Mukanda wa Luka 24:1-53
24 Mu lusugu lua thomo lua phoso, akhetu ajile mu gimenegena gia mutshiatshia gu malumba;* ajile nu ima ya vumba diabonga yalondele ene.
2 Uvi asangele seso diakhalele ha mufulo wa malumba* diakatuga gale.
3 Hanginyile ene mu malumba, asangelego kimbi gia Fumu Yesu.
4 Gihuga-huga giaakuatele mukunda nu ndaga yene. Mu tangua diene amonele mala mbadi agumagana hehi nawo, agusudiga milele yakhalele muhenya.
5 Akhetu ene avuile woma, ashiwugile phala jiawo mu mavu, uvi mala ene a ahudile gamba: “Mukunda natshi mudi mukamba muthu wa monyo mukatshi dia athu a gufua?
6 Gashigo haha, wafuzumuga gale. Tangizenu ndaga amiwambelele tangua diakhalele muene gu Galilea.
7 Muene wamiwambelele egi Mun’a muthu mbawuhanewa ha mago a enya gubola, ene mbaamushiya ha mutshi, uvi mu lusugu lua thathu muene mbawufuzumuga.”
8 Mu tangua diene, atangijile mbimbi jienji,
9 akatugile gu malumba,* ayile gudi apostolo 11 nu gudi athu ako agasue ha guatela lumene lua ndaga jiagasue amonele.
10 Mukatshi dia akhetu ene, guakhalele nu Madiya wa gu Magadala nu Yoana nu Madiya gin’a Yakoba. Akhetu ako anyi akhalele nawo awambelele nji apostolo ndaga eji jiagasue.
11 Uvi mbimbi eji jiakhalele gifua izuele-zuele gudi apostolo, ene atunyile ndaga jiakhalele muzuela akhetu.
12 Uvi Phetelo wazugile, wayile muphushi gu malumba,* washiwugile ha gutala, uvi wamonele phamba milele ya linene. Hene, wavutugile nu gudihula gula ndaga itshi yabuile.
13 Mu lusugu luene, alandudi muyadi akhalele muya gu dimbo dia Emause. Dimbo diene diakhalele ha mutango wa kilometre 11* nu Yelusalema.
14 Akhalele muya nu guta maga mukunda nu ndaga jiagasue jinyi jiabuile.
15 Hakhalele ene muya nu guta maga nu guzuelela ndaga jiene, Yesu wasuenele gudi ene, wasendesele guya nawo hamoshi,
16 uvi ene amujiyilego.
17 Muene waahudile gamba: “Maga atshi mudi muya nu guta?” Ene amaganele nu gikenene.
18 Mumoshi mukatshi diawo jina dienji Keleophase, wamuvutudile egi: “Aye udi ngenji gu Yelusalema ba? Aye ushigo mujiya ndaga jiakalegewa masugu awa ba?”*
19 Muene waahudile egi: “Ndaga jitshi?” Ene amuvutudile gamba: “Ndaga jiatadila Yesu wa gu Nazaleta, profete munu wakhalele muzuela nu gutshita ndaga nu ngolo gutuama dia Nzambi nu gutuama dia athu agasue;
20 mafumu etu a nganga-nzambi nu mafumu ako amuhanele ha mago a athu hagula amushiye. Amukhokhele ha mutshi.
21 Uvi esue tuakhalele gudifelela egi muthu yowu muene wakhalele naye guhuluisa Isalele. Masugu thathu abalega gale sendese ndaga eji jiakalegewa.
22 Akhetu ako a mukatshi dietu atuwambela ndaga ya gushimana. Ayi mu gimenegena gia mutshiatshia gu malumba*
23 uvi asangelego kimbi gienji. Aji gutuwambela egi amonyi ndaga iko ya gushimana, anjelo a awambelele egi muene udi nu monyo.
24 Athu ako mukatshi dietu ayi gu malumba,* asangi ndaga jiagasue gifua luholo luazuedi akhetu, uvi muene amumonelego.”
25 Muene waavutudile gamba: “Enue athu aheya, mitshima yenu ishigo mutshigina muphushi ndaga jiagasue jiazuelele baprofete!
26 Yakhalelego mutoga egi Klisto amone malamba a ndaga eji ha gungina mu lutumbu luenji ba?”
27 Waakotelesele ndaga jiagasue jia Mukanda wa Nzambi jiamutadila muene, sendese nu Moize uu nu gudi Baprofete agasue.
28 Gu gisugishilo, ahetele hehi nu dimbo akhalele muya, uvi muene wakalegele gifua udi mubalega ha guya gu dimbo diko.
29 Uvi ene amuzonzele ha gusala nawo, amuwambelele egi: “Tudi mu ngueze, gualeha ndo phipha imubua, uyigo ndo.” Hene, wanginyile monzo, wasalele nawo.
30 Hakhalele muene mudia* nawo, wazanguile dipha, wakalegele gisambu, wadibatuile, waahanele nadio.
31 Gungima meso awo akangugile muabonga, amujiyile; uvi mu tangua diene muene watotele gu meso awo.
32 Ene asendesele guzuela egi: “Mitshima yetu yalemenego tshuya tangua tuakhala muta n’enji maga mu njila, hakhala muene gutukotelesela muabonga Mukanda wa Nzambi?”
33 Azugile mu tangua diene, avutugile gu Yelusalema, asangele alandudi 11 agudibungisa nu alandudi ako.
34 Alandudi anyi ayile musanga ene a awambelele egi: “Yadiago, Fumu wafuzumuga gu gufua, wamonega gudi Simona!”
35 Ene nji atele lumene lua ndaga jiabalegele mu njila nu luholo amujiyile tangua diabatuile muene mapha.
36 Hakhalele ene muzuela ndaga eji, Yesu wamonegele mukatshi diawo, waawambelele egi: “Guhuima gukhale nu enue.”
37 Uvi luholo ene akhalele muvua woma, atangijile egi adi mumona nyuma.
38 Muene waahudile egi: “Mukunda natshi mudi muvua woma? Mukunda natshi mudi nu giphapha* mu mitshima yenu?
39 Talenu mago ami nu malu ami, yowu ame; ngukuatenu mumone, handaga nyuma yana khalago nu musunyi nu ifuwa, uvi ame ngudi nayo.”
40 Hakhalele muene muzuela, waadijigile mago enji nu malu enji.
41 Uvi luholo akhalele nu gusuanguluga guavula diago, akhalele mumona gifua mambo, uvi muene waahudile egi: “Mudi nu gima gia gudia haha ba?”
42 Ene amuhanele gitshinyi gia ishui ya guwetshia,
43 muene wagizanguile, wagidile ha meso awo.
44 Gungima waawambelele egi: “Tangua ngakhalele n’enu ngamiwambelele gamba, ndaga jiagasue jiasonegewe mukunda nu ame mu Mukhuala wa Moize nu mu mikanda ya Baprofete nu mu Ngimbo jidi naye gutagenesewa.”
45 Waakuatesele ha gukotelesa muabonga diago ndaga jidi mu Mukanda wa Nzambi.
46 Waalezele gamba: “Yasonegewe egi: Klisto udi naye gumona malamba nu udi naye gufuzumuga gu gufua mu lusugu lua thathu.
47 Athu mbaalongesa mu jina dienji mu ifutshi yagasue—sendese gu Yelusalema egi athu adi naye gubalumuna mitshima hagula gubola guawo gutotesewe.
48 Enue mudi naye gukhala mathemua a ndaga eji.
49 Jiyenu egi ngudi gumitumina ndaga yamilayele Tata wami. Uvi salenu gu Yelusalema uu nu tangua mbamuheta ngolo jia mu dilu.”
50 Gungima wayile nawo hanze ya dimbo uu nu gu Betaniya, wathuphuile mago enji, waakombelele Nzambi.
51 Hakhalele muene mukombelela mukunda nu ene, wadikhaphele nawo, wakandugile mu dilu.
52 Amufugamele, gungima avutugile gu Yelusalema nu gusuanguluga guagasue.
53 Akhalele muya mu tempelo tangua diagasue ha gutumbuisa Nzambi.
Mbimbi goshi'a diyiji
^ Nga “malumba a guwunguluga.”
^ Nga “malumba a guwunguluga.”
^ Nga “malumba a guwunguluga.”
^ Nga: “malumba a guwunguluga.”
^ Mu Greke: “ba stade 60.” Stade imoshi yana khala 185 m.
^ Nga ndo yajiya gukhala egi, “phamba aye udi gaye ngenji gu Yelusalema ba?”
^ Nga “malumba a guwunguluga.”
^ Nga “malumba a guwunguluga.”
^ Nga “gudia gu mesa.”
^ Nga “mudi mumba maya.”
