Mukanda wa Luka 12:1-59
-
Yesu watemesa alandudi mukunda nu levire ya Afalese (1-3)
-
Yesu wawambela alandudi enji ha guvuila Nzambi woma, uvi athu ndo (4-7)
-
Muthu udi mutshigina egi udi mulandudi wa Klisto (8-12)
-
Gifezegeselo gia muenya umonyi waheya (13-21)
-
Bembenu gudisagesa (22-34)
-
Thundu yazonda (32)
-
-
Khalenu ya gudilonda (35-40)
-
Muenya mudimo wafubidila nu muenya mudimo gashigo wafubidila (41-48)
-
Ngajilego ha gubata guhuima, uvi ngajile ha gubata ukhaphumunyi (49-53)
-
Yesu wazuelela athu ana kamba gukotelesa ijiyishilo ya mu dilu nu ya ha mavu (54-56)
-
Yesu wamonesa luholo lua gulondega ndaga nu phangi’aye (57-59)
12 Mu tangua diene, athu adibungishile avula diago inunu nu inunu, akhalele gudidiata. Yesu wasendesele thomo guwambela alandudi enji egi: “Temenu mukunda nu levire ya Afalese, yene idi mambo awo.
2 Uvi gushigo nga gima gimoshi giasuegewe muabonga diago mbagishigo musologa. Gushigo nga gima gimoshi gia gisuegi mbagishigo mujiyiwa.
3 Hene, ndaga jiagasue mudi muzuela mu phipha, mbayivuiwa mu muanya. Ndaga mudi gudifetesa mu gisuegi, mbayitewa mukanda holu dia inzo.
4 Mafut’ami, ngudi gumiwambela luko egi muvigo woma wa athu adi mushiya muila, uvi gungima ajiyilego gukalagala gima giko.
5 Uvi, ngudi gumidijiga muthu mudi naye guvila woma. Vuenu woma wa Nzambi, yonu gula washiya muthu, gungima udi nu ufumu wa gumubishila mu Gehena.* Giamatshidia ngudi gumiwambela egi, Muene mudi naye guvuila woma.
6 Mbodio thano jiana sumbishiwa mu makuta mbadi a ndando yazonda. Uvi Nzambi ganago gujimbila* nga imoshi mukatshi diajio.
7 Uvi nu diene sanga dia mu mito yenu, muene wana guditanga diagasue. Muvigo woma; mudi nu ndando yavula gubalega mbodio jiavula.
8 “Ngudi gumiwambela egi, muthu wagasue watshigina ha meso a athu egi udi mulandudi wami, Mun’a muthu nji mbawumutshigina gu meso a anjelo a Nzambi egi muene udi mulandudi wenji.
9 Uvi muthu wangutuna ha meso a athu, mbawutunyiwa nji gu meso a anjelo a Nzambi.
10 Muthu wagasue wazuela ndaga jiabola mukunda nu Mun’a muthu, Nzambi mbawumutotesela; uvi muthu washingana nyuma ya Nzambi, mbaashigo gumutotesela.
11 Gula amibata gutuama dia basinagoga,* nga gutuama dia mafumu a leta, nga gutuama dia ahinyinyi, mudisagesago mukunda nu mvutu mudi naye guhana tangua mbaamisophesa, nga mukunda nu ndaga mbamuzuela.
12 Handaga mu tangua diene diago, nyuma ya Nzambi mbayimilongesa ndaga mudi naye guzuela.”
13 Muthu mumoshi mukatshi dia athu ene wamuwambelele egi: “Mulongeshi, wambela phangi’ami tukhaphe n’enji ima yatubembele tata.”
14 Muene wamuvutuile egi: “Yala, nanyi wanguhagi nzuji yenu, nga mukhaphi wa ima yenu?”
15 Yesu waawambelele egi: “Kangulenu meso, tunenu khadilo diagasue dia guvua nzala ya ima yangane, handaga ikhale muthu udi nu ima guvula gutshi, ima adi nayo yajiyilego gumuhana monyo.”
16 Gungima waahanele gifezegeselo gimoshi egi: “Mavu a muenya umonyi mumoshi azolele mbuto jiavula.
17 Wasendesele gutangiza egi: ‘Henyaha itshi ngukalagala handaga ngudi nu mbuto jiavula, ngushigo nu fundo dia gujihaga?’
18 Gungima wazuelele egi: ‘Tala ndaga mbangukalagala: Mbangumuanga mikala yami, gungima mbangutunga iko yakoma, mbangumba mbuto jiami jiagasue muene nu ima yami iko yagasue.
19 Gungima mbangudizuelela egi: “Udi nu ima yavula yabonga yabambewa mukunda nu ivo yavula; huluguga, dia, nua, suanguluga.”’
20 Uvi Nzambi wamuwambelele egi: ‘Aye udi muthu waheya, mu phipha ya mangino udi mufua. Ima eyi yagasue wabambi mbayikhala ya nanyi?’
21 Idi luholo lumoshi nu muthu udi mubamba umonyi wavula-vula mukunda nu muene hakhenji, uvi gu meso a Nzambi gashigo muenya umonyi.”
22 Gungima wawambelele alandudi enji egi: “Gishina giene ngudi gumiwambela gamba: Bembenu gudisagesa mukunda nu monyo wenu egi itshi mbatudia, nga mukunda nu mila yenu egi itshi mbatusudiga.
23 Handaga monyo udi nu ndando yavula gubalega ima ya gudia, muila udi nu ndando yavula gubalega milele.
24 Talenu ikuanga: yanago gukuna; yanago gukatula mbuto; yana khalago nu gibambelo nga mukala; uvi Nzambi wana guyidisa. Enue mushigo nu ndando yavula gubalega tunjila ba?
25 Nanyi mukatshi dienu, gula udi gudisagesa muavula, wajiya gulehesa monyo wenji nga hazonda?
26 Gula muajiyilego gukalagala ndaga eyi yazonda, mukunda natshi mudi gudisagesa giwa mukunda nu ndaga jiko?
27 Talenu luholo yaji yana gukula: Yanago gukalagala mudimo nga gutunga milele; uvi ame ngudi gumiwambela egi, nga muene Solomo mu lutumbu luenji luagasue, gasudigilego milele yabonga gifua yaji eyi.
28 Gula Nzambi udi musudigisa muangu wa mu temu udi guene mangino, hamene ubishidiwa ha tshuya, muene mbagashigo gumisudigisa muavula, enue enya gutshigina guazonda!
29 Bembenu gudihula egi itshi mbamudia nu itshi mbamunua, bembenu nji gudisagesa muavula;
30 handaga enya ifutshi ya ha mavu awa ana gudisagesa mukunda nu ima eyi yagasue, uvi Sh’enu udi mujiya egi mudi nu funu ya ima eyi.
31 Uvi landulenu gukamba Ufumu wenji, gungima muene mbawumilunda ima eyi.
32 “Aye thundu yazonda uvigo woma, handaga Sh’enu wasuanguluga ha gumihana Ufumu.
33 Sumbisenu ikumba yenu ha guhana phutu ima.* Londegenu makuba a falanga anyi ajiyilego gubola, umonyi unu wajiyilego guhua mu dilu, fundo nzangi yajiyilego gungina ha gukuya, nga sualala jiajiyilego guwudia.
34 Handaga fundo didi umonyi wenu, diene mbadikhala mitshima yenu.
35 “Sudigenu milele, khalenu ya gudilonda,* mienda yenu ikhale mulema.
36 Mudi naye gukhala gifua athu adi munengena fumi’awo udi muvutuga gu ulo ha guza gumukangudila mufulo tangua mbadikokola muene.
37 Gusuanguluga gukhale nu enya mudimo ene gula fumu waza waasanga adi mutala! Ngudi gumiwambela giamatshidia egi muene mbawudilonda,* mbawakhalesa gu mesa, mbawuza ha guahana ima ya gudia.
38 Ene mbakhala nu gusuanguluga gula muene waza mu midi ya phipha* nga mu makolombolo,* waasanga agudilonda.
39 Uvi jiyenu ndaga eyi, gula nga fumi’a inzo wajiyile tangua diakhalele naye guza nzangi, nga gabembelego egi muene abule inzo yenji.
40 Enue nji khalenu ya gudilonda, handaga Mun’a muthu mbawuza mu tangua dinyi enue mushigo mutangiza.”
41 Phetelo wamuhudile egi: “Fumu, wahana gifezegeselo egi phamba mukunda nu esue nga mukunda nu athu agasue?”
42 Fumu wamuvutudile egi: “Nanyi udi muenya mudimo* wafubidila nu watema, yonu fumi’enji mbaahaga holu dia enya mudimo agasue, ha gulandula guahana ima yawo ya gudia mu tangua diatagana?
43 Muhiga muene mbawukhala nu gusuanguluga gula fumi’enji waza wamusanga nu gukalagala ngenyi!
44 Ngudi gumiwambela giamatshidia egi muene mbawumuhaga mutaledi wa ima yenji yagasue.
45 Uvi gula muhiga muene wazuela mu mutshima wenji egi, ‘Fumi’ami udi mushipha ha guza,’ wasendesa gubeta enya mudimo a mala nu a akhetu nu gudia nu gunua nu gukuatewa matombe,
46 fumu wa muhiga muene mbawuza mu lusugu nu mu tangua dinyi muhiga muene gashigo mujiya. Mbawumuhana ndola yakola nu mbawumuhaga gu khanda ya athu ashigo agujinginyina.
47 Muhiga owu wakotelesele ndaga yakhalele mutshigina fumi’enji, uvi muene gadilondelego nu gakalagelego ndaga yakhalele gumutoga muene.* Hene, mbawubetewa fimbo jiavula.
48 Uvi muthu munu gakoteleselego nu wakalagala ndaga jinyi jidi mutoga egi abetewe, udi naye gubetewa fimbo jiazonda. Muthu wahanewe ima yavula mbaamutoga nji yavula, muthu wahanewe ginemo gia ndaga jiavula, mbaamutoga nji ima yavula gubalega inyi yana togewa.
49 “Ngajile ha gulemesa tshuya ha mavu; uvi gula tuene tualemi gale, itshi ngajiya gukalagala luko?
50 Gudi nu gubatijiwa ngudi naye gubatijiwa; mbangukhala nu gikenene uu nu tangua gubatijiwa guene mbagukalegewa!
51 Mudi mutangiza egi ngajile ha gubata guhuima ha mavu ba? Ndo sha, ngudi gumiwambela egi ngajile ha gubata ukhaphumunyi.
52 Handaga sendese henyaha, gula inzo imoshi idi nu ana thano, ene mbaakhala agukhaphumuna. Athu thathu mbaakhala nu umbalagaji nu athu mbadi, athu mbadi mbaakhala umbalagaji nu athu thathu.
53 Ene mbaakhala agudikhaphumuna, tata mbawukhala nu umbalagaji nu mun’enji wa yala, mon’a yala mbawukhala nu umbalagaji nu sh’enji. Mama mbawukhala nu umbalagaji nu mun’enji wa mukhetu, mon’a mukhetu mbawukhala nu umbalagaji nu gin’enji. Giwaji gia mukhetu mbawukhala nu umbalagaji nu mukaji’a mun’enji, mukaji’a mun’enji mbawukhala nu umbalagaji nu gin’a mulumi’enji.”
54 Gungima wawambelele luko athu avula egi: “Tangua muana mona tuta muzoga gu mayilo a kumbi, muana zuela gatshididi egi: ‘Mvula ya gikudi idi muza,’ nu yana guza.
55 Tangua muana mona funji muza gu khanda ya sud, muana zuela egi, ‘Muanya umukhala wabala,’ nu wana khala ngenyi.
56 Enue enya mambo, enue muana jiya gukotelesa luholo ludi mavu nu dilu, uvi mukunda natshi muanago gujiya gukotelesa ndaga jidi mubalega mu sungi eyi?
57 Mukunda natshi enue hakhenu nji mushigo mukotelesa ndaga jiabonga?
58 Ha gufezegesa, gula udi nu mulonga nu muthu, mudi muya n’enji ha gusopha gutuama dia fumu, kalagala ngolo ha gumanesela n’enji mulonga ha mudi n’enji mu njila. Gula ndo wajiya gugubata gutuama dia nzuji, nzuji mbawuguhana ha mago a mubambi wa bologo, mubambi wa bologo mbawugumba mu bologo.
59 Ngudi guguwambela egi mbawushigo muzoga mu bologo gula wafutshilego makuta enji agasue.”*
Mbimbi goshi'a diyiji
^ Tala Ukoteleshi wa Mbimbi.
^ Nga “gubuita mutshima.”
^ Nga ndo yajiya gukhala egi, “gutuama dia athu avula.”
^ Nga “guhana phutu ima ya khenda.”
^ Mu Greke: “Miya yenu ha kete.”
^ Nga “mbawusudiga milele.”
^ Mu Greke: tangua dia mbadi dia gukengelela. Mu masugu a Yesu, tangua diene diakhalele musendesa mu kumbi dia 9 ya phipha uu nu mu midi ya phipha.
^ Mu Greke: tangua dia thathu dia gukengelela. Mu masugu a Yesu, tangua diene diakhalele musendesa mu midi ya phipha uu nu mu tangua dia thathu dia mu gimenegena.
^ Nga “mubambi wa inzo.”
^ Nga “gukalagala gifua mudi gutshigina guenji.”
^ Nga “nga kuta dimoshi diazonda gusala ndo.”
