Mukanda wa Luka 1:1-80
-
Luka wasonegela Teofile mukanda (1-4)
-
Muanjelo Gabriyele wadiangela guzuelela guvalewa gua Yone Mubatiji (5-25)
-
Muanjelo Gabriyele wadiangela guzuelela guvalewa gua Yesu (26-38)
-
Madiya waya mutala Elizabete (39-45)
-
Madiya udi mutumbuisa Yehowa (46-56)
-
Guvalewa gua Yone nu luholo amuhanele jina (57-66)
-
Zakaliya wazuela mbimbi jia profesi (67-80)
1 Handaga athu avula asendesele gusonega lumene lua ndaga tuana gushila mutshima,*
2 gifua luholo jiatuwambelewe gudi athu anyi ajimonele nu meso awo gu gisendeselo nu ana kalegela mbimbi yene.
3 Fumu Teofile, ame nji ngazudi desizio dia gugusonegela mu luholo lua gudilanduluila, handaga ngakambele muabonga ndaga jiagasue jiakalegewe sendese gu gisendeselo,
4 hagula ujiye egi ndaga jinyi agulongesele jidi jia giamatshidia.
5 Mu masugu a Helode,* fumu wa mavu a Yudea, guakhalele nu nganga-nzambi mumoshi, jina dienji Zakaliya. Muene wakhalele mu hunji dia nganga-nzambi jia Abiya. Mukaji’enji wakhalele mujigulu wa Alona, jina dienji Elizabete.
6 Muene nu mukaji’enji akhalele athu abonga gu meso a Nzambi, handaga akhalele mutumagela malongo nu mikhuala yagasue ya Yehowa nu mutshima umoshi.
7 Uvi akhalelego nu mona handaga Elizabete wakhalele gisula.* Luko, muyadi’awo akhalele akodi gale.
8 Hakhalele Zakaliya nu nganga-nzambi jiko jia mu hunji dienji mukalagala mudimo gutuama dia Nzambi,
9 gifua muakhalele khadilo* dia mudimo wa nganga-nzambi, yakhalele lusugu luenji lua gungina mu tempelo ya Yehowa ha guwetshia uhafu.
10 Mu tangua dia guwetshia uhafu, athu agasue avula akhalele hanze mukombelela.
11 Muanjelo wa Yehowa wamonegele gudi Zakaliya, wakhalele wa gumagana gu koko dia madia* dia giwetshielo gia uhafu.
12 Hamonele Zakaliya muanjelo muene, wasagumugile, woma wamukuatele.
13 Uvi muanjelo wamuwambelele egi: “Zakaliya, uvuigo woma handaga Nzambi wavua gutoga guaye. Mukaji’aye Elizabete mbawuguvalela mona yala, mbawumuhana jina egi Yone.
14 Aye mbawukhala nu gusuanguluga, gusuanguluga guavula diago; athu avula mbaasuanguluga nji mukunda nu guvalewa guenji.
15 Handaga muene mbawukhala muthu wakoma gu meso a Yehowa. Uvi mbaganuigo vinyo nga matombe abala. Mbawuzalesewa nu nyuma ya Nzambi gutuama egi avalewe.*
16 Muene mbawukuatesa enya Isalele avula ha guvutugila Yehowa Nzambi wawo.
17 Muene mbawuya nji gutuama dia Nzambi nu nyuma nu ngolo jia Eliya, ha guvutula mitshima ya atata gudi ana, nu ha gukuatesa athu anago gutumagela Nzambi ha gutshita ndaga nu gutema guagasue, gifua muana kalagala athu abonga. Ngenyi, muene mbawukuatesa athu ha gudilondega ha gukombelela Yehowa.”
18 Zakaliya wahudile muanjelo egi: “Luholo lutshi ngajiya gutshigina egi ndaga eyi idi ya giamatshidia? Handaga ngudi muthu wa gukola, mukaji’ami nji udi nu ivo yavula.”
19 Muanjelo wamuwambelele gamba: “Ame ngudi Gabriyele, ngana magana gutuama dia Nzambi, muene wangutumi ha guguwambela lukuma elu luabonga.
20 Uvi tala! Ndaga eji mbajibua mu tangua diatagana. Uvi luholo aye watuna mbimbi jiami, mbawufua kano, mbawushigo muzuela luko uu nu lusugu ndaga eji mbajitagana.”
21 Mu tangua diene, athu akhalele munengena Zakaliya, akhalele gudihula ha gumona luholo luashiphile muene muavula mu tempelo.
22 Hazogele muene, gakhalelego muzuela luko. Athu akotelesele egi wamonele ndaga ya gushimana* mu tempelo. Zakaliya wakhalele guafezegesela nu mago uvi muene wabuile gatabu.*
23 Tangua masugu enji a mudimo* ahuile, wavutugile gumbo dienji.
24 Masugu azonda gungima, mukaji’enji Elizabete wamitshile vumo. Wakhalele wa gudisuega mbeji jitano, wazuelele egi:
25 “Tala ndaga yangukalegela Yehowa, muene watala meso enji gudi ame, wangukatula musonyi mukatshi dia athu.”
26 Hakhalele muene nu vumo dia mbeji samano, Nzambi watumine muanjelo Gabriyele gu Galilea mu dimbo dia Nazaleta,
27 gudi mukhetu mumoshi wa gandongo walayewe ulo* gudi Yozefe, muenya giphuta gia Davidi. Jina dia mukhetu muene wa gandongo diakhalele Madiya.
28 Tangua dianginyile muanjelo fundo diakhalele Madiya, wamuwambelele egi: “Moyo, aye mukhetu wavuiwa khenda jiavula, Yehowa udi nu aye.”
29 Uvi mbimbi jiene jiamusagesele muavula, wakambele gujiya gula lumene luene luakotelesa itshi.
30 Muanjelo wamuwambelele egi: “Madiya uvuigo woma, handaga Nzambi wagutshigina.
31 Tala! Aye mbawumita vumo, mbawuvuala mona yala, mbawumuhana jina egi Yesu.
32 Muene mbawukhala muthu wakoma, mbawutamegewa egi Mun’a Nzambi wa Gudinyinyiga. Yehowa Nzambi mbawumuhana nguasa ya ufumu ya sh’enji Davidi.
33 Muene mbawuhinyina gifua Fumu mu inzo ya Yakoba mayilago. Ufumu wenji mbawushigo mukhala nu gisugishilo.”
34 Uvi Madiya wawambelele muanjelo egi: “Luholo lutshi ndaga eji mbajibua, handaga ame khenji ngabungishile galego muila nu yala?”
35 Muanjelo wamuwambelele egi: “Nyuma ya Nzambi mbayigujila, ngolo jia Nzambi wa Gudinyinyiga mbajigutshuiga. Gishina giene mona mbawuvalewa mbawutamegewa egi muthu wa gijila, Mun’a Nzambi.
36 Tala! Elizabete phangi’aye wakhalele mutamegewa egi gisula,* muene nji udi gu vumo dia mona yala mu umbuta wenji. Henyaha vumo dienji diatagenesa gale mbeji samano.
37 Handaga gu meso a Nzambi gushigo nga ndaga imoshi yakola.”
38 Gungima Madiya wamuwambelele egi: “Ame ngudi muhiga wa Yehowa! Ndaga jiagasue jikalegewe gifua luholo wazuela.” Mu tangua diene, muanjelo wamubembele, wayile genji.
39 Mu masugu anyi, Madiya wazugile, wayile gatshididi gu khanda ya milundu gu dimbo dimoshi dia gu Yuda.
40 Wanginyile gumbo dia Zakaliya, wamenegene Elizabete.
41 Havile Elizabete lumene lua Madiya, mona wakhalele mu vumo dienji wadinyigishile, Elizabete wazalele pha nu nyuma ya Nzambi.
42 Elizabete wazuelele mu dijui diakola egi: “Nzambi wagusuanguluisa gubalega akhetu agasue. Wasuanguluisa nji mona udi mu vumo diaye!
43 Luholo lutshi ngaheta luendu lua guza mutalewa gudi gin’a Fumi’ami?
44 Handaga tangua ngavua lumene luaye, mona udi muvumo diami wadinyigisa nu gusuanguluga.
45 Gusuanguluga gukhale gudi mukhetu watshiginyile ndaga eji, handaga ndaga jiamuwambelewe jiakatuga gudi Yehowa nu mbajitagenesewa diago.”
46 Madiya wazuelele egi: “Ngudi* mutumbuisa Yehowa,
47 mutshima wami wajiyilego gungukanga njila ha gusuanguluga mukunda nu Nzambi, Muhuluishi wami.
48 Handaga wamonyi muhiga wenji wa mukhetu, ngatshima muhiga muene udi muthu wa githuhu. Tala! Sendese mangino, indongo yagasue ya athu mbayingutamega egi muenya gusuanguluga,
49 handaga Nzambi wa ngolo wangukalegela ndaga jiakoma, jina dienji didi dia gijila.
50 Handaga gindongo nu gindongo muene wana monesa khenda jienji gudi athu ana gumuvuila woma.
51 Muene watshita ndaga jiakola nu koko dienji, wamuanga athu adi nu lulendo mu mitshima yawo.
52 Muene wakatula athu a ngolo ha nguasa jiawo jia ufumu, wakanduisa athu a gudibulumuisa.
53 Muene wahanele ima yabonga gudi athu adi nu nzala, wakayele enya umonyi mago a githuhu.
54 Muene wakuatesele muenya mudimo wenji Isalele, wawunguluga khenda jienji mayilago,
55 gifua luholo ayizuelele gudi akhakh’etu nu gudi Abalahama nu gudi ajigulu* enji.”
56 Madiya wakhalele gumbo dia Elizabete mbeji thathu, gungima wavutugile gumbo dienji.
57 Tangua diakhalele naye guvuala Elizabete diataganele, wavalele mona yala.
58 Enya mu dimbo anyi akhalele n’enji hehi nu enya fami yenji avile egi Yehowa wamuvidile khenda jiavula, asuangulugile n’enji.
59 Mu lusugu lua nage ajile ha gumba mona gu mukanda, atshiginyile gumuhana jina dia sh’enji Zakaliya.
60 Uvi gin’enji wazuelele egi: “Ndo! Jina dienji Yone.”
61 Uvi ene amuwambelele egi: “Gushigo nga muthu mumoshi wa mu fami yaye udi nu jina edi.”
62 Hene ahudile sh’enji gu mago ha gujiya luholo ludi mutshigina muene gumutamega.
63 Watogele dibaya, wasonegele egi: “Jina dienji Yone.” Athu agasue adihudile.
64 Mu tangua diene, kano dienji diakangugile, ludimi luenji luajitulugile, wasendesele guzuela nu gutumbuisa Nzambi.
65 Athu agasue akhalele n’enji hehi mu dimbo avuile woma. Lumene lua ndaga eyi luamuanganele mu membo agasue a gu milundu ya gu Yudea.
66 Athu agasue avuile ndaga eyi ayibambele mu mitshima yawo, akhalele muzuela egi: “Mona yowu mbawukhala nanyi?” Handaga koko dia Yehowa diakhalele n’enji.
67 Gungima sh’enji Zakaliya wazalele pha nu nyuma ya Nzambi, wasendesele gulongesa egi:
68 “Yehowa Nzambi wa gu Isalele atumbuishiwe, handaga muene wavuila athu enji khenda nu waahuluisa.
69 Muene watuhana muhuluishi wa ngolo* wa mu giphuta* gia muenya mudimo wenji Davidi,
70 gifua muayizuelele muene mu njila ya baprofete enji a gijila a mu tangua dikulu.
71 Muene mbawutuhuluisa ha mago a enya gikembe etu nu ha mago a mbalagaji jietu.
72 Nzambi mbawutuvuila khenda luholo lualayele muene gudi akhakh’etu nu mbawuwunguluga gikotelo gienji gia gijila,
73 yakotelesa egi gudiloga guadilogele muene gudi khakh’etu Abalahama.
74 Mbawutuhuluisa ha mago a mbalagaji jietu, gungima mbawutuhana luendu lua gumukalegela mudimo wa gijila, woma ndo
75 nu gujinginyina guagasue nu giamatshidia giagasue gutuama dienji masugu agasue a monyo wetu.
76 Uvi aye mun’ami, mbawutamegewa egi profete wa Nzambi wa Gudinyinyiga, handaga mbawuwenda gutuama dia Yehowa ha gulondega njila jienji,
77 ha gulongesa athu enji egi muene mbawaahuluisa nu mbawaatotesela gubola guawo,
78 mukunda nu khenda jienji jiavula. Khenda jiene jiana katuga mu dilu mbajituhana muanya gifua hana zoga tangua,
79 ha guhana muanya gudi athu adi mu phipha nu adi mu givule-vule gia gufua nu ha gutuameza malu etu mu njila ya guhuima.”
80 Mona wakudile, wabuile muenya ngolo mu nyuma, wajingile mu mavu a luselenga uu nu lusugu luadimonesele muene gudi enya Isalele.
Mbimbi goshi'a diyiji
^ Nga “tuana tshigina.”
^ Tala Ukoteleshi wa Mbimbi.
^ Nga “gikunya.”
^ Nga “kutime.”
^ Nga “koko dia utata.”
^ Nga “sendese mu vumo dia gin’enji.”
^ Nga “wamonele vizio.”
^ Nga “mbobo.”
^ Nga “mudimo wa gijila.”
^ Nga “wasogewe.”
^ Nga “gikunya.”
^ Nga “monyo wami wagasue.” Tala Ukoteleshi wa Mbimbi.
^ Mu Greke: “vungu.”
^ Mu Greke: “lumbinga lua guhuluisa.”
^ Mu Greke: “mu inzo ya Davidi.”
