Mukanda wa Luka 15:1-32
15 Afutshishi a gitadi agasue nu enya gubola adibungishile fundo diakhalele Yesu ha gumutegelela.
2 Afalese nu alongeshi a mikhuala asendesele guzuela ndaga jiabola mukunda nu muene egi: “Muthu owu udi muyamba enya gubola, udi nji mudia nawo.”
3 Gungima, muene waahanele gifezegeselo egi:
4 “Nanyi mukatshi dienu gula udi nu imeme 100, uvi watotesa gimoshi, muene gashigo mubemba imeme 99 mu temu ha guya mukamba ginyi gimoshi giatotshi uu nu hagimona muene?
5 Gula muene wagimona, mbawugihaga ha phanga jienji nu mbawusuanguluga muavula.
6 Gula wavutuga gumbo dienji, mbawutamega mafuta enji nu athu ana khala n’enji hehi ha guawambela egi: ‘Izenu tusuangulugenu hamoshi, handaga ngamona gimeme giami ginyi giatotele.’
7 Ngudi gumiwambela egi, luholo lumoshi nji, gusuanguluga mbagukhala guavula mu dilu mukunda nu muenya gubola mumoshi munu wabalumuna mutshima, gubalega athu 99 abonga anyi ashigo nu funu ya gubalumuna mutshima.
8 “Gula mukhetu mumoshi udi nu yamo kumi ya drakime, uvi gula watotesa gimoshi, mbaashigo mulemesa muenda nu gukomba inzo yenji ha gukamba muabonga uu nu tangua mbaagimona ba?
9 Gula wagimona, mbawutamega mafut’enji* nu athu ana khala n’enji hehi ha guawambela egi: ‘Izenu tusuangulugenu hamoshi handaga ngamona kiamo giami gia drakime ginyi giatotele.’
10 Ngudi gumiwambela egi, luholo lumoshi nji, anjelo a Nzambi ana suanguluga muavula gula muenya gubola mumoshi wabalumuna mutshima.”
11 Gungima wazuelele egi: “Yala mumoshi wakhalele nu ana mbadi a mala.
12 Mona wa galenge wawambelele sh’enji egi: ‘Tata, nguhane shinda diami dia ima ngudi naye guzula.’ Hene, sh’awo waakhaphelele ikumba yenji.
13 Gungima dia masugu azonda, mona wa galenge wabungishile ima yenji yagasue, wakuatele njila, wayile mu gifutshi gia gualeha. Wabolesele ima yenji* mu gifutshi giene mu ndaga jia musonyi jiakhalele mukalagala muene.
14 Hamanesele muene ikumba yagasue, nzala yabala yajile mu gifutshi ginyi, wasendesele gumona lamba.
15 Wayile mukamba mudimo gudi muthu mumoshi mu gifutshi giene, muthu muene wamutumine mu mahia enji ha gubamba ngulu.
16 Wakhalele mutshigina gudia makunde akhalele mudia ngulu, uvi guakhalelego nga nu muthu wa gumuhana nga gima.
17 “Hakotelesele muene egi wakalegele gubola, wasendesele gudibela egi: ‘Enya mudimo a tata adi nu ima yavula ya gudia,* uvi ame ngudi mulaba gufua nzala haha!
18 Ngudi muzuga ha guvutuga gudi tata, mbangumuwambela egi: “Tata, ngakalegele Nzambi gubola, ngagukalegele nji aye gubola.
19 Ngushigo luko ngatagana ha gukhala mun’aye. Ngubuise gami muenya mudimo waye.”’
20 Hene, wakuatele njila, wavutugile gudi sh’enji. Hakhalele muene ndambo gualeha, sh’enji wamumonele, wavuile khenda, wayile phushi gumutagana, wamuyambele,* wamuhanele beze nu gisemo giagasue.
21 Gungima mun’enji wamuwambelele egi: ‘Tata, ngakalegele Nzambi gubola, ngagukalegele nji aye gubola, ngushigo luko ngatagana ha gukhala mun’aye.’
22 Uvi sh’enji wawambelele enya mudimo enji egi: ‘Izenu muphushi nu mulele wabonga, mumusudige nawo. Munginyisenu luphete gu muno, musudigienu jisaphata jiabonga gu malu.
23 Zangulenu nji gana ga ngombe gamaji-maji, mugashiye, tudienu, tukalagalenu wano,
24 handaga mun’ami yowu wakhalele wa gufua uvi waheta luko monyo; watotele, uvi wamonega.’ Asendesele gusuanguluga muavula.
25 “Mu tangua diene, mun’enji wa somi wakhalele gu mahia. Hakhalele muene muvutuga, wahetele hehi nu inzo, wavuile matululu a gizembe nu ulumbu wakhalele mukina athu.
26 Watamegele muenya mudimo mumoshi, wamuhudile ha gujiya gula itshi yakhalele mukalegewa.
27 Wamuwambelele egi: ‘Phangi’aye wavutuga, hene sh’aye wamushiyila mun’a ngombe wa maji-maji, handaga wavutuga nu muila wabonga.’*
28 Uvi mona wa somi wavuile khabu, watunyile gungina. Gungima sh’enji wazogele, wasendesele gumuzonza ha gungina.
29 Muene wawambelele sh’enji egi: ‘Tata! Ngana gugukalegela mudimo gifua muhiga ivo yavula, khenji ngagushagelego nga hazonda, uvi khenji wanguhanelego mun’a ngombe nga lusugu lumoshi hagula ngukalagale wano nu mafut’ami.
30 Uvi havutuga mun’aye yowu wazangelele* ima yaye nu akhetu a thambi, aye wamushiyila mun’a ngombe wa maji-maji.’
31 Sh’enji wamuwambelele egi: ‘Mun’ami, aye wakhala nu ame tangua diagasue, ima yagasue ngudi nayo, idi yaye.
32 Tudi naye gukalagala wano, tudi naye nji gusuanguluga handaga phangi’aye wafuile, uvi waheta luko monyo; watotele, henyaha wamonega.’”
Mbimbi goshi'a diyiji
^ Nga “mafut’enji a akhetu.”
^ Nga “wazangelele ima yenji; gakhalelego mutangiza malamba ajiya gumubuila.”
^ Mu Greke: “adi nu mapha avula.”
^ Mu Greke: “wamubuidile ha phanga.”
^ Nga “nu monyo.”
^ Mu Greke: “wabolesele.”
