Mukanda wa Luka 3:1-38
3 Mu givo gia 15 gia uhinyinyi wa Tibele Sezale, tangua diakhalele Phonse Philato guvelenele wa Yudea, Helode* wakhalele guvelenele* wa Galilea, phangi’enji Filipho wakhalele guvelenele ya gu distrike dia Itule nu Telakonite. Lisania wakhalele guvelenele wa gu distrike dia Abilene.
2 Mu masugu a fumu wa nganga-nzambi Ana nu Kayifa, mbimbi ya Nzambi yajile gudi Yone mun’a Zakaliya mu mavu a luselenga.
3 Yone wayile mu membo agasue a mu khulo ya Muta wa Yordani, mulongesa gubatijiwa guakhalele mumonesa egi athu abalumuna mitshima hagula Nzambi a atotesele gubola guawo.
4 Gifua luholo idi ya gusonega mu mukanda wa profete Yeshaya egi: “Muthu mumoshi udi muta mukanda mu mavu a luselenga egi: ‘Londenu njila ya Yehowa! Londenu njila jienji muabonga.
5 Baba diagasue didi naye guzalesewa, milundu yagasue yaleha nu yahihia idi naye gushishigishiwa, njila jia hengelela jidi naye gumagesewa, njila jia mawina jidi naye gushishigishiwa;
6 athu agasue mbaamona nji uhuluishi wa Nzambi.’”*
7 Wasendesele guwambela athu avula akhalele muza gudi muene hagula a abatize egi: “Enue ana a mavuambu, nanyi wamitemesa ha gulenga khabu jia Nzambi jidi muza?
8 Kalagalenu ndaga jidi mumonesa egi muabalumuna mitshima. Musendesago guzuela egi: ‘Esue tudi ana a Abalahama.’ Handaga ngudi ngumiwambela egi Nzambi wajiya gukalagala egi seso eji jibue ana a Abalahama.
9 Giphangu gidi gale hehi ha gubatula miji ya mitshi. Hene, mutshi wagasue ushigo muhaga mabundu awaha mbawukokewa, umbiwa ha tshuya.”
10 Athu avula akhalele gumuhula egi: “Itshi tudi naye gukalagala giwa?”
11 Muene waawambelele egi: “Muthu udi nu milele iyadi,* ahue mutu gashigo nayo; muthu udi nu ima ya gudia atshite nji ngenyi.”
12 Afutshishi a gitadi nji ajile hagula abatijiwe, amuhudile egi: “Mulongeshi, itshi tudi naye gutshita?”
13 Waawambelele egi: “Mufutshisago athu* gitadi gubalega ginyi adi naye gufuta.”
14 Masuta nji amuhudile egi: “Esue itshi tudi naye gutshita giwa?” Muene waawambelele egi: “Mutambulago ima yangane gu ngolo, mumbilago athu mambo ha guafunda, uvi suangulugenu nu lufuto luenu.”*
15 Athu akhalele munengena, mukut’awo agasue akhalele mutangiza mu mitshima yawo mukunda nu Yone egi, “Muene wajiya gukhala Klisto ba?”
16 Yone waavutuile mukut’awo agasue egi: “Ame ngudi gumibatiza nu meya, uvi muthu wangubalega ngolo udi muza, ngushigo ngatagana ha gujitulula shinga jia saphata jienji. Muene mbawumibatiza nu nyuma ya Nzambi nu tshuya.
17 Udi nu mbango ya gusuwila ha mago enji, ha guweva muabonga fundo dienji dia gusuwila nu ha gubungisa mbuto mu mukala wenji; uvi isusu mbawuyimba tshuya tunu tuajiyilego gujimiwa.”
18 Wahanele luko malongo ako avula nu walanduile gulongesa lukuma luabonga gudi athu.
19 Uvi Yone wawambele Helode yago wakhalele fumu wa distrike dia Galilea. Wamuwambele mukunda nu Helodia mukaji’a phangi’enji nu mukunda nu ndaga jiagasue jiabola jiatshitshile Helode.
20 Hangima, Helode wakalegele luko ndaga iko yabola: wambile Yone mu bologo.
21 Tangua athu agasue abatijiwe, Yesu nji wabatijiwe. Hakhalele muene mukombelela, dilu diakangugile,
22 nyuma ya Nzambi yakatugile mu dilu, yabulumugile holu dienji gifua yembe,* dijui diakatugile mu dilu, diazuelele egi: “Aye udi Mun’ami ngana guzumba muavula, wana gungusuanguluisa.”
23 Tangua diasendesele Yesu mudimo wenji, wakhalele nu ivo 30, athu akhalele mutangiza egi,wakhalele mun’a Yozefe,Yozefe wakhalele mun’a Eli,
24 Eli mun’a Matata,Matata mun’a Levi,Levi mun’a Meleki,Meleki mun’a Yanayi,Yanayi mun’a Yozefe,
25 Yozefe mun’a Matatiase,Matatiase mun’a Amosa,Amosa mun’a Nahuma,Nahuma mun’a Eseli,Eseli mun’a Nagayi,
26 Nagayi mun’a Mata,Mata mun’a Matatiase,Matatiase mun’a Sameyina,Sameyina mun’a Yoseke,Yoseke mun’a Yoda,
27 Yoda mun’a Yoanana,Yoanana mun’a Lesa,Lesa mun’a Zolobabela,Zolobabela mun’a Shalatiele,Shalatiele mun’a Neli,
28 Neli mun’a Meleki,Meleki mun’a Adi,Adi mun’a Kosama,Kosama mun’a Elemadama,Elemadama mun’a Ele,
29 Ele mun’a Yesu,Yesu mun’a Eliyezele,Eliyezele mun’a Yolima,Yolima mun’a Matata,Matata mun’a Levi,
30 Levi mun’a Simeone,Simeone mun’a Yudasa,Yudasa mun’a Yozefe,Yozefe mun’a Yonama,Yonama mun’a Eliyakime,
31 Eliyakime mun’a Meleya,Meleya mun’a Mena,Mena mun’a Matata,Matata mun’a Natana,Natana mun’a Davidi,
32 Davidi mun’a Yese,Yese mun’a Obede,Obede mun’a Boaza,Boaza mun’a Salamona,Salamona mun’a Nashona,
33 Nashona mun’a Aminadaba,Aminadaba mun’a Aleni,Aleni mun’a Heselona,Heselona mun’a Phelese,Phelese mun’a Yuda,
34 Yuda mun’a Yakoba,Yakoba mun’a Isaka,Isaka mun’a Abalahama,Abalahama mun’a Tela,Tela mun’a Nahola,
35 Nahola mun’a Seluga,Seluga mun’a Leu,Leu mun’a Phelege,Phelege mun’a Ebele,Ebele mun’a Shela,
36 Shela mun’a Kayinana,Kayinana mun’a Alephakeshada,Alephakeshada mun’a Sheme,Sheme mun’a Nowa,Nowa mun’a Lameke,
37 Lameke mun’a Matusela,Matusela mun’a Henoke,Henoke mun’a Yalede,Yalede mun’a Mahalalele,Mahalalele mun’a Kayinana,
38 Kayinana mun’a Enos,Enos mun’a Sete,Sete mun’a Adama,Adama mun’a Nzambi.
Mbimbi goshi'a diyiji
^ Yakotelesa egi, Helode Antipase. Tala Ukoteleshi wa Mbimbi.
^ Mu Greke: “tetrarke.”
^ Nga “mbaamona guhuluga gua Nzambi.”
^ Nga “mulele uko.”
^ Nga “muzudigo.”
^ Nga “ima mudi nayo.”
^ Nga “gakhulumbia; pijio.”
