Mukanda wa Luka 17:1-37
17 Gungima wawambelele alandudi enji egi: “Ndaga jidi mubuisa athu mu gubola* mbajikhala guene. Uvi lamba diavula gudi muthu udi ha gishina gia ndaga jiene!
2 Idi ndaga yabonga egi akudigiwe seso* yakoma mu shingo nu abishidiwe mu kianga, hafundo egi abuise mona mumoshi mukatshi dia ana awa azonda mu gubola.
3 Temienu. Gula phangi’aye wakalagala gubola, muwambele gubola guenji. Gula wabalumuna mutshima, mutotesele.
4 Ikhale muene wagukalegela gubola mahugo sambadi mu lusugu lumoshi, uvi wavutuga mahugo sambadi, waguwambela egi: ‘Ngabalumuna mutshima,’ udi naye gumutotesela.”
5 Gungima apostolo awambelele Fumu egi: “Tuhane gutshigina guavula.”
6 Fumu waawambelele gamba: “Gula mudi nu gutshigina guakoma gifua lumbale lua mutada, mbamuwambela mutshi owu wabuita wa miriye egi: ‘Divumbule haha, nda udikune mu kianga!’ wene mbawumitumagela.
7 “Nanyi mukatshi dienu udi nu muenya mudimo wenji wana dima mahia nga wana bamba imeme, havutuga muene gu mahia, muene amuwambela egi: ‘Iza muphushi ukhale gu mesa udie’?
8 Muene mbagashigo gumuwambela egi: ‘Ngulondele ima ya gudia, sudiga mulele wa mudimo, nguhagele naye uu nu tangua ngumanesa gudia nu gunua, gungima aye uze udie giwa’?
9 Muene mbawuhana muenya mudimo mersi handaga watumagela ndaga jiamuwambela muene? Ndo sha.
10 Luholo lumoshi nji, gula muakalagala ndaga jiagasue amitogi ha gukalagala, zuelenu egi: ‘Esue tudi getu phamba enya mudimo. Tuakalagala inyi tuakhala naye gukalagala.’”
11 Hakhalele muene mu njila ha guya gu Yelusalema, wabalegele mu mididilo ya Samaliya nu Galilea.
12 Tangua diakhalele muene mungina mu dimbo dimoshi, athu kumi akhalele nu misongo ya hute ajile gudi muene, uvi amaganele gualeha nu muene.
13 Akalugile egi: “Yesu, Mulongeshi, tuvile khenda!”
14 Tangua diaamonele muene, waawambelele egi: “Ndenu mudimonese gudi nganga-nzambi.” Hakhalele ene muya, misongo yawo yahuile.
15 Hamonele mumoshi mukatshi diawo egi wasagewe, wavutugile nu gutumbuisa Nzambi mu dijui diakola.
16 Wabuile mu malu a Yesu phala mu mavu, wamuhanele mvudi yavula. Uvi muthu muene wakhalele muenya gu Samaliya.
17 Yesu wazuelele egi: “Athu agasue kumi asagewego ba? Uvi ako 9 adi gui?
18 Gushigo nga nu muthu muko wavutuga ha gutumbuisa Nzambi phamba muthu owu wa gifutshi giko ba?”
19 Gungima, wamuwambelele egi: “Zuga uye gaye; gutshigina guaye guagusaga.”
20 Afalese amuhudile ha gujiya tangua mbadiza Ufumu wa Nzambi. Muene waavutudile gamba: “Ufumu wa Nzambi mbawushigo muza mu luholo athu agasue ajiya gumona haphelo;
21 luko, athu mbaashigo muzuela egi: ‘Talenu udi haha!’ nga ndo, ‘Udi gunu!’ Handaga Ufumu wa Nzambi udi gale mukatshi dienu.”
22 Gungima Yesu wawambelele alandudi egi: “Masugu adi muza mbamukhala nu nzala ya gumona lusugu lua Mun’a muthu, uvi mbamushigo gulumona.
23 Athu mbaamiwambela egi: ‘Talenu udi gunu!’ nga ndo, ‘Udi haha!’ Uvi muyigo, muaalandulago.
24 Handaga lusugu lua Mun’a muthu mbalukhala gifua muana henya muandu wa mvula, sendese gu songi iko ya dilu uu nu gu songi iko ya dilu.
25 Uvi thomo, udi naye gumona malamba avula nu gutunyiwa gudi athu a mu gindongo egi.
26 Luko, mu masugu a Mun’a muthu, ndaga mbajikhala gifua luholo jiakhalele mu masugu a Nowa:
27 Ene akhalele mudia, akhalele munua, mala akhalele muzula akhetu mu ulo, akhetu nji akhalele muhanewa mu ulo uu nu lusugu luanginyile Nowa mu masuwa. Gungima Mvula Yakola yanogele, yaashiyile mukut’awo agasue.
28 Ndaga mbajikhala nji gifua luholo jiakhalele mu masugu a Lota: Athu akhalele mudia, akhalele munua, akhalele musumba, akhalele musumbisa, akhalele mukuna nu akhalele mutunga jinzo.
29 Uvi lusugu luazogele Lota mu dimbo dia Sodoma, mvula ya tshuya nu ya sufre yanogele mu dilu, yaashiyile mukut’awo agasue.
30 Lusugu mbalumonega Mun’a muthu ndaga mbajikhala nji luholo lumoshi.
31 “Mu lusugu luene, muthu udi holu dia inzo gasambulugago ha guzula ima yenji idi monzo. Luholo lumoshi nji nu muthu udi mu mahia, gavutugago ha guzula ima idi gungima.
32 Wungulugenu* mukaji’a Lota.
33 Muthu udi mubamba monyo wenji mbawuwutotesa, uvi muthu watotesa monyo wenji, mbawuwubamba.
34 Ngudi gumiwambela egi, mu phipha inyi, athu mbadi mbaakhala agubanda ha gitanda gimoshi; mbaazangula mumoshi, uvi muko mbaamubemba.
35 Akhetu mbadi mbaakhala mukhukha mbuto hamoshi,* mumoshi mbawuzudiwa, uvi muko mbawubembewa.”
36 ——
37 Hene, ene amuhudile gamba: “Fumu, gui guene?” Muene waavutudile egi: “Tunjila tua khuyi mbatudibungisa fundo mbadikhala kimbi.”
Mbimbi goshi'a diyiji
^ Mu Greke: “gukhakhuisa.”
^ Nga “seso ya gukhukhila mbuto, yakhalele mubalumuiwa gudi gabalu.”
^ Nga “yabulukenu.”
^ Mu Greke: “ha fundo dia gukhukhila mbuto.”
