Mukanda wa Luka 11:1-54
-
Yesu udi mulongesa luholo lua gukombelela (1-13)
-
Luholo lua gukombelela (2-4)
-
-
Yesu wakaya bademo mu ukuateshi wa ngolo jia muno wa Nzambi (14-23)
-
Nyuma yabola yavutuga fundo yakhalele (24-26)
-
Ndaga yana batela athu gusuanguluga gua giamatshidia (27, 28)
-
Gijiyishilo gia Yona (29-32)
-
Muenda wa muila udi diso (33-36)
-
Yesu wata mukumbu gudi mafumu a ikombelelo ya mambo (37-54)
11 Lusugu lumoshi, Yesu wakhalele mukombelela ha fundo dimoshi ngenyi. Hamanesele muene gukombelela, mulandudi wenji mumoshi wamuwambelele egi: “Fumu, tulongese luholo lua gukombelela gifua luholo Yone alongesele alandudi enji.”
2 Waawambelele egi: “Tangua mudi mukombelela, zuelenu egi: ‘Tata, jina diaye dinemesewe.* Ufumu waye uze.
3 Tuhane ima ya gudia* ya lusugu nu lusugu gifua mudi nzala jietu jia lusugu nu lusugu.
4 Tutotesele gubola guetu handaga esue nji tuana totesela athu agasue ana gutukalegela gubola.* Ubembigo egi tubue mu gubola.’”
5 Gungima, waalezele egi: “Tangizenu egi muthu mumoshi mukatshi dienu udi nu futa dienji, waya gumumona mukatshi dia phipha, wamuwambela egi: ‘Futa diami, ngusombe mapha thathu,
6 handaga futa diami muko wakatuga mu njila waheta luenyelu gumbo diami, ngushigo nu gima gia gumuhana.’
7 Uvi muene wamuvutudila mukatshi dia inzo egi: ‘Bemba gunguhuidisa, gijidigo gidi gale giagujidiga, ame nu an’ami tudi ha gitanda. Ngajiyilego guzuga ha guguhana gima.’
8 Ngudi gumiwambela egi ikhale muene gazugilego ha gumuhana gima handaga udi futa dienji, uvi mukunda nu gufubidila guenji guakola, muene mbawuzuga nu mbawumuhana gima giagasue adi nagio funu.
9 Hene ngudi gumiwambela egi landulenu gutoga, mbaamihana; landulenu gukamba, mbamuheta; landulenu gukokola, mbaamizuluila.
10 Handaga muthu wagasue udi mutoga, mbaamuhana. Muthu wagasue udi mukamba, mbawuheta. Muthu wagasue udi mukokola, mbaamuzuluila.
11 Yadiago, tata mutshi mukatshi dienu gula mun’enji wamutoga ishui, muene amuhanyi nyoga ha fundo dia ishui?
12 Nga ndo, gula wamutoga diyi, muene amuhanyi gaminyi-minyi?*
13 Gula enue athu abola muana jiya guhana an’enu ima idi yabonga, jiyenu egi Tata mu dilu mbawuhana nyuma yenji gudi athu adi gumutoga nayo!”
14 Gungima Yesu wazolele demo diakhalele mubuisa muthu mumoshi gatabu.* Hazogele demo diene, gatabu gene gasendesele guzuela. Athu avula akhalele hene adihudile mangololo.
15 Uvi athu ako mukatshi diawo azuelele egi: “Muene udi mukaya bademo mu ngolo jia Belezebula,* fumu wa bademo.”
16 Uvi athu ako, ha gumutela muheto, asendesele gumutoga ha guahana gijiyishilo gia mu dilu.
17 Yesu wajiyile matangi’awo, hene waawambelele egi: “Ufumu wagasue udi wa gudikhapha wana gufua. Luko, inzo idi ya gudikhapha yana gubua.
18 Luholo lumoshi nji, gula Satana nji udi gudiluisa muene hakhenji, luholo lutshi ufumu wenji wajiya gumagana? Handaga enue mudi muzuela egi ngudi mukaya bademo mu ngolo jia Belezebula.
19 Gula ame ngudi mukaya bademo mu ngolo jia Belezebula, alandudi enu giwa adi guakaya mu ngolo jia nanyi? Gishina giene, ene mbaakhala manzuji enu.
20 Uvi gula ngudi mukaya bademo mu ukuateshi wa koko* dia Nzambi, jiyenu egi Ufumu wa Nzambi wamijila gale.
21 Gula muenya ngolo udi nu iluilo yatagana udi mubamba inzo yenji, ima yenji yana khala mu ubambi.
22 Uvi gula muthu muko udi nu ngolo jiavula gumubalega waza gumuluisa nu wamubinga, wana gumutambula iluilo yenji yagasue yakhalele mushila mutshima nu wana gukhapha ima yamutambula muene.
23 Muthu wagasue gashigo gu khanda yami, udi mbalagaji yami. Muthu wagasue gashigo mubungisa hamoshi nu ame, udi mumuanga.
24 “Gula nyuma yabola yazoga gudi muthu, yana guya mu mafundo a gimigina ha gukamba fundo yajiya gukhala; uvi gula yamonelego fundo diene, yana zuela egi ‘Ngudi muvutuga gu inzo yami fundo ngakatugile.’
25 Tangua yana vutuga, yana sanga inzo yagukomba nu yagulondega muabonga.
26 Gungima yana guya muzula nyuma jiko sambadi jiayibalega gubola, jiana ngina mukatshi jikhadi muene; gu gisugishilo muthu muene wana gubola muavula gubalega luholo luakhalele muene thomo.”
27 Hakhalele muene muzuela ndaga eji, mukhetu mumoshi wazuelele mu dijui diakola mukatshi dia athu egi: “Gusuanguluga gukhale nu mukhetu wagubatele mu vumo dienji nu waguwamuesele!”
28 Uvi muene wamuvutuile egi: “Ndo, gusuanguluga gukhale nu athu adi muvua mbimbi ya Nzambi nu adi guyitumagela!”
29 Tangua athu akhalele gudivudisa, wasendesele guawambela egi: “Gindongo egi gidi gindongo giabola; gidi mukamba gijiyishilo, uvi gushigo nga gijiyishilo gimoshi mbagiahanewa, phamba gijiyishilo gia Yona.
30 Handaga luholo Yona wabuile gijiyishilo mukunda nu enya gu Ninive, Mun’a muthu nji mbawukhala gijiyishilo mukunda nu gindongo egi.
31 Mu lusugu lua gusophesa, fumu wa mukhetu wa gu sud mbawufuzumuga hamoshi nu athu a mu gindongo egi nu mbawaafuisa milonga, handaga wakatugile gu gisugishilo gia mavu ha guza mutegelela ndunge jia Solomo. Uvi gudi nu muthu haha wabalega Solomo gukoma.
32 Mu lusugu lua gusophesa, enya gu Ninive mbaafuzumuga hamoshi nu gindongo egi nu mbaagifuisa milonga, handaga tangua avile ndaga jiaalongesele Yona, ene abalumuine mitshima. Uvi gudi nu muthu haha wabalega Yona gukoma.
33 Gula muthu walemesa muenda, ganago guwusuega nga guwuhaga moshi’a kinda,* uvi wana guwuhaga holu dia gihagelo gia muenda hagula egi athu adi mungina amone kiajiji.
34 Muenda wa muila udi diso. Gula diso diaye didi mutala gima gimoshi,* muila waye wagasue mbawuzala nji nu muanya.* Uvi gula diso diaye didi muvua nzala ya ima yangane,* muila waye nji mbawuzala nu phipha.
35 Hene, tema hagula muanya udi mukatshi diaye ubuigo phipha.
36 Hene gula muila waye wagasue udi nu kiajiji nu ushigo nga nu gitshinyi gimoshi gidi mu phipha, wene mbawukhala nu kiajiji gifua muenda udi guguhana kiajiji.”
37 Hazuelele Yesu ndaga eji, Mufalese mumoshi wamutamegele ha gudia gumbo dienji. Hene Yesu wayile, wakhalele gu mesa.
38 Uvi Mufalese muene wadihudile muavula ha gumona egi Yesu gawevelego mago* enji gutuama dia gudia.
39 Uvi Fumu wamuwambelele egi: “Enue Afalese, muana weva phamba holu dia khiopho nu holu dia longa, uvi mukatshi mudi aguzala pha nu nzala ya ima yangane nu khuta.
40 Mudi muaheya! Muthu wafugile hanze, ishigo muene wafugile nji mukatshi ba?
41 Uvi tangua mudi muhana phutu ima,* ahanenu ima ya mukatshi! Ngenyi, ima yenu yagasue mbayikhala yaphelegeta.
42 Lamba dienu enue Afalese, handaga muana hana giakumi gia mayiji a gibo nu gia mayiji a pheganone* nu mayiji ako agasue,* uvi muana bemba gukalagala ndaga jiabonga nu guzumba gua Nzambi! Muakhalele naye guhana ima eyi, uvi gubemba ndo gutshita ndaga jiko.
43 Lamba dienu enue Afalese, handaga muana tshigina gukhala mu mafundo a thomo* mu sinagoga, muana tshigina nji egi athu amimenege mu mafundo a zando!
44 Lamba dienu handaga enue mudi gifua malumba* anyi ashigo mutema gumuenega, athu adi muwenda holu diawo uvi ene gujiya ndo!”
45 Muthu mumoshi wakhalele mujiya mikhuala muabonga wamuwambelele egi: “Mulongeshi, ha udi muzuela ndaga eji, udi gutushingana nu esue nji.”
46 Muene wavutudile egi: “Lamba dienu nu enue nji athu muana gujiya Mikhuala muabonga, handaga muana hana athu inemo idi yakola ha gubata, uvi enue hakhenu muajiyilego guyikuata nga nu muno wenu umoshi.
47 “Lamba dienu, handaga muana tunga malumba* a baprofete, anyi akhakh’enu ashiyile!
48 Giamatshidia enue mudi mathemua a ndaga jiakalegele akhakh’enu nu mudi gujitshigina. Ene ashiyile baprofete, uvi enue mudi mutunga malumba awo.
49 Gishina giene Nzambi mu ndunge jienji wazuelele luko egi: ‘Mbanguatumila baprofete nu apostolo, ene mbaashiya nu mbaamonesa ako lamba,
50 hagula mahatshi a baprofete agasue anyi abunduiwe sendese gu gisendeselo gia mavu, akhale ha mito ya* athu a gindongo egi.
51 Sendese nu mahatshi Abele uu nu mahatshi a Zakaliya munu washiyiwe hakatshi dia giwotshielo nu tempelo.’* Giamatshidia ngudi gumiwambela egi mahatshi awo mbaakhala ha mito ya* athu a gindongo egi.
52 “Lamba dienu enue athu mudi mujiya mikhuala muabonga, handaga mudi mukatula saphi jia ujiyi. Enue hakhenu mushigo mungina, uvi athu adi mungina mudi guakanga njila!”
53 Hazogele muene monzo, alongeshi a mikhuala nu Afalese asendesele gumumanesa muavula nu gumusagesa nu mihu iko yavula.
54 Akhalele mukamba egi muene azuele nga mbimbi imoshi hagula ahete mulonga wa gumufundjila.
Mbimbi goshi'a diyiji
^ Nga “dikhale dia gijila.”
^ Mu Greke: “dipha.”
^ Mu Greke: “athu adi nu mukudi wetu.
^ Nga “kavuanga.”
^ Nga “mbobo.”
^ Jina diko dia Satana.
^ Mu Greke: “muno.”
^ Nga “kinda gia guzongela ima.”
^ Mu Greke: “didi diabola; didi dia shidi.”
^ Nga “waphelegeta.”
^ Nga “didi mumona muabonga.” Mu Greke: “didi dialeba.”
^ Yakotelesa egi, guweva mago gifua muakhalele mutoga shigu jia enya Yuda.
^ Mu Greke: “ima ya khenda.”
^ Mayiji a pheganone akhalele mukalegewa gihemba nu akhalele mudiwa.
^ Nga “mayiji ako a mu mahia.”
^ Nga “mafundo abalega gubonga.”
^ Nga “malumba a guwunguluga.”
^ Nga “malumba a guwunguluga.”
^ Nga “atogewe gudi.”
^ Mu Greke: “inzo.”
^ Nga “atogewe gudi.”
