Mukanda wa Luka 18:1-43
-
Gifezegeselo gia mukhetu wa gafunda wakhalele mububila nzuji (1-8)
-
Gifezegeselo gia Mufalese nu mufutshishi wa gitadi (9-14)
-
Yesu nu ana azonda (15-17)
-
Muenya umonyi mumoshi wahula Yesu muhu (18-30)
-
Yesu wadiangela guzuelela luko gufua guenji (31-34)
-
Gifofo giakhalele mutoga makuta giasendesa gumona (35-43)
18 Gungima, Yesu waahanele gifezegeselo gimoshi giakhalele mumonesa egi akhalele naye gukombelela tangua diagasue gubemba ndo.
2 Wazuelele egi: “Mu dimbo dimoshi, guakhalele nu nzuji mumoshi, muene gakhalelego muvila Nzambi woma nu gakhalelego munemesa athu.
3 Mu dimbo diene, guakhalele nji nu mukhetu mumoshi wa gafunda, wakhalele muya mumona nzuji muene tangua diagasue ha gumuwambela egi: ‘Ngukuatese hagula milonga yami isophesewe muabonga.’
4 Masugu avula nzuji muene wakhalele mutuna, uvi gungima wazuelele egi: ‘Nganago guvila Nzambi woma, nganago nji gunemesa athu,
5 uvi luholo mukhetu owu wa gafunda adi munanga nu guza ha gungusagesa, ngudi gumukuatesa hagula milonga yenji isophesewe muabonga, gula ndo muene mbawukhala muza tangua diagasue gunguhuidisa nu ndaga jienji.’”*
6 Gungima Fumu wazuelele gamba: “Nzuji owu wakhalele muthu wabola, uvi muamona ndaga yazuelele muene!
7 Nzambi mbagashigo musophesa mu luholo luatagana athu atombele muene, anyi ana gumudidila phipha nu muanya, tangua didi muene guamonesela guhuiminyina ba?
8 Ngudi gumiwambela egi muene mbawasophesa muphushi mu luholo luatagana. Uvi tangua mbadiza Mun’a muthu, mbawusanga diago gutshigina gua luholo elu ha mavu ba?”
9 Yesu wahanele gifezegeselo giko gudi athu akhalele gudimona egi adi abonga, uvi akhalele mumona athu ako gifua athu a githuhu. Wazuelele egi:
10 “Athu mbadi akandugile gu tempelo ha gukombelela, mumoshi wakhalele Mufalese, uvi muko wakhalele mufutshishi wa gitadi.
11 Mufalese wamaganele mu molu, wasendesele gukombelela egi: ‘Nzambi, ngudi guguhana mvudi yavula handaga ame ngushigo gifua athu awa—ana tambula athu ima gu ngolo, athu abola, thambi—nga gifua mufutshishi wa gitadi owu.
12 Ngana tuna ima ya gudia mbala jiyadi mu phoso imoshi ha gukombelela; ngana hana giakumi gia ima yami yagasue.’
13 Uvi mufutshishi wa gitadi wamaganele ndambo gualeha, gakhalelego mutshigina gutala gosa mu dilu, wakhalele gudibunda ha thulo nu guzuela egi: ‘Nzambi, nguvile khenda, ame ngudi muenya gubola.’
14 Ngudi gumiwambela egi, muthu yowu wabulumugile gumbo dienji, wamonesele egi wakhalele muthu wabonga gubalega Mufalese. Handaga muthu wagasue udi gudikanduisa mbawubulumuishiwa, uvi muthu udi gudibulumuisa mbawukanduishiwa.”
15 Athu akhalele gumubatela an’awo azonda hagula muene a akuate, uvi hamonele alandudi ndaga yene asendesele guabalela.*
16 Yesu watamegele ana azonda, wazuelele egi: “Bembenu ana azonda aze gudi ame, muatunyisago, handaga Ufumu wa Nzambi udi wa athu adi gifua ana azonda.
17 Ngudi gumiwambela giamatshidia egi, muthu gashigo mutshigina Ufumu wa Nzambi gifua mona wazonda, mbagashigo mungina mu Ufumu wene nga hazonda.”
18 Fumu mumoshi wa enya Yuda wamuhudile gamba: “Mulongeshi wabonga, itshi ngudi naye gutshita ha guheta monyo wa mayilago?”
19 Yesu wamuvutudile egi: “Mukunda natshi udi gungutamega egi muthu wabonga? Gushigo nu muthu udi wabonga phamba Nzambi.
20 Udi mujiya mikhuala eyi idi muzuela egi: ‘Ukalagalago uthambi, ushiyigo muthu, ukuyigo, utshigo uthemua wa mambo, nemesa sh’aye nu gin’aye.’”
21 Muthu muene wamuwambelele gamba: “Ngana tumagela mikhuala eyi yagasue sendese ulenge wami.”
22 Havile Yesu ndaga eyi, wamuwambelele egi: “Ndaga imoshi yagusala: Nda usumbise ima yaye yagasue, hana phutu falanga, ngenyi mbawukhala nu umonyi mu dilu; gungima iza ungulandule.”
23 Havile muene ndaga eyi, wavile gikenene giavula, handaga wakhalele nu umonyi wavula.
24 Yesu wamutalele, wazuelele egi: “Mbayikhala lamba gudi athu adi nu falanga ha gungina mu Ufumu wa Nzambi!
25 Yadiago, idi yaleba gudi shamo ha gungina mu wina dia ndongo, uvi idi lamba gudi muenya umonyi ha gungina mu Ufumu wa Nzambi.”
26 Athu anyi avile ndaga eyi azuelele egi: “Nanyi wajiya giwa guhuluishiwa?”
27 Muene wazuelele egi: “Ndaga jidi jiakola gudi athu, jidi jialeba gudi Nzambi.”
28 Uvi Phetelo wazuelele egi: “Tala! Tuabembele ima yetu ha gugulandula.”
29 Muene waalezele gamba: “Ngudi gumiwambela giamatshidia egi, muthu wagasue wabemba inzo, nga mukaji’enji, nga aphangi’enji a mala, nga mvuaji jienji, nga ana mukunda nu Ufumu wa Nzambi,
30 muene mbawuyiheta yavula mangino, mu masugu adi muza* mbawuheta nji monyo wa ivo nu ivo.”
31 Gungima, wazanguile alandudi 12 gu khanda, waawambelele egi: “Tegelelenu! Tudi mukanduga gu Yelusalema, ndaga jiagasue jiasonegewe mu njila ya baprofete mukunda nu Mun’a muthu mbajitagenesewa.
32 Ha gufezegesa, muene mbawuhanewa ha mago a enya ifutshi, ene mbaamulela, mbaamumonesa lamba nu mbaamufita mate.
33 Ene mbaamubeta nu mbaamushiya, uvi mu lusugu lua thathu muene mbawufuzumuga.”
34 Uvi ene akoteleselego nga ndaga imoshi, handaga ukoteleshi wa mbimbi jiene waasuegewe. Akhalelego mujiya gula ndaga jiene jiakhalele mukotelesa itshi.
35 Hasuenele Yesu hehi nu dimbo dia Yeliko, gifofo gimoshi giakhalele mu khulo ya njila mutoga athu ima.
36 Giavile egi athu avula akhalele mubalega, hene, giahudile gamba ndaga itshi yabua.
37 Amuwambelele egi: “Yesu wa gu Nazaleta udi mubalega!”
38 Gungima wazuelele mu dijui diakola egi: “Yesu, Mun’a Davidi, nguvuile khenda!”
39 Athu akhalele muya gutuama asendesele gumubalela* ha guhena tedie, uvi muene walanduile gukaluguga mangololo egi: “Mun’a Davidi, nguvuile khenda!”
40 Yesu wamaganele, waawambelele ha guza nu gifofo giene. Muthu muene wasuenele, Yesu wamuhudile gamba:
41 “Itshi watshigina egi ngugukalegele?” Muene wamuvutudile egi: “Fumu, ngatshigina egi meso ami amone.”
42 Yesu wamuwambelele egi: “Meso aye amone; gutshigina guaye guagusaga.”
43 Mu tangua diene, meso enji amonele, wasendesele gulandula Yesu nu gutumbuisa Nzambi. Tangua athu akhalele hene amonele ndaga yene, mukut’awo agasue atumbuishile Nzambi.
Mbimbi goshi'a diyiji
^ Nga “mbawuza gungubeta makhome.”
^ Nga “guadingila.”
^ Nga “mu gindongo gidi muza.” Tala Ukoteleshi wa Mbimbi.
^ Nga “gumudingila.”
