Mukanda wa Luka 20:1-47
20 Lusugu lumoshi, Yesu wakhalele mulongesa athu mu tempelo, wakhalele guawambela ndaga yatadila lukuma luabonga. Mu tangua diene, mafumu a nganga-nzambi nu alongeshi a mikhuala nu malemba a athu ajile.
2 Amuhudile egi: “Tuwambele, gui wazudi ngolo jia gukalagala ndaga eji? Nanyi waguhanyi ngolo jiene?”
3 Muene waavutudile gamba: “Ame nji ngudi gumihula muhu; nguwambelenu:
4 Gubatiza gua Yone guakatugile mu dilu nga gudi athu?”
5 Asendesele guzuela egi: “Gula tuazuela egi, ‘Guakatugile mu dilu,’ muene uza gutuhula egi, ‘Mukunda natshi muatunyine giwa gumutshigina?’
6 Uvi gula tuazuela egi: ‘Guakatugile gudi athu,’ athu agasue aza gutusonona maseso handaga ana tshigina egi Yone wakhalele profete.”
7 Hene amuwambelele egi tushigo mujiya.
8 Yesu waawambelele egi: “Ame nji ngushigo gumiwambela gula mu ngolo jia nanyi ngudi mutshita ndaga eji.”
9 Gungima Yesu waahanele gifezegeselo egi: “Yala mumoshi wadimile dihia dia vinyo, wadihanele adimi ha gusala guditala, gungima wayile mu gifutshi gia gualeha ha gushipha guene.
10 Hataganele sungi ya gukatula mabundu a vinyo, watumine muenya mudimo wenji gudi adimi hagula amuhane shinda dienji dia mabundu a vinyo. Uvi enya mudimo amukuatele, amubetele, amuvutuile mago a githuhu.
11 Watumile muenya mudimo muko. Uvi ene amubetele, amushingile* nu amuvutuile mago a githuhu.
12 Watumine nji muenya mudimo wenji wa thathu; uvi ene amukuatele, amunamenesele, amubishidile hanze.
13 Fumi’a dihia dia vinyo wazuelele egi: ‘Itshi ngukalagala? Ngudi mutuma mun’ami ngana guzumba muavula. Yadiago, ene mbaamunemesa.’
14 Tangua adimi amonele mona muene, azuelele egi: ‘Yowu muene mbawuzula dihia dia vinyo. Tumushiyenu hagula dihia dibue dietu.’
15 Ene amubishidile hanze ya dihia dia vinyo, amushiyile. Fumi’a dihia dia vinyo mbawakalagala itshi?
16 Muene mbawuza, mbawushiya adimi a dihia, mbawuhana dihia dia vinyo gudi adimi ako.”
Havuile athu ndaga eji, azuelele egi: “Ndaga eyi ikalegewago nga hazonda!”
17 Uvi Yesu waatalele, wazuelele egi: “Ndaga idi muzuela mukanda wa Nzambi egi: ‘Seso diabishidiwe gudi atungi, diene diabuile seso dia thomo dia ha khomo,* idi mukotelesa itshi’?
18 Muthu wagasue wabua ha seso eyi, mbawubogoga. Uvi muthu wagasue seso eyi mbayibuila, mbawutshiongomoga.”
19 Alongeshi a mikhuala nu mafumu a nganga-nzambi atshiginyile gumukuata mu tangua diene, uvi akhalele muvua woma wa athu, handaga akotelesele egi gifezegeselo giahanele muene giakhalele mukunda nu ene.
20 Amutalele muabonga, gungima atumile athu mu gisuegi ha guya mumonesa gifua adi athu abonga, ha gumutela muheto hagula amukuate mu mbimbi jienji. Ngenyi, aye n’enji amuhane gudi mafumu nu gudi guvelenele.
21 Amuhudile egi: “Mulongeshi, tudi mujiya egi aye wana zuela nu wana longesa ndaga jiabonga, aye wanago gutala phala jia athu, uvi ndaga wana longesa mukunda nu Nzambi jiana khala jia giamatshidia:
22 Mukhuala udi gutuhana njila* ha gufuta gitadi gudi Sezale nga ndo?”
23 Yesu wajiyile ndunge jiawo jiabola, hene waahudile egi:
24 “Ngulezenu denye imoshi. Gifuanesa egi nu isona eyi idi ya nanyi?” Ene azuelele egi: “Ya Sezale.”
25 Muene waawambelele egi: “Hanenu ima ya Sezale gudi Sezale, uvi ima ya Nzambi gudi Nzambi.”
26 Akhalelego nu luholo lua gumukuata mu mbimbi jienji gutuama dia athu, uvi adihudile muavula mukunda nu mvutu yenji, hene ahenele tedie.
27 Uvi, Asadoke ana zuela egi gufuzumuga guana khalago guene, ajile gumuhula egi:
28 “Mulongeshi, Moize wasonegele egi: ‘Gula yala wafua uvi muene nu guvuala ndo ana, wabemba mukaji’enji, phangi’enji wa yala udi naye guzula mukhetu muene ha gumuvualela ana.’
29 Guakhalele nu mala sambadi. Wa thomo wazudile mukhetu mu ulo, uvi wafuile, gabembelego nga mona mumoshi.
30 Luholo lumoshi nji nu yala wa mbadi.
31 Yala wa thathu nji wazudile mukhetu muene. Mukut’awo agasue sambadi azudile mukhetu muene; uvi afuile khungi’awo agasue, abembelego nga mona.
32 Gu gisugishilo, mukhetu nji wafuile.
33 Tangua athu mbaafuzumuga, muene mbawukhala mukaji’a nanyi? Handaga mukut’awo agasue sambadi amuzudile mu ulo.”
34 Yesu waalezele gamba: “Athu* a mu gindongo* egi ana zula akhetu mu ulo, akhetu nji ana hanewa mu ulo.
35 Uvi athu anyi Nzambi amonele egi adi atagana ha gufuzumuga nu ha gukhala mu mavu adi muza, mbaashigo muzula akhetu mu ulo, akhetu nji mbaashigo muhanewa mu ulo.
36 Giamatshidia ene mbaashigo mufua nga hazonda, handaga mbaakhala gifua anjelo, mbaakhala ana a Nzambi, ana a gufuzumuga.
37 Uvi mu lumene lua gamutshi gakhalele mulema tshuya, Moize wamonesele egi athu a gufua mbaafuzumuga tangua diatamegele muene Yehowa egi ‘Nzambi wa Abalahama, Nzambi wa Isaka nu Nzambi wa Yakoba.’
38 Muene gashigo Nzambi wa athu a gufua, uvi Nzambi wa athu a monyo, handaga gu meso enji mukut’awo agasue adi nu monyo.”*
39 Alongeshi a mikhuala amuvutudile gamba: “Mulongeshi, wazuela muabonga.”
40 Handaga ene akhalelego luko nu luholo lua gumuhula nga muhu umoshi.
41 Yesu waahudile gamba: “Mukunda natshi athu adi muzuela egi Klisto udi mun’a Davidi?
42 Handaga Davidi hakhenji udi muzuela mu mukanda wa Ngimbo egi: ‘Yehowa wawambelele Fumi’ami egi: “Khala gu koko diami dia madia
43 uu nu tangua mbanguhaga mbalagaji jiaye goshi’a ikanzo* yaye.”’
44 Davidi hakhenji udi gumutamega egi Fumu; na luholo lutshi giwa muene wajiya gukhala mun’enji?”
45 Tangua athu agasue akhalele gumutegelela, muene wawambelele alandudi enji egi:
46 “Temenenu alongeshi a mikhuala anyi ana tshigina guwenda nu malopho* aleha, ana tshigina nji egi athu a amenege ha mafundo a zando, ana tshigina nji gukhala ha mafundo a thomo* mu sinagoga nu mafundo a lutumbu mu tangua dia gudia mu ngueze.
47 Ana tambula akhetu a gafunda ima yawo,* ana kalagala isambu yaleha hagula athu a amone. Ene mbaaheta ndola yakola.”
Mbimbi goshi'a diyiji
^ Nga “amuhanele musonyi.”
^ Mu Greke: “muto wa khomo.”
^ Nga “idi ndaga yabonga ha.”
^ Mu Greke: “Ana.”
^ Tala Ukoteleshi wa Mbimbi.
^ Nga “mu matangi enji mukut’awo agasue adi nu monyo.”
^ Mu Greke: “gihagelo gia malu.”
^ Nga “mituphu.”
^ Nga “mafundo abalega gubonga.”
^ Nga “jinzo jiawo.”
