Mukanda wa Luka 21:1-38
21 Hazumbuile muene meso, wamonele enya umonyi akhalele mumba misomonyi mu mishete ya makuta.
2 Gungima wamonele mukhetu mumoshi wa gafunda wa phutu mumba mbongo mbadi jia utadi jia ndando yazonda,*
3 wazuelele egi: “Ngudi gumiwambela giamatshidia egi mukhetu owu wa gafunda wa phutu wambi musomonyi wavula gubalega athu agasue.
4 Handaga mukut’awo agasue azangula ndambo ya mbongo ya umonyi wawo ha gumba. Mukhetu owu udi phutu, uvi wamba ima yenji yagasue akhalele nayo.”
5 Gungima, athu ako akhalele muzuela egi tempelo yatungiwe nu maseso abonga nu ima yahanewe gudi Nzambi,
6 uvi Yesu waawambelele egi: “Ima eyi mudi mumona mangino, masugu adi muza mbagushigo musala nga seso imoshi holu dia iko, jiagasue mbajimuangewa.”
7 Ene amuhudile egi: “Mulongeshi, tangua ditshi ndaga eji mbajikalegewa? Gijiyishilo gitshi mbagimonesa egi ndaga eji jidi mutagana?”
8 Muene waawambelele egi: “Temienu hagula muhuigiwago, handaga athu avula mbaaza mu jina diami muzuela egi, ‘Ame ngudi Klisto,’ mbaazuela nji egi ‘Tangua diasuena hehi.’ Mualandulago.
9 Tangua mbamuvua nji mene jia ita nu tunga-tunga* dia athu, muvuigo woma. Handaga ndaga eji jidi naye thomo gubua, uvi gisugishilo mbagishigo muza mu tangua diene.”
10 Waawambelele luko egi: “Gifutshi mbagiluisa gifutshi giko, ufumu mbawuluisa ufumu uko.
11 Mavu mbaadigita mangololo, nzala yabala nu misongo ya gisambugila mbayikhala khanda nu khanda, athu mbaamona ndaga jidi muhana woma, ijiyishilo yakoma mbayimonega mu dilu.
12 “Uvi gutuama egi ndaga eji jiagasue jibue, athu mbaamikuata nu mbaamimonesa lamba, mbaamihana gu sinagoga ha gusophesewa, mbaamimba mu bologo. Mbaamibata gutuama dia mafumu nu ba guvelenele mukunda nu jina diami.
13 Mbayimihana luendu lua gulongesa.
14 Hene, mudiangelago gutangiza ndaga mbamuzuela tangua mbaamisophesa,
15 handaga ame mbangumihana mbimbi nu ndunge jinyi mbalagaji jienu jiagasue jiajiyilego gutuna nga gushila giphapha.*
16 Mvuaji jienu nu aphangi’enu nu enya fami jienu nu mafut’enu mbaamibalumugila* nji, mbaashiya athu ako mukatshi dienu.
17 Athu agasue mbaakhala n’enu umbalagaji mukunda nu jina diami.
18 Uvi nga sanga dimoshi dia gu mito yenu mbaditotshigo.
19 Gula muakolesela, mbamuhuluisa mionyo yenu.
20 “Uvi tangua mbamumona masuta mujieta dimbo dia Yelusalema, jiyenu egi gushiyiwa guenji guasuena hehi.
21 Athu adi gu Yudea alenge ha guya gu milundu, athu adi gu Yelusalema azoge, uvi anyi adi mu mahia anginyigo mu dimbo,
22 handaga mu masugu ene Nzambi mbawuhana ndola gudi athu hagula ndaga jiagasue jiasonegewe jitagane.
23 Lamba diavula gudi akhetu a mavumo nu anyi mbaakhala muwamuesa ana mu masugu ene! Handaga gifutshi mbagikhala mu lamba diakola, mbaavuila nji athu awa khabu.
24 Ene mbaashiyiwa gu phogo ya khusa nu mbaaya nawo mu uhiga mu ifutshi yagasue; enya ifutshi* mbaadiata Yelusalema uu nu hatagana tangua diatombewe mukunda nu ifutshi.*
25 “Ndaga jia gushimana mbajikhala nji mu tangua nu mu mbeji nu mu themua. Ha mavu ifutshi mbayikhala mu lamba, mbayishigo mujiya ndaga ya gukalagala mukunda nu matululu a kianga nu matshipha-tshipha.
26 Athu mbaalehuga mukunda nu woma hadi ene munengena ndaga mbajibua ha mavu, handaga ngolo jia mu dilu mbajidinyigisa.
27 Gungima, mbaamona Mun’a muthu muza mu matuta mu dilu nu ngolo nu lutumbu luakoma.
28 Uvi tangua ndaga eji mbajisendesa gubua, dilondenu muabonga, zumbulenu mito yenu, handaga guhuluishiwa guenu guasuena hehi.”
29 Gungima waahanele gifezegeselo, wazuelele egi: “Talenu mutshi wa figi nu mitshi iko yagasue.
30 Gula muayimona yasendesa gusaphutshila, muana jiya egi sungi ya mvula yasuena hehi.
31 Enue nji gula muamona ndaga eji mukalegewa, jiyenu egi Ufumu wa Nzambi wasuena hehi.
32 Ngudi gumiwambela giamatshidia egi gindongo egi mbagishigo muhua nu gufua gutuama egi ndaga eji jiagasue jikalegewe.
33 Dilu nu mavu mbayitota, uvi mbimbi jiami mbajitotshigo nga hazonda.
34 “Uvi temienu hagula mitshima yenu idisagesago mukunda nu gudia guavula nu gunua matombe avula nu gikenene gia lujingu, hagula egi lusugu luene lumijilago mu gisagumuisa
35 gifua muheto. Handaga lusugu luene mbaluza mukunda nu athu agasue adi ha mavu agasue.
36 Khalenu nu gikolekole, kombelelenu tangua diagasue hagula mbamumone luholo lua gulenga ndaga jiagasue jidi muza nu ha gumagana gutuama dia Mun’a muthu.”
37 Yesu wakhalele mulongesa mu tempelo mu muanya, uvi mu phipha wakhalele muya mubanda gu Mulundu wa Mitshi ya Olive.
38 Mu gimenegena gia mutshiatshia, athu agasue akhalele muza gudi muene mu tempelo ha gumutegelela.
Mbimbi goshi'a diyiji
^ Mu Greke: “lepeta mbadi.”
^ Nga “nguma; matululu.”
^ Nga “gumbila maya.”
^ Nga “mbaamihana ha mago a mbalagaji jienu.”
^ Nga “Athu ashigo enya Yuda.”
^ Nga “Athu ashigo enya Yuda.”
