Mukanda wa Luka 10:1-42
-
Yesu watuma alandudi 70 ha guya mulongesa (1-12)
-
Yesu wata mukumbu gudi athu a mu membo anyi abalumuinego mutshima (13-16)
-
Alandudi 70 avutuga gudi Yesu (17-20)
-
Yesu watumbuisa Sh’enji handaga wana tshigina athu a gudibulumuisa (21-24)
-
Gifezegeselo gia muenya Samaliya wa mutshima wabonga (25-37)
-
Yesu waya mutala Mata nu Madiya (38-42)
10 Gungima dia ndaga eji, Fumu watombele alandudi ako 70, waatumine muyadi-muyadi mu membo agasue nu mu mafundo agasue akhalele naye muene guya.
2 Waawambelele egi: “Mbuto jia gukatula mu dihia jidi jiavula, uvi enya mudimo adi azonda. Hene, togenu Fumi’a dihia, hagula atume enya mudimo ha gukatula mbuto mu dihia.
3 Ndenu! Ngudi gumituma gifua imeme mukatshi dia mbulu.
4 Muzudigo kuba dia gubatela mbongo, nga dia gubatela ima ya gudia, nga jisaphata. Luko, mumenegago nga muthu* mu njila.
5 Fundo diagasue mbamungina monzo, zuelenu thomo egi: ‘Guhuima gukhale mu inzo eyi.’
6 Gula futa dia guhuima udi guene, guhuima guenu mbagukhala n’enji. Uvi gula gashigo guene, guhuima guenu mbagumivutugila.
7 Khalenu mu inzo yene, dienu nu nuenu ima mbaamihana, handaga muenya mudimo wana heta lufuto luenji. Muyigo inzo nu inzo.
8 “Luko, dimbo diagasue mbamungina, gula amiyamba, dienu ima mbaamihana.
9 Sagenu enya misongo mbamusanga guene, awambelenu egi: ‘Ufumu wa Nzambi wasuena hehi.’
10 Uvi gula muangina mu dimbo, enya mu dimbo diene nu gumiyamba ndo, zogenu mu njila jiakoma, zuelenu egi:
11 ‘Nu yene fuphi ya mu dimbo dienu yakuatshi gu ikanzo yetu, tudi gumilugumuina nayo. Uvi jiyenu egi Ufumu wa Nzambi wasuena hehi.’
12 Ngudi gumiwambela egi mu lusugu lua gusophesa, ndola ya dimbo dinyi mbayikhala yakola gubalega ya Sodoma .
13 “Mukumbu gudi enue enya Kolazina! Mukumbu gudi enue enya gu Betesayida! Handaga gula nga ndaga jia gushimana jiakalegewe gumbo dienu, jiakalegewe mu dimbo dia Tile nu dia Sidona, nga ene abalumuine gale mitshima mualeha, nga asudigile gale ngombo, nga akhalele gale hashi mu fuphi.
14 Gishina giene, mu tangua dia gusophesa, lamba dienu mbadikhala diakola gubalega dia enya gu Tile nu dia enya gu Sidona.
15 Aye Kaphelenauma, udi mutangiza egi mbawukanduishiwa uu nu mu dilu ba? Ndo sha. Aye mbawubulumuishiwa uu nu mu malumba!*
16 “Muthu wagasue wamitegelela wangutegelela nji ame. Uvi muthu wagasue wamituna, wangutuna nji ame. Muthu wangutuna ame, watuna nji yago wangutumine.”
17 Gungima alandudi 70 avutugile nu gusuanguluga, azuelele egi: “Fumu, nu bademo atutumagele tangua tuakalegela jina diaye.”
18 Muene waavutudile egi: “Ngamona Satana mubua mu dilu gifua guhenya gua mvula.
19 Tegelelenu! Ngamihanyi ngolo jia gudiata nyoga nu tuminyi-minyi* goshi’a ikanzo yenu; ngamihanyi nji uhinyinyi wa gubinga ngolo jiagasue jia mbalagaji. Gushigo nga nu gima gimoshi mbagimitshita gubola.
20 Uvi, musuangulugago handaga nyuma jiabola jiamitumagela, uvi suangulugenu handaga majina enu asonegewa mu dilu.”
21 Mu tangua diene, nyuma ya Nzambi yamuzalesele nu gusuanguluga, wazuelele egi: “Tata, Fumu ya dilu nu mavu, ngudi gugutumbuisa ha meso a athu agasue, handaga aye wasuegele ndaga eji muabonga gudi enya ndunge nu athu atema, uvi wajimonesele gudi ana azonda. Ayi Tata, handaga aye wasuangulugile ha gukalagala ngenyi.
22 Tata wanguhuile ima yagasue, gushigo nu muthu udi mujiya gula Mona udi nanyi, phamba Tata. Luko, gushigo nu muthu udi mujiya gula Tata udi nanyi, phamba Mona nu muthu yonu Mona adi mutshigina gulongesa ndaga jia Sh’enji.”
23 Gungima Yesu wabalumugile gudi alandudi, waawambelele mu gisuegi egi: “Gusuanguluga gukhale nu meso adi mumona ndaga eji mudi mumona.
24 Handaga ngudi gumiwambela egi baprofete nu mafumu avula akambele gumona ndaga eji mudi mumona, uvi ajimonelego. Akambele guvua ndaga eji mudi muvua, uvi ajivilego.”
25 Muthu mumoshi wakhalele mujiya mikhuala muabonga wazugile ha gumutela muheto, wamuhudile egi: “Mulongeshi, itshi ngudi naye gukalagala ha guheta monyo wa ivo nu ivo?”
26 Yesu wamuhudile egi: “Itshi idi yagusonega mu Mukhuala? Itshi wana tanga?”
27 Muthu muene wamuvutudile egi: “‘Zumba Yehowa Nzambi waye nu mutshima waye wagasue nu monyo* waye wagasue nu ngolo jiaye jiagasue nu matangi’aye agasue.’ ‘Zumba nji muthu na muku’enu gifua luholo wana zumba muila waye.’”
28 Yesu wamuwambelele egi: “Wahana mvutu yabonga diago; landula gutshita ndaga eji, mbawuheta monyo.”
29 Uvi muthu muene watshiginyile gudimonesa egi udi muthu wabonga, wahudile Yesu egi: “Nanyi udi lume muthu na muku’etu?”
30 Yesu wamuvutudile egi: “Yala mumoshi wakatugile gu Yelusalema ha gubulumuga gu Yeliko. Wataganele nu nzangi mu njila, jiamutambuile ima yenji nu milele yenji, jiamubetele, jiayile gajio, jiamubembele zegege.
31 Mu tangua diene, nganga-nzambi mumoshi wakhalele mubulumuga mu njila yene. Uvi tangua diamonele muene muthu muene, wabalegele gu khanda iko ya njila, wayile genji.
32 Luko, muenya Levi mumoshi wahetele ha fundo diene. Tangua diamonele muene muthu muene, muene nji wabalegele gu khanda iko ya njila, wayile genji.
33 Uvi muenya Samaliya mumoshi wakhalele mubalega mu njila yene, wahetele ha fundo diakhalele muthu muene. Hamumonele muene, wamuvidile khenda.
34 Wasuenele hehi n’enji, wamumbile maji nu matombe ha phuta, wajikangele ibanji. Gungima wamuhagele holu dia shitu yenji, wayile n’enji gu inzo ya ngenji, wamukuatesele.
35 Mu lusugu lualanduile, wazudile denye jiyadi, wajihanele gudi muthu wakhalele mutshita mudimo gu inzo ya ngenji, wamuwambelele egi: ‘Musage, makuta agasue mbawuzola holu dia makuta awa, mbanguguvutuila nawo tangua mbanguvutuga.’
36 Aye watangiza egi nanyi mukatshi dia athu awa mutatu wamonesele egi udi muthu na muku’etu gudi muthu wabetewe gudi nzangi?”
37 Wamuvutudile egi: “Muthu yonu wamuvidile khenda.” Yesu wamuwambelele egi: “Aye nji nda ukalagale ngenyi.”
38 Hakhalele ene muya, anginyile mu dimbo dimoshi. Mu dimbo diene guakhalele nu mukhetu mumoshi jina dienji Mata, wayambele Yesu gumbo dienji.
39 Mata wakhalele nu phangi’enji wa mukhetu jina dienji Madiya. Madiya wayile mukhala mu malu a Fumu ha gutegelela ndaga jiakhalele muene muzuela.*
40 Uvi Mata wabembele egi midimo yavula yakhalele muene mukalagala imuwunganese matangi. Hene, wasuenele gudi Yesu, wamuwambelele egi: “Fumu, ushigo mumona gubola luholo phangi’ami wangubembela midimo ame akhami? Muwambele aze angukuatese.”
41 Yesu wamuvutudile egi: “Mata, Mata, udi gudisagesa nu gudihana lamba mukunda nu ndaga jiavula.
42 Uvi phamba ima yazonda idi nu ndando, nga ndo gima gimoshi. Madiya watomba shinda diabonga,* mbadishigo gumutambudiwa.”
Mbimbi goshi'a diyiji
^ Nga “muyambigo nga muthu mumoshi ha gumumenega.”
^ Nga “Hadese,” yakotelesa egi, fundo ana funda athu agasue. Tala Ukoteleshi wa Mbimbi.
^ Nga “tuvuanga.”
^ Tala Ukoteleshi wa Mbimbi.
^ Mu Greke: “mbimbi yenji.”
^ Nga “khapho diabonga gubalega.”
