelo ngakotele nu akhakh’awo anyi ngazolele mu gifutshi gia Ejipitu ha meso a athu a ifutshi iko, ha gumonesa egi ngudi Nzambi wawo. Ame Yehowa.’”
46 Eyi mikhuala nu badesizio Yehowa wahanele Moize gu Mulundu wa Sinayi mukunda nu enya Isalele.
Mbimbi goshi'a diyiji
^ Nga “gunemesa nu woma wagasue.” Mu Hebelu: “woma.”
^ Mu Hebelu: “mbangubalumuga gudi.”
^ Mu Hebelu: “hagula muajiya guwenda muabonga.”
^ Mu Hebelu: “mutshi.” Yajiya gukhala egi adi muzuelela mitshi akhalele mukalegela ha gunginyisa mapha ha guabamba.
^ Nga “ima ya gudia.”
^ Mbimbi ya Hebelu adi muzuelela haha yajiya gukhala luholo lumoshi nu mbimbi “tuji tua shitu.” Idi mbimbi ana kalegela ha guzuelela gima gia usala.
^ Mu Hebelu: “mitshima yawo yambiwego gu mukanda.”
