Mukanda wa Luka 16:1-31
16 Gungima wawambelele luko alandudi egi: “Muenya umonyi mumoshi wakhalele nu gaphita* genji ga mudimo. Gaphita gene gafundjiwe egi gakhalele mubolesa ima yenji.
2 Hene, watamegele gaphita gene, wamuwambelele egi: ‘Itshi ngudi muvua athu adi muzuela mukunda nu aye? Ngusonegele luholo wana tshita mudimo waye wa gaphita, handaga aye mbawushigo luko mutuameza inzo yami.’
3 Gungima gaphita gene gazuelele egi: ‘Fumi’ami udi mutshigina gungukatula gu mudimo, itshi mbangutshita? Ngushigo nu ngolo jia gudima mavu, ngudi muvua nji musonyi ha guya mutoga athu ima.
4 Ah! Ngajiya ndaga ngudi naye gutshita, hagula athu mbaanguyambe gumbo diawo tangua mbaangukatula gu mudimo.’
5 Watamegele athu akhalele nu mikudi ya fumi’enji, wahudile muthu wa thomo egi: ‘Udi nu mukudi wa fumi’ami guvula gutshi?’
6 Muthu muene wamuvutudile egi: ‘Izongelo lukhama* ya maji a olive.’ Muene wamuwambelele egi: ‘Khala hashi, zangula mukanda waye wa mukudi, sonega muphushi egi izongelo 50.’
7 Gungima, wayile gudi muthu muko, wamuhudile egi: ‘Aye udi nu mukudi guvula gutshi?’ Muthu muene wamuvutudile egi: ‘Izongelo yakoma lukhama* ya ble.’ Muene wamuwambelele egi: ‘Zangula mukanda waye wa mukudi, sonega egi izongelo 80.’
8 Ikhale gaphita muene wakhalele muthu wabola, uvi fumi’enji wamushimanele handaga wakalagele ndaga nu gutema guagasue; handaga ana a ha mavu awa* ana kalegela ana a mu gindongo giawo ndaga nu gutema guagasue gubalega ana a muanya.
9 “Ngudi gumiwambela luko egi: Kuatenu mafuta mu njila ya umonyi ushigo watagana, hagula tangua mbawutota, ene amiyambi mu mafundo a ivo nu ivo.
10 Muthu udi wagujinginyina mu ndaga jiazonda, mbawukhala nji wagujinginyina mu ndaga jiakoma. Muthu gashigo wagujinginyina mu ndaga jiazonda, mbagashigo nji mukhala wagujinginyina mu ndaga jiakoma.
11 Hene gula mushigo agujinginyina mu luholo luenu lua gukalegela umonyi ushigo watagana, nanyi giwa mbawumihana umonyi wa giamatshidia?
12 Gula mushigo agujinginyina mu luholo lua gukalegela ima yangane, nanyi mbawumihana ima yenu hakhenu?
13 Muenya mudimo gajiyilego gukhala muhiga wa mafumu mbadi, handaga mbawutuna mungoshi uvi gazumbi muko, mbawujinginyina gudi muko uvi gasegulula muko. Muajiyilego gukhala ahiga a Nzambi nu a Makuta.”
14 Afalese anyi akhalele muzumba mbongo akhalele mutegelela ndaga eji jiagasue, asendesele gulela Yesu.
15 Hene, waawambelele egi: “Mudi gudimonesa gu meso a athu egi mudi athu abonga, uvi Nzambi udi mujiya mitshima yenu. Handaga ima yana mona athu egi idi yabalega ndando, yakhala ya usala gu meso a Nzambi.
16 “Mukhuala nu Baprofete akhalele uu nu gudi Yone. Uvi sendese mu tangua diene, Ufumu wa Nzambi wana longesewa gifua lukuma luabonga. Athu a maluholo agasue ana kalagala ngolo ha gungina muene.
17 Giamatshidia, idi ndaga yaleba egi dilu nu mavu ibalege, uvi ishigo yaleba egi nga gagisona gamoshi ga Mukhuala gatune gutagenesewa.
18 “Muthu wagasue washiya ulo nu mukaji’enji nu wadizula mu ulo nu mukhetu muko, muene wakalagala uthambi. Luko, muthu wagasue wadizula mu ulo nu mukhetu yonu washiyile ulo nu mulumi’enji, muene wakalagala uthambi.
19 “Guakhalele nu muenya umonyi mumoshi wakhalele musudiga milele ya linene yabenga, wakhalele musuanguluga nu ima ya ndando lusugu nu lusugu.
20 Uvi guakhalele nu muthu mumoshi wakhalele mutoga athu ima, jina dienji Lazalo; muila wenji wagasue wakhalele waguzala nu phuta. Akhalele muya gumuhaga ha mufulo wa muenya umonyi muene.
21 Wakhalele mutshigina gudia ima yakhalele mubua goshi’a mesa a muenya umonyi. Jimbua jiakhalele nji muza ha gulenza phuta jienji.
22 Gungima muthu yonu wakhalele mutoga ima wafuile, anjelo amubatele hehi nu Abalahama.*
“Muenya umonyi nji wafuile, amufundjile.
23 Hakhalele muene mumona malamba mu Malumba,* wazumbuile meso, wamonele Abalahama gualeha, wakhalele hehi nu Lazalo.*
24 Hene, watamegele egi: ‘Tata Abalahama, nguvile khenda. Tuma Lazalo abonde muno wenji mu meya hagula aholese dimi diami, handaga ngudi mumona lamba mu tshuya etu tuakola.’
25 Uvi Abalahama wamuwambelele egi: ‘Mun’ami, tangiza tangua wakhalele nu monyo, wakhalele nu ima yabonga yavula, Lazalo wakhalele mumona phamba malamba. Henyaha muene udi muabonga, uvi aye udi mumoma malamba.
26 Luko, hakatshi dienu nu esue hadi nu bengi diakoma diahagewe. Ngenyi, athu adi mutshigina gukatuga fundo tudi ha guzawuga muza fundo mudi enue ajiyilego guza, athu ajiyilego nji gukatuga fundo mudi enue ha guza gugu tudi esue.’
27 Gungima muthu muene wazuelele egi: ‘Tata gula idi ngenyi, ngudi gugutoga umutume monzo ya tata wami,
28 handaga ngudi nu aphangi’ami a mala mutano, hagula muene wajiya guaatemesa, ngenyi, ene ajiyilego guza ha fundo edi dia lamba.’
29 Uvi Abalahama wamuvutudile egi: ‘Ene adi nu Moize nu Baprofete; a ategelele.’
30 Gungima muthu muene wamulezele egi: ‘Ndo tata Abalahama, uvi gula muthu mumoshi wafuzumuga gu gufua waya guene, ene mbaabalumuna mitshima.’
31 Uvi muene wamuvutudile egi: ‘Gula ene ategelelego Moize nu Baprofete, ikhale muthu wafuzumuga gu gufua waya guene, mbaashigo gumuvuila.’”
Mbimbi goshi'a diyiji
^ Nga “muthu wakhalele mutuameza inzo.”
^ Nga “gizongelo gia bate.” Bate imoshi yakhalele ba litre 22.
^ Nga “Ba kore lukhama.” Kore imoshi yakhalele ba litre 220.
^ Nga “gindongo egi.” Tala Ukoteleshi wa Mbimbi.
^ Mu Greke: “ha thulo ya Abalahama.”
^ Nga “Hadese,” fundo ana funda athu agasue. Tala Ukoteleshi wa Mbimbi.
^ Mu Greke: “ha thulo yenji.”
