Mukanda wa Luka 22:1-71
-
Nganga-nzambi jiaya giphungi ha gushiya Yesu (1-6)
-
Yesu watuma alandudi ha gulondega Wano wa Pake ya gisugishilo (7-13)
-
Yesu wasendesesa Gudia gua Fumu gua mu Ngueze (14-20)
-
“Muthu uza gungudiga udi nu ame gu mesa awa” (21-23)
-
Alandudi adi mumana mangololo ha gujiya gula nanyi udi wabalega gukoma mukatshi diawo (24-27)
-
Yesu wakota gikotelo nu apostolo mukunda nu ufumu (28-30)
-
Yesu wadianga guzuela egi Phetelo mbawumutuna (31-34)
-
Yesu wawambela alandudi enji ha gudilondega; phogo mbadi jia khusa (35-38)
-
Yesu udi mukombelela gu Mulundu wa Mitshi ya Olive (39-46)
-
Yesu wakuatewa (47-53)
-
Phetelo watuna Yesu (54-62)
-
Athu adi mulela Yesu (63-65)
-
Enya Sanedrene adi musophesa Yesu (66-71)
22 Wano wa Mapha Ashigo nu Levire, unu wana tamegewa egi Wano wa Pake, wasuenele hehi.
2 Mafumu a nganga-nzambi nu alongeshi a mikhuala akhalele mukamba luholo luabonga lua gukuata Yesu, handaga akhalele muvua woma wa athu.
3 Satana wanginyile mu mutshima wa Yudasa, yago wakhalele mutamegewa egi Isakaliote. Yudasa wakhalele mumoshi mukatshi dia apostolo 12.
4 Wayile muta maga nu mafumu a nganga-nzambi nu maphulushi a mu tempelo ha gujiya luholo lua guadigila Yesu.
5 Ene asuangulugile muavula, adivuile n’enji ha gumuhana makuta.
6 Watshiginyile, wasendesele gukamba luholo luabonga lua guhana Yesu ha mago awo, mu tangua dinyi athu ashigo hene.
7 Lusugu lua thomo lua Wano wa Mapha Ashigo nu Levire luataganele. Akhalele muhana mulambu wa Pake mu lusugu luene.
8 Hene, Yesu watumile Phetelo nu Yone, waawambelele egi: “Ndenu mutulondele Wano wa Pake.”
9 Ene amuhudile gamba: “Fundo ditshi watshigina egi tulondege Wano wa Pake?”
10 Muene waavutudile egi: “Talenu! Tangua mbamungina mu dimbo, mbamutagana nu yala mumoshi udi mubata bungu dia meya. Mulandulenu uu nu gu inzo mbayingina muene.
11 Wambelenu fumi’a inzo egi: ‘Mulongeshi wazuela gamba: “Gui gudi sugu ya ngenji ngajiya gudia Wano wa Pake nu alandudi ami?”’
12 Muene mbawumidijiga sugu imoshi yakoma ya gosa, idi nu ima yagasue nu yagulondega muabonga. Londegenu Wano wa Pake guene.”
13 Alandudi ayile, asangele ima yagasue gifua luholo luaawambelele muene, alondele Wano wa Pake.
14 Hataganele kumbi, Yesu wakhalele gu mesa nu apostolo.
15 Gungima waawambelele egi: “Ngasuanguluga muavula gudia n’enu hamoshi Wano owu wa Pake, gutuama egi ngumone malamba;
16 handaga ngudi gumiwambela egi mbangushigo mudia luko pake uu nu tangua mbayitagenesewa mu Ufumu wa Nzambi.”
17 Gungima, muene wazanguile khopho, wahanele Nzambi mersi, wazuelele egi: “Zangulenu khopho edi, dibalegesenu gudi muthu wagasue mukatshi dienu,
18 handaga ngudi gumiwambela egi, sendese mangino, mbangushigo munua luko vinyo uu nu tangua mbadiza Ufumu wa Nzambi.”
19 Wazanguile luko dipha, wahanele Nzambi mersi, gungima wadibatuile, waahanele nadio, wazuelele egi: “Dipha edi didi mumonesa muila wami nguza muhana mukunda nu enue. Landulenu gukalagala ngenyi ha gunguwunguluga.”*
20 Hamanesele ene gudia gua mu ngueze, wakalegele nji luholo lumoshi mukunda nu khopho. Wazuelele egi: “Khopho edi didi mumonesa gikotelo gihe-gihe giakotewa mu njila ya mahatshi ami, anyi mbaabunduiwa mukunda nu enue.
21 “Uvi talenu! Muthu uza gungudiga udi nu ame gu mesa awa.
22 Handaga Mun’a muthu udi muya genji gifua luholo yazuelewe. Uvi mukumbu gudi muthu udi gumudiga!”
23 Apostolo asendesele gudihula ha gujiya gula nanyi mukatshi diawo wakhalele mutshigina gukalagala ndaga ya luholo elu.
24 Uvi, asendesele luko gumana mangololo ha gujiya gula nanyi wakhalele wabalega gukoma mukatshi diawo.
25 Uvi muene waawambelele egi: “Mafumu a ifutshi ana hinyina athu gu ngolo, athu adi nu ufumu holu diawo ana tamegewa egi Athu Abonga.
26 Uvi enue mushigo naye gukhala ngenyi. Muthu udi wakoma mukatshi dienu udi naye gukhala gifua mona wazonda; muthu udi mutuameza udi naye gukhala gifua muthu udi mukalegela ako mudimo.
27 Nu muthu udi mudia gu mesa, nu muthu udi mukalegela athu ako mudimo, nanyi udi muthu wakoma? Ishigo muthu udi mudia gu mesa ba? Uvi ame ngudi mukatshi dienu gifua muthu udi mukalegela ako mudimo.
28 “Uvi, enue mudi athu anyi asalele a gujinginyina nu ame mu malamba ami;
29 ame ngudi mukota n’enu gikotelo mukunda nu ufumu, gifua luholo Tata wakotele gikotelo nu ame,
30 hagula mudie, munue ha mesa ami mu Ufumu wami, nu hagula mukhale ha nguasa jia ufumu ha gusophesa iphuta 12 ya Isalele.
31 “Simona, Simona, tala! Satana watogele ha gumisuwa mukut’enu agasue gifua mbuto jia ble.
32 Uvi ngakombelela muavula mukunda nu aye hagula gutshigina guaye gulebigo; gula wavutuga, kolesa aphangi’aye.”
33 Gungima Simona wamuwambelele egi: “Fumu, ngudi hehi ha guya n’aye mu bologo, nga gufua naye.”
34 Uvi Yesu wamuvutudile gamba: “Phetelo, ngudi guguwambela egi, mangino gutuama egi kolombolo didile, uza mutuna mbala jitatu egi ushigo gungujiya.”
35 Muene waawambelele luko egi: “Tangua ngamitumine, muakhalelego nu kuba dia gubatela falanga, nga ima ya gudia, nga nu jisaphata, uvi muamonelego lamba nga dia gima gimoshi, ishigo ngenyi?” Ene azuelele egi: “Idi ngenyi!”
36 Gungima waawambelele egi: “Uvi henyaha, muthu udi nu kuba dia gubatela falanga adizangule; muthu udi nu kuba dia gubatela ima ya gudia adizule; muthu gashigo nu phogo ya khusa asumbise mulele wenji wa holu ha guyisumba.
37 Handaga ngudi gumiwambela egi mbimbi jiasonegewe egi: ‘Muene watangewe hamoshi nu ashiyi a mikhuala,’ jidi naye gutagenesewa gudi ame. Ndaga jiasonegewe mukunda nu ame jidi mutagana.”
38 Alandudi amuwambelele egi: “Fumu, tala! Phogo jiyadi jia khusa jienyeji.” Muene waawambelele egi: “Jiatagana.”
39 Yesu wakatugile ha fundo diakhalele ene, wayile gu Mulundu wa Mitshi ya Olive gifua muakhalele khadilo dienji. Alandudi amulanduile.
40 Hahetele muene guene, waawambelele egi: “Khalenu mukombelela hagula mubuigo mu gubola.”
41 Gungima waabembele, wayile ndambo gualeha nu ene,* wafugamele, wasendesele gukombelela,
42 wazuelele egi: “Tata, gula watshigina, katula khopho edi gutuama diami. Uvi, ikhadigo gifua luholo ngatshigina ame, ikhale gifua mudi gutshigina guaye.”
43 Gungima, muanjelo wakatugile mu dilu, wajile, wamukolesele.
44 Uvi wakhalele nu gikenene giavula, hene, walanduile gukombelela mangololo; kiza gienji giakhalele mubua hashi gifua mamboso* a mahatshi.
45 Hamanesele muene gukombelela, wavutugile gudi alandudi, waasangele mubanda tulo, akhalele aguhuila mukunda nu gikenene.
46 Waawambelele egi: “Mukunda natshi mudi mubanda tulo? Zugenu mu molu, landulenu gukombelela hagula mubuigo mu gubola.”
47 Hakhalele muene muzuela, athu avula ajile; muthu wakhalele guatuameza jina dienji Yudasa, mumoshi mukatshi dia apostolo 12. Wasuenele hehi nu Yesu, wamuhanele beze.
48 Uvi Yesu wamuhudile egi: “Yudasa, aye wadiga Mun’a muthu nu beze?”
49 Tangua athu akhalele n’enji hehi amonele ndaga yakhalele mutshigina gukalegewa, amuhudile egi: “Fumu, tuajiya guawasa nu phogo jia khusa ba?”
50 Mumoshi mukatshi diawo wawasale muenya mudimo wa nganga-nzambi wakoma, wamubatuile kutshi dia madia.
51 Uvi Yesu waawambelele egi: “Bembenu.” Wakuatele ditshi dia muenya mudimo muene, wadisagele.
52 Gungima Yesu wawambelele mafumu a nganga-nzambi nu maphulushi a mu tempelo nu akulu anyi ajile ha gumukuata egi: “Enue muaza gungukuata nu phogo jia khusa nu mitshi gifua ngudi nzangi ba?
53 Lusugu nu lusugu ngakhalele n’enu mu tempelo, uvi enue muangukuatelego. Uvi didi tangua dienu nu dia uhinyinyi wa phipha.”
54 Amukuatele, ayile n’enji, amunginyishile monzo ya nganga-nzambi wakoma; uvi Phetelo wakhalele gualandula gualeha-leha.
55 Alemesele tshuya hakatshi na katshi mu luphango, adibungishile gu tshuya tuene, Phetelo nji wakhalele nawo.
56 Uvi muenya mudimo mumoshi wa mukhetu wamumonele muweta tshuya. Hakhalele tshuya mulema, wamutalele nonoo, wazuelele egi: “Yala owu nji wakhalele n’enji.”
57 Uvi muene watunyile, wazuelele egi: “Mukhetu’aye, ngushigo gumujiya ndo.”
58 Tangua diazonda gungima, muthu muko wamumonele, wamuwambelele egi: “Aye nji udi mukuaku’awo.” Uvi Phetelo wazuelele egi: “Ndo, ngushigo mukuaku’awo.”
59 Hehi nu tangua dimoshi gungima, muthu muko wazuelele mahugo avula egi: “Yadiago yala owu nji wakhalele n’enji, handaga muene nji udi muenya gu Galilea!”
60 Uvi phetelo wamuwambelele egi: “Yala eye, ngushigo mukotelesa ndaga udi muzuela.” Hakhalele muene muzuela, kolombolo diadidile.
61 Fumu wabalumugile, watalele Phetelo gu meso, Phetelo wawungulugile* mbimbi jiamuwambelele Fumu egi: “Mangin’owu gutuama egi kolombolo didile, uza gungutuna mbala jitatu.”
62 Wazogele hanze, wadidile mangololo.
63 Athu anyi akhalele mutalela Yesu asendesele gumulela nu gumubeta;
64 Amutshuigile mulele gu phala, gungima amuwambelele egi: “Gula udi profete, tuwambele nanyi wagubeta?”
65 Amuwambelele nji mbimbi jiko jiavula jia mashingo.
66 Hatshiele gisugu, hunji dia malemba a athu, yakotelesa egi mafumu a nganga-nzambi nu alongeshi a mikhuala, adibungishile. Ayile n’enji gu inzo yakhalele gudibungisa enya Sanedrene, amuwambelele egi:
67 “Tuwambele gula udi Klisto.” Uvi muene waavutudile egi: “Ngatshima ngamiwambela, enue mushigo mutshigina.
68 Gula ngamihula nji mihu, mushigo gunguhana mvutu.
69 Uvi sendese mangino, mbamumona Mun’a muthu mukhala gu koko dia madia dia Nzambi wa ngolo.”
70 Mukut’awo agasue amuhudile egi: “Na, aye udi Mun’a Nzambi?” Muene waavutudile egi: “Enue hakhenu enue muazuela egi ngudi Mun’a Nzambi.”
71 Ene azuelele gamba: “Na, itshi tukambela luko mathemua ako? Handaga esue hakhetu tuadivuila ndaga jiazoga mu kano dienji.”
Mbimbi goshi'a diyiji
^ Nga “ha kunguyabuluka.”
^ Mu Greke: “gifua thambo dia gusonona seso, ihetshi.”
^ Nga “matanga.”
^ Nga “wayabulukile.”
