Mukanda wa Luka 13:1-35
-
Gula wabalumuinego mutshima mbawushiyiwa (1-5)
-
Gifezegeselo gia mutshi wa figi wakhalelego muhaga mabundu (6-9)
-
Yesu wasaga mukhetu wakhalele wagudifugula mu Lusugu lua Guhuluguga (10-17)
-
Gifezegeselo gia lumbale lua mutada nu gia levire (18-21)
-
Tshitenu ngolo ha gungina mu mufulo wazonda (22-30)
-
Yesu watamega Helode egi “mukenge” (31-33)
-
Yesu wavua gikenene mukunda nu dimbo dia Yelusalema (34, 35)
13 Mu tangua diene, athu ako anyi akhalele hene atele Yesu lumene lua enya gu Galilea, anyi ashiyiwe gudi Philato tangua akhalele muhana milambu yawo.
2 Muene waavutudile egi: “Enue mudi mutangiza egi enya gu Galilea anyi ashiyiwe handaga akhalele athu abola gubalega enya gu Galilea ako agasue ba?
3 Ndo sha; ngudi gumiwambela egi, gula enue nji muabalumuinego mitshima, mukut’enu agasue mbamushiyiwa luholo lumoshi.
4 Nga ndo, mudi mutangiza egi athu 18 anyi inzo yaleha ya Siloe yabuidile nu yashiyile, akhalele athu abola gubalega athu agasue gu Yelusalema ba?
5 Ndo sha; ngudi gumiwambela egi gula enue nji muabalumuinego mitshima, mukut’enu agasue mbamushiyiwa gifua ene.”
6 Gungima waahanele gifezegeselo egi: “Muthu mumoshi wakhalele nu mutshi wa figi wakunyile muene mu dihia dienji dia vinyo. Wajile ha guhela mabundu uvi gasangelego nga dimoshi.
7 Gungima wawambelele muthu wana tala dihia dia vinyo egi: ‘Ngana guza mukamba mabundu gu mutshi owu wa figi ivo thathu yabalega gale, uvi nganago gusanga nga bundu dimoshi. Ubatule! Mukunda natshi udi muzangela mavu?’
8 Muthu muene wamuwambelele egi: ‘Fumu, ubembe gale givo gimoshi uu nu tangua mbanguphunda ha mushina wenji nu mbanguwumbila tuji tua shitu.
9 Gula mu masugu adi muza wahaga mabundu, idi ndaga yawaha; gula ndo, mbawuwubatule.’”
10 Lusugu lumoshi, Yesu wakhalele mulongesa mu sinagoga mu Lusugu lua Guhuluguga.
11 Mu sinagoga yene, guakhalele nu mukhetu mumoshi wakhalele nu nyuma yabola yakhalele gumulebesa ivo 18; wakhalele wagudifugula, gakhalelego nu luholo lua gumagana.
12 Tangua diamumonele Yesu, wamuwambelele egi: “Mukhetu, wasagewa gu misongo yaye.”
13 Wamuhagele mago, mukhetu muene wamaganele mbala imoshi, wasendesele gutumbuisa Nzambi.
14 Uvi, mutuameji wa sinagoga wavile khabu handaga Yesu wasagele muthu mu Lusugu lua Guhuluguga. Wawambelele athu avula akhalele hene egi: “Masugu a mudimo adi asamano; izenu mu masugu ene hagula amisage, uvi mu Lusugu lua Guhuluguga ndo.”
15 Fumu wamuwambelele egi: “Enya mambo, nanyi mukatshi dienu ganago gujitulula ngombe nga phunda yenji ha guyizola ha guya guyinuisa mu Lusugu lua Guhuluguga?
16 Mukhetu owu udi mujigulu wa Abalahama, Satana wamujitshigile gale ivo 18, ishigo yabonga egi muene ajituluiwe mu Lusugu lua Guhuluguga ba?”
17 Hazuelele muene ngenyi, mbalagaji jienji jiagasue jiavuile musonyi, uvi athu agasue avula asendesele gusuanguluga mukunda nu ndaga jiagasue jia gushimana jiatshitshile muene.
18 Wazuelele egi: “Ufumu wa Nzambi wajiya gukhala gifua itshi? Ngajiya guwufuanesa nu itshi?
19 Udi gifua lumbale lua mutada luazanguile muthu ha gukuna mu dihia dienji, luakudile nu luabuile mutshi wakoma, tunjila tua gosa tuajile mutunga yanzu yato mu thango jienji.”
20 Wazuelele luko egi: “Ngajiya gufuanesa Ufumu wa Nzambi nu itshi?
21 Udi gifua levire yazanguile mukhetu mumoshi, wayifutula mu izongelo* yakoma thathu ya phupha. Gungima phupha yagasue yajimbile.”
22 Gungima, Yesu wayile mu membo akoma nu azonda; wakhalele muya nu gulongesa njila-njila uu nu gu Yelusalema.
23 Muthu mumoshi wamuhudile egi: “Fumu, athu azonda mbaahuluga ba?” Muene waawambelele egi:
24 Kalagalenu ngolo ha gungina mu mufulo wazonda, handaga ngudi gumiwambela egi athu avula mbaakamba luholo lua gungina, uvi mbagiakuma.
25 Tangua mbadizuga fumi’a inzo, wakanga gijidigo, enue mbamukhala hanze. Mbamubunda gu gijidigo nu mbamuzuela egi: ‘Fumu, tukangudile mufulo.’ Uvi muene mbawumivutudila egi: ‘Ngushigo mujiya gula muakatuga gui.’
26 Gungima enue mbamusendesa guzuela egi: ‘Tuadile naye nu tuanuile naye, aye walongesele nji mu njila jietu jiakoma.’
27 Uvi muene mbawumiwambela egi: ‘Ngushigo mujiya gula muakatuga gui. Katugenu gutuama diami, enue agasue atshitshi a ndaga jiabola!’
28 Guene mbamukhala mudila nu gudidia mazo tangua mbamumona Abalahama nu Isaka nu Yakoba nu baprofete agasue mu Ufumu wa Nzambi, uvi enue mbamubishidiwa hanze.
29 Luko, athu mbaakatuga gu khanda ya mazogelo a kumbi nu gu mayilo a kumbi nu gu thunda nu gu mbongo, mbaaza mukhala gu mesa mu Ufumu wa Nzambi.
30 Jiyenu egi gudi nu athu a gisugishilo mbaabua athu a thomo, gudi nji nu athu a thomo mbaabua athu a gisugishilo.”
31 Mu tangua diene, Afalese ajile, amuwambelele egi: “Katuga haha uye handaga Helode udi mutshigina gugushiya.”
32 Muene waawambelele egi: “Ndenu muwambele mukenge unu egi, ‘Tala! Mangino nu hamene ngudi mukaya bademo, ngudi nji musaga athu; mbangumanesela mu lusugu lua thathu.’
33 Uvi ngudi naye gulandula njila yami mangino nu hamene, nu hamene dinyi, handaga profete gajiyilego* gushiyiwa hanze ya Yelusalema.
34 Yelusalema, Yelusalema, dimbo diana shiya baprofete nu diana sonona maseso gudi athu ana tumiwa guene. Iphungu guvula gutshi ngatshiginyile gubungisa an’aye gifua luholo susua yana bungisa an’enji mu mahambu. Uvi enue muatshiginyilego.
35 Talenu! Amibembela inzo yenu. Ngudi gumiwambela egi, mbamushigo gungumona luko uu nu tangua mbamuzuela egi: ‘Gusuanguluga gukhale nu muthu udi muza mu jina dia Yehowa!’”
Mbimbi goshi'a diyiji
^ Mu Greke: “izongelo ya seya.” Seya imoshi yakhalele ba litre 7,33.
^ Nga “ishigo yatagana.”
