Mukanda wa Luka 19:1-48
19 Gungima wanginyile mu dimbo dia Yeliko, wabalegele mukatshi.
2 Guakhalele nu yala mumoshi mu dimbo diene, jina dienji Zashe; wakhalele fumu ya afutshishi a gitadi, wakhalele muenya umonyi.
3 Wakhalele mukamba ha gumona gula Yesu wakhalele nanyi, uvi gakhalelego nu luholo lua gumumona handaga athu akhalele avula, muene nji wakhalele muthu wa gitala giahihia.
4 Wayile phushi gutuama, wanamatele gos’a mutshi wa sikomole* ha gumona Yesu, handaga wakhalele naye gubalegela mu njila yene.
5 Tangua diahetele Yesu ha fundo diene, wazumbuile meso gosa, wamuwambelele egi: “Zashe, tuluga muphushi, handaga mangino ngudi naye gukhala gumbo diaye.”
6 Zashe watulugile muphushi, wamuyambele gumbo dienji nu gusuanguluga guagasue.
7 Tangua athu amonele ndaga eyi, mukut’awo agasue asendesele gumufeta egi: “Muene waya mukhala gumbo dia muenya gubola.”
8 Uvi Zashe wazugile mu molu, wawambelele Fumu egi: “Fumu, tala! Ngudi muhana phutu gitshinyi gia ngiadi gia ima yami. Gula ngatambuile muthu makuta,* ngudi gumuvutuila nawo mahugo nguana.”
9 Yesu wamuwambelele egi: “Mangino guhuluga guangina monzo eyi, handaga muene nji udi mun’a Abalahama.
10 Handaga Mun’a muthu wajile ha gukamba nu ha guhuluisa athu atotele.”
11 Hakhalele ene gumutegelela, waahanele gifezegeselo giko, handaga wakhalele hehi nu Yelusalema. Athu anyi akhalele gumutegelela akhalele nji mutangiza egi Ufumu wa Nzambi wakhalele naye gumonega mu tangua diene.
12 Wazuelele egi: “Muthu mumoshi wavalewe mu fami ya ufumu wayile mu gifutshi gia gualeha ha gubuishiwa fumu, gungima wakhalele naye guvutuga.
13 Watamegele enya mudimo enji kumi, waahanele mine kumi.* Waawambelele egi: ‘Kalagalenu mungenda nu mbongo eji uu nu tangua mbanguza.’
14 Uvi enya mu dimbo dienji akhalelego gumuzumba, atumine athu gungima dienji ha guzuela egi: ‘Tushigo mutshigina egi muthu yowu abue fumi’etu.’
15 “Gungima dia gubuishiwa fumu,* wavutugile. Watamegele enya mudimo enji ahanele muene mbongo,* ha gujiya mbongo ahetele holu mu mungenda akhalele mukalagala.
16 Muenya mudimo wa thomo wajile, wazuelele egi: ‘Fumu, mine yaye yazola mine jiko kumi.’
17 Muene wamuvutudile egi: ‘Kiawaha, udi muenya mudimo wabonga! Luholo wakhadi wagujinginyina mu ndaga yazonda diago, ngudi guguhana ufumu wa gutala membo kumi.’
18 Muenya mudimo wa mbadi wajile, wazuelele egi: ‘Fumu, mine yaye yazola mine jiko jitano.’
19 Wawambelele nji muenya mudimo owu egi: ‘Aye nji mbanguguhana ufumu wa gutala membo atano.’
20 Uvi muenya mudimo muko wajile, wazuelele egi: ‘Fumu, mine yaye yenyeyi, ngayisuegele mu mulele.
21 Tala, ngakhalele guguvuila woma, handaga aye udi muenya ndaga jiakola; wana zula ima inyi wabambelego, wana katula mbuto jinyi wakunyilego.’
22 Muene wamuwambelele egi: ‘Mbimbi jiaye jiene ngudi gugufuishila milonga, aye udi muenya mudimo wabola; handaga wajiyile egi ame ngudi muenya ndaga jiakola, ngana zula ima yinyi ngabambelego, ngana katula mbuto jinyi ngakunyilego.
23 Mukunda natshi watunyile gumba makuta ami* mu banke, hagula tangua mbanguza nguzangula nu ako holu?’
24 “Gungima wawambelele athu akhalele hene egi: ‘Mutambulenu mine idi nayo muene, muyihane muthu udi najio kumi.’
25 Uvi ene amuwambelele egi: ‘Fumu, muene udi nu mine jiko kumi!’—
26 ‘Ngudi gumiwambela egi, muthu udi nu gima, mbaamuhana ima iko yavula. Uvi muthu gashigo nu gima, nu giene gidi nagio muene, mbaamutambula nagio.
27 Kuatenu mbalagaji jiami, jinyi jiakhalele mutuna egi ngubuigo fumi’awo, mujishiye ha meso ami.’”
28 Hamanesele Yesu guzuela ndaga eji, wakuatele njila, wayile gutuama diawo, wakandugile gu Yelusalema.
29 Tangua ahetele hehi nu Betefage nu Betaniya gu Mulundu wa Mitshi ya Olive, Yesu watumile alandudi enji mbadi,
30 waawambelele egi: “Ndenu mu dimbo dinyi mudi mumona. Gula muangina mu dimbo diene, mbamumona mutumba wa phunda wagujitshiga, unu nga muthu khenji gakhalele galego holu dienji. Ujitululenu muze nawo haha.
31 Uvi gula muthu wamihula egi: ‘Mukunda natshi mudi guwujitulula?’ Muwambelenu egi: ‘Fumu udi nawo funu.’”
32 Alandudi ayile, asangele mutumba wa phunda, gifua muaawambelele muene.
33 Hakhalele ene mujitulula mutumba wa phunda, afumi’a nawo a ahudile egi: “Mukunda natshi mudi mujitulula mutumba wa phunda?”
34 Ene avutudile gamba: “Fumu udi nawo funu.”
35 Alandudi ajile nu mutumba wa phunda gudi Yesu, ahagele milele* yawo holu dienji, Yesu wakhalele holu dia mutumba wa phunda wene.
36 Hakhalele muene muya, athu asendesele gubamba milele yawo ya holu mu njila.
37 Hasuenele muene hehi nu njila yakhalele mubulumuga gu khanda ya Mulundu wa Mitshi ya Olive, alandudi agasue avula asendesele gusuanguluga nu gutumbuisa Nzambi mu dijui diakola, mukunda nu ndaga jiagasue jia gushimana jiamonele ene.
38 Akhalele muzuela egi: “Gusuanguluga gukhale nu Fumu udi muza mu jina dia Yehowa! Guhuima gukhale mu dilu, gutumbuga gukhale gosa gua gudinyinyiga!”
39 Uvi Afalese ako akhalele mukatshi dia athu avula azuelele egi: “Mulongeshi, balela* alandudi aye.”
40 Uvi muene waawambelele egi: “Ngudi gumiwambela egi, gula ene ahena tedie, maseso mbaakaluluga.”
41 Tangua diahetele muene hehi nu Yelusalema, watalele dimbo, wadidile,
42 wazuelele egi: “Gula nga wakotelesele gaye ndaga idi mubata guhuima mangino—uvi henyaha ndaga yene yasuegewe gu meso aye.
43 Handaga masugu adi muza, mbalagaji jiaye mbajitunga luphango mu khulo yaye nu mitshi ya sungu-sungu, mbajigujieta nu mbajiguphategesa* khanda nu khanda.
44 Ene mbaagubuisa hashi aye nu an’aye, mbaabembigo nga seso imoshi holu ya iko mukatshi diaye, handaga aye wakoteleselego tangua diajile Nzambi ha gugusophesa.”
45 Gungima, wanginyile mu tempelo, wasendesele gukaya athu akhalele musumbisa ima muene,
46 waawambelele egi: “Yasonegewe gamba: ‘Inzo yami mbayikhala inzo ya isambu,’ uvi enue muayibuisa inzo ya nzangi.”
47 Lusugu nu lusugu muene wakhalele mulongesa mu tempelo. Uvi mafumu a nganga-nzambi nu alongeshi a mikhuala nu manene a athu akhalele mukamba gumushiya;
48 Uvi akhalelego mumona luholo lua gumushiya, handaga athu agasue akhalele gumutegelela nu gusuanguluga guagasue.
Mbimbi goshi'a diyiji
^ Nga “mutshi wa figi wa miriye.”
^ Nga “gula ngahuigile muthu ha gumutambula makuta.”
^ Mine imoshi ya enya Greke yakhalele gunema 340 g nu yakhalele mungina ba drakime 100.
^ Nga “gungima dia guzula ufumu.”
^ Mu Greke: “utadi wa siliva.”
^ Mu Greke: “utadi wami wa siliva.”
^ Nga “milele yawo ya holu.”
^ Nga “dingila.”
^ Nga “mbajiguhana lamba.”
