Mukanda wa Luka 14:1-35
-
Yesu wasaga yala mumoshi wakhalele nu misongo yana jimbisa muila mu Lusugu lumoshi lua Guhuluguga (1-6)
-
Gula agutamega gu wano monesa khadilo dia gudibulumuisa (7-11)
-
Tamega athu anyi ajiyilego guguvutudila nga gima (12-14)
-
Gifezegeselo gia athu atunyine guza gu wano (15-24)
-
Ndaga tudi naye gutshita ha gubua alandudi a Yesu (25-33)
-
Mungua wasumunuga (34, 35)
14 Mu Lusugu lumoshi lua Guhuluguga, Yesu wayile mudia gumbo dia fumu wa Afalese, ene akhalele gumutala muabonga.
2 Guakhalele nu yala mumoshi gutuama dienji, wakhalele mukata misongo yana jimbisa muila.
3 Hene, Yesu wahudile athu ana gujiya Mikhuala muabonga nu Afalese egi: “Mukhuala udi muhana njila ha gusaga muthu mu Lusugu lua Guhuluguga nga ndo?”
4 Uvi ene ahenele tedie. Wakuatele muthu muene, wamusagele nu wamubembele ha guya.
5 Gungima waahudile egi: “Nanyi mukatshi dienu gula mun’enji nga ngombe yenji yabua mu wina mu Lusugu lua Guhuluguga, muene gajiyilego guyizola mbala imoshi?”
6 Ene akhalelego nu mvutu ya gumuhana.
7 Hamonele muene egi athu anyi atamegewe akhalele guditombela mafundo abalega gubonga, waahanele gifezegeselo gimoshi. Waawambelele egi:
8 “Gula agutamega ha gudia gu wano wa ulo, uditombelago fundo diabalega gubonga. Handaga yajiya gukhala egi muthu muko wagubalega watamegewa nji.
9 Gungima muthu wamitamega enue mbadi mbawuza guguwambela egi: ‘Bemba fundo edi mukunda nu muthu owu.’ Aye na mbawuzuga nu musonyi ha guya mukhala ha fundo dia gungima.
10 Uvi gula agutamega, nda ukhale ha fundo dia gungima. Gula muthu wagutamega waza, mbawuguwambela egi: ‘Yala, nda ukhale ha fundo dia gutuama.’ Ngenyi, mbawunemesewa ha meso a athu agasue atamegewa.
11 Handaga muthu wagasue udi gudikanduisa, mbawubulumuishiwa, uvi muthu udi gudibulumuisa, mbawukanduishiwa.”
12 Gungima wawambelele nji muthu wamutamegele egi: “Tangua udi mulondega ima ya gudia, ikhale mu midi nga mu ngueze, utamegago mafuta aye, nga aphangi’aye, nga enya fami yaye, nga enya umonyi anyi wakhala nawo hehi. Gula ndo, ene nji mbaagutamega, ngenyi mbayikhala gifua gishimbigo giaye.
13 Uvi tangua udi mukalagala wano, tamega phutu nu athu akhala nu mago a gufua nu ikata nu ifofo.
14 Aye mbawukhala nu gusuanguluga, handaga ene ashigo nga nu gima gimoshi gia guguhana, mbawuheta gishimbigo giaye mu gufuzumuga gua athu abonga.”
15 Havile ene ndaga eji, muthu mumoshi akhalele n’enji gu mesa wazuelele egi: “Gusuanguluga gukhale nu muthu udi mudia* mu Ufumu wa Nzambi.”
16 Yesu wamuvutudile gamba: “Muthu mumoshi wakalegele wano wakoma, watamegele athu avula.
17 Hataganele kumbi dia gudia, watumine muenya mudimo wenji ha guwambela athu anyi atamegewe egi: ‘Izenu, handaga ima yagasue idi ya gulonda.’
18 Uvi mukut’awo agasue asendesele gumuwambela ndaga jia luholo nu luholo hagula ayigo gu wano wene. Muthu wa thomo wamuwambelele egi: ‘Ngasumbi dihia diami, ngudi naye guya ha guditala; ngagububila, ngutotesele.’
19 Muthu muko wamuwambelele egi: ‘Ngasumbi ngombe jiami kumi,* ngudi muya hagula ngujilole ha ngujiya gula jiajiya gutshita mudimo muabonga; ngagububila, ngutotesele.’
20 Muthu muko wazuelele egi: ‘Ngakatuga guzula mukhetu mu ulo, gishina giene ngajiyilego guza.’
21 Muenya mudimo wawambelele fumi’enji ndaga jiene. Hene, fumi’a inzo wavuile khabu jiavula, wawambelele muenya mudimo wenji egi: ‘Nda mu phushi mu njila jiakoma nu mu phambu jia mu dimbo, ngubatele phutu nu athu adi mago a gufua nu ifofo nu ikata.’
22 Muenya mudimo wavutugile, wawambelele fumi’enji egi: ‘Fumu, ngakalagala ndaga jiagasue wanguwambela, uvi mafundo ako asala a githuhu.’
23 Fumu wawambelele muenya mudimo egi: ‘Nda mu njila jiakoma nu mu njila jiko jidi hanze ya dimbo, wambela athu aze hagula inzo yami izale pha nu athu.
24 Handaga ngudi guguwambela egi, gushigo nga muthu mumoshi mukatshi dia athu anyi ngatamegele mbawudia ima ya wano ngalondji.’”
25 Gungima, athu avula diago akhalele muya n’enji mu njila. Yesu wabalumugile, waawambelele egi:
26 “Muthu wagasue udi muza gudi ame, gula gatunyilego* sh’enji, nga gin’enji, nga mukaji’enji, nga an’enji, nga aphangi’enji a mala, nga aphangi’enji a akhetu, nga monyo wenji diago, muene gajiyilego gukhala mulandudi wami.
27 Muthu gashigo mubata mutshi wenji wa lamba* nu gashigo gungulandula gajiyilego gukhala mulandudi wami.
28 Ha gufezegesa, nanyi mukatshi dienu gula watshigina gutunga inzo yaleha, gashigo mudianga gukhala hashi ha gutangiza falanga inzo yene mbayitoga nu ha gumona gula muene udi nu falanga jiatagana ha guyimanesela?
29 Gula ndo, muene wajiya guhaga fondasio, uvi luholo lua guyimanesela lushigo. Ngenyi athu agasue mbaayimona mbaasendesa gumulela,
30 egi: ‘Muthu owu wasendesele gutunga inzo, uvi gabingilego ha guyimanesa.’
31 Nga ndo, gula fumu mumoshi udi nu masuta 10 000 watshigina guzoga ha gulua ita nu fumu muko udi nu masuta 20 000, udi naye thomo gukhala hashi, ayi giphungi nu manene enji ha gujiya gula udi watagana ha gulua nu fumu muene.
32 Giamatshidia, gula muene gashigo watagana ha gulua n’enji, hadi fumu muene gualeha, muene mbawutuma makongo ha gukamba guhuima.
33 Luholo lumoshi nji, jiyenu egi muthu gashigo mubemba ima yenji yagasue, gajiyilego gukhala mulandudi wami.
34 “Yadiago, mungua wakhala wafula. Uvi gula wasumunuga,* nu itshi muajiya guvutula luko gufula guawo?
35 Ushigo luko wabonga ha gumbiwa mu mahia nga ha gukuatesa mavu hagula azole mbuto muabonga. Athu ana guwubishila hanze. Muthu udi nu matshui a guvua, avue.”
Mbimbi goshi'a diyiji
^ Mu Greke: “udi mudia dipha.”
^ Mu Greke: “ngombe thano jia akaji, thano jia alume.”
^ Nga “gashigo muzumba muavula.”
^ Tala Ukoteleshi wa Mbimbi.
^ Nga “watotesa ngolo jiawo.”
