Mukanda wa Luka 2:1-52
-
Guvalewa gua Yesu (1-7)
-
Anjelo amuenega gudi abambi a imeme (8-20)
-
Yesu wambiwa gu mukanda; Madiya waphelegetesewa gifua muakhalele muzuela Mukhuala (21-24)
-
Simeone wamona Klisto (25-35)
-
Profete Ana udi muzuela mukunda nu mona (36-38)
-
Yozefe nu Madiya avutuga gu Nazaleta (39, 40)
-
Yesu udi mu tempelo, udi nu ivo 12 (41-52)
2 Mu sungi yene, Sezale Ogiste wambile mukhuala egi athu agasue a ha mavu adi naye gusonegesa majina.
2 (Athu asonegesele majina mbala ya thomo tangua Kuilinuse wakhalele guvelenele wa Siliya.)
3 Athu agasue ayile musonegesa majina, muthu nu muthu mu dimbo diawo.
4 Yozefe nji wakatugile gu Galilea, mu dimbo dia Nazaleta, wakandugile gu Yudea mu dimbo dia Davidi diana tamegewa egi Beteleheme, handaga muene wakhalele muenya inzo nu muenya giphuta gia Davidi.
5 Wayile musonegesa jina nu mukaji’enji Madiya. Mu tangua diene, Madiya wakhalele hehi ha guvuala.
6 Hakhalele ene guene, tangua dia Madiya dia guvuala diataganele.
7 Madiya wavualele mun’enji wa yala wa somi.* Wamulangele milele, wamubandesele mu gidilo gia shitu handaga gu inzo ya ngenji guakhalelego nu fundo mukunda nu ene.
8 Gu khanda yene, guakhalele nu abambi a imeme, akhalele mujinga hanze. Mu phipha akhalele mubamba imeme yawo.
9 Sagumugu, muanjelo wa Yehowa wazogele gutuama diawo. Lutumbu lua Yehowa luahenyele fundo diakhalele ene. Avuile woma wavula.
10 Uvi muanjelo waawambelele egi: “Muvuigo woma, handaga ngudi gumiwambela ndaga yabonga mbayisuanguluisa athu agasue muavula.
11 Handaga mangino amivualela muhuluishi mu dimbo dia Davidi, muene udi Klisto Fumu.
12 Talenu luholo mbamumujiya: Mbamusanga mona wa gitebe, wagulanga milele nu wagubandesa mu gidilo gia shitu.”
13 Sagumugu, anjelo avula* adibungishile nu muanjelo munu, asendesele gutumbuisa Nzambi egi:
14 “Gutumbuga gukhale gudi Nzambi gosa gua gudinyinyiga, guhuima gukhale ha mavu mukatshi dia athu adi muene mutshigina.”*
15 Tangua anjelo a abembele ha guvutuga mu dilu, abambi a imeme azuelele egi: “Tuyenu gu Beteleheme ha gumona ndaga yabua guene, nu ndaga yatuwambela Yehowa.”
16 Ayile muphushi, asangele Madiya nu Yozefe, nu mona wa gitebe wa gubanda mu gidilo gia shitu.
17 Tangua amonele ndaga yene, atele lumene lua ndaga jiaawambelewe mukunda nu mona.
18 Athu agasue avuile ndaga jiazuelele abambi a imeme, ashimanele mangololo.
19 Uvi Madiya wakhalele mubamba mbimbi eji jiagasue mu mutshima wenji, nu wakhalele gujitangigiza ha gujiya gula jidi mukotelesa itshi.
20 Gungima abambi a imeme ayile gawo, ayile nu gutumbuisa Nzambi mukunda nu ndaga jiagasue avuile nu jinyi amonele, gifua luholo a awambelele najio.
21 Hataganele masugu nage ha gumba mona gu mukanda, amuhanele jina egi Yesu, jina muanjelo wawambelele Madiya gutuama egi amite.
22 Luko, hataganele tangua hagula adiphelegetese gifua muakhalele muzuela Mukhuala wa Moize, ayile n’enji gu Yelusalema ha gumumonesa gutuama dia Yehowa,
23 gifua luholo yasonegewe mu Mukhuala wa Yehowa egi: “Mona yala wagasue wa somi* udi naye gutamegewa egi wagijila mukunda nu Yehowa.”
24 Ahanele mulambu gifua luholo Mukhuala wa Yehowa wakhalele mutoga: “Mayembe mbadi, nga ndo, ana mbadi a tukhulumbia.”*
25 Guakhalele nu yala mumoshi gu Yelusalema jina dienji Simeone, wakhalele muthu wabonga, wakhalele muvuila Nzambi woma. Wakhalele munenga tangua Nzambi mbawuwalagana Isalele, wakhalele nji nu nyuma ya Nzambi.
26 Luko, Nzambi wamuwambelele mu njila ya nyuma yenji egi muene mbagashigo mufua gutuama egi amone Klisto wa Yehowa.
27 Nyuma ya Nzambi yamutumine ha gungina mu tempelo. Mu tangua diene mvuaji jia Yesu jiajile n’enji ha gumukalegela ndaga jiakhalele muzuela Mukhuala.
28 Simeone wazudile mona ha mago, watumbuishile Nzambi, wazuelele egi:
29 “Henyaha, Fumu Wabalega Gukoma, bemba muhiga waye afue mu guhuima gifua luholo wayizuelele,
30 handaga meso ami amona muthu mbawuhuluisa athu,
31 yonu walondele aye gu meso a athu agasue,
32 muanya mbawukatula mulele gu meso a enya ifutshi nu lutumbu mukunda nu athu aye enya Isalele.”
33 Sh’a mona nu gin’a mona akhalele gudihula gu ndaga athu akhalele muzuela mukunda nu mona.
34 Luko, Simeone watogele Nzambi ha gukuatesa Madiya nu Yozefe. Wawambelele Madiya gin’a mona egi: “Tala! Mona yowu watombewe ha gubuisa nu ha guzugisa luko athu avula gu Isalele, muene mbawukhala gijiyishilo athu mbaatuna
35 (giamatshidia, phogo ya khusa mbayigungina), hagula egi matangi adi mu mitshima yavula ajiyiwe.”
36 Guakhalele nu profete mumoshi wa mukhetu jina dienji Ana, mun’a Fanuele muenya giphuta gia Asele. Mukhetu muene wakhalele wagukola, wakalegele nu mulumi’enji mu ulo ivo phamba sambadi.*
37 Gungima wabuile mukhetu wa gafunda, wakhalele nu ivo 84. Muene gabembelego nga hazonda guya gu tempelo, wakhalele mukalegela Nzambi mudimo wa gijila phipha nu muanya, wakhalele mutuna gudia, wakhalele nji mukombelela muavula.
38 Mu lusugu luene, wasuenele hehi, wasendesele guhana Nzambi mersi nu guzuela mukunda nu mona gudi athu agasue akhalele munenga guhuluga gua Yelusalema.
39 Hene, tangua ataganesele ndaga jiagasue jia Mukhuala wa Yehowa, avutugile gu Galilea gumbo diawo gu Nazaleta.
40 Luko, mona walanduile gukula nu guheta ngolo. Gutema guenji guakhalele gudivudisa, Nzambi walanduile nji gumutshigina.
41 Mvuaji jienji jiakhalele nu khadilo dia guya givo nu givo gu Yelusalema mukunda nu Wano wa Pake.
42 Hataganesele muene ivo 12, ayile gu wano gifua muakhalele khadilo diawo.
43 Tangua masugu a wano ahuile, avutugile gumbo diawo. Yesu wasalele gu Yelusalema, uvi mvuaji jienji jiajiyilego.
44 Akhalele mutangiza egi Yesu wakhalele mukatshi dia athu akhalele muya nawo. Gungima dia guwenda lusugu lua mudidi, asendesele gumukamba mukatshi dia enya fami yawo nu athu a gudijiya nawo.
45 Uvi luholo amumonelego, avutugile gu Yelusalema, amukambele mafundo agasue guene.
46 Gungima dia masugu thathu, amusangele mu tempelo mukatshi dia alongeshi, wakhalele guategelela nu guahula mihu.
47 Uvi athu agasue akhalele gumutegelela akhalele gudihula mukunda nu ndunge jienji nu mvutu jienji.
48 Tangua amumonele, adihudile muavula, gin’enji wamuwambelele egi: “Mun’ami, mukunda natshi watutshita ndaga ya luholo elu? Ame nu sh’aye tuadisagesa muavula nu tuagukamba mafundo agasue.”
49 Uvi Yesu waahudile egi: “Mukunda natshi muakhadi gungukamba? Enue muajiyilego egi ngudi naye gukhala monzo ya Tata wami?”
50 Uvi ene akoteleselego ndaga jiakhalele muene guawambela.
51 Gungima muene wavutugile nawo gu Nazaleta, walanduile guatumagela. Luko, gin’enji wabambele ndaga eji jiagasue mu mutshima wenji.
52 Yesu walanduile gukudisa gutema guenji, wakudile nji mu muila. Luko Nzambi nu athu akhalele gumutshigina.
Mbimbi goshi'a diyiji
^ Nga “mun’enji wa yala wa thomo.”
^ Mu Greke: “Masuta avula a mu dilu.”
^ Nga “athu a mitshima yabonga.”
^ Mu Greke: “Mona wagasue wa yala wadiangela guvalewa.”
^ Nga “pijio.”
^ Mu Greke: “sendese hakhalele muene gandongo.”
