Mukanda wa Luka 4:1-44
4 Gungima, Yesu wazalele pha nu nyuma ya Nzambi. Wakatugile gu Muta wa Yordani, nyuma yamutuamezele khanda nu khanda mu mavu a luselenga
2 masugu 40. Diabulu wamulolele guene. Mu sungi ya masugu ene 40, gadilego nga gima. Habalegele masugu ene, wavuile nzala.
3 Diabulu wamuwambelele egi: “Gula udi mun’a Nzambi, wambela seso edi dibue dipha.”
4 Uvi Yesu wamuvutuile gamba: “Yasonegewe egi, ‘Muthu gashigo naye gukhala nu monyo phamba mukunda nu dipha.’”
5 Diabulu wamubatele holu dia mulundu waleha, wamulezele ufumu wagasue wa ha mavu mu tangua diazonda.
6 Gungima wamuwambelele egi: “Mbanguguhua uhinyinyi owu wagasue nu lutumbu luawo, handaga anguhuile nawo nu ngana guwuhana muthu wagasue ngatshigina.
7 Hene, gula wangukombelela,* yagasue eyi mbayikhala yaye.”
8 Yesu wamuvutudile egi: “Yasonegewe egi, ‘Udi naye gukombelela phamba Yehowa Nzambi waye, muene hakhenji udi naye gukalegela mudimo wa gijila.’”
9 Hangima, wayile n’enji gu Yelusalema, wamuhagele holu dia tempelo, wamuwambelele egi: “Gula udi mun’a Nzambi, dibembe gosa ubue hashi,
10 handaga yasonegewe egi: ‘Muene mbawutuma anjelo enji ha gugubamba,’
11 ‘ene mbaaguyamba ha mago awo, hagula malu aye adikumigo gu seso.’”
12 Yesu wamulezele egi: “Yasonegewe gamba: ‘Ushigo naye gulola Yehowa Nzambi waye.’”
13 Hamanesele Diabulu gumulola, wamubembele. Uvi wakhalele mukamba tangua diko dia gumulola.
14 Yesu wavutugile gu Galilea waguzala nu ngolo jia nyuma ya Nzambi. Athu a mu membo agasue a gu khanda yene akhalele muzuela ndaga jiabonga mukunda nu muene.
15 Luko, wasendesele gulongesa mu sinagoga jiawo, athu agasue akhalele gumutumbuisa.
16 Gungima wayile gu Nazaleta, fundo diakudile muene. Mu Lusugu lua Guhuluguga, wanginyine mu sinagoga gifua muakhalele khadilo dienji. Hazugile muene mu molu ha gutanga,
17 amuhanele rulo ya profete Yeshaya. Wakangudile rulo yene, wamonele fundo diakhalele dia gusonega egi:
18 “Nyuma ya Yehowa idi nu ame, handaga muene wangumbile maji ha gubatela phutu mene jiabonga. Wangutumine ha guwambela athu adi mu bologo egi ene mbaazoga, nu ha guwambela ifofo egi yene mbayimona, nu ha gukatula enya malamba mu uhiga,
19 nu ha gulongesa givo gia khenda jia Yehowa.”
20 Gungima wakangele rulo, wayihanele gudi muenya mudimo, wakhalele hashi; athu agasue akhalele mu sinagoga akhalele gumutala nonoo.
21 Wasendesele guawambela egi: “Mangino mbimbi eji jia mukanda wa Nzambi muakatuga guvua, jiatagenesewa.”
22 Athu agasue akhalele muzuela ndaga jiabonga mukunda nu muene, ashimanele mukunda nu mbimbi jiawaha jiakhalele muene muzuela. Akhalele muzuela egi: “Yowu mun’a Yozefe, ishigo ngenyi?”
23 Waawambelele egi: “Giamatshidia mbamungutela gishima gidi muzuela egi: ‘Aye munganga disage hakhaye. Mbamunguwambela nji egi tuavuile lukuma lua ndaga wakalegele gu Kaphelenauma, jikalagale nji haha mu dimbo dienu.’”
24 Waalezele luko gamba: “Ngudi gumiwambela giamatshidia egi gushigo nga profete mumoshi wana tshiginyiwa mu dimbo diawo.
25 Ngudi gumiwambela giamatshidia egi: Guakhalele nu akhetu a gafunda avula mu Isalele mu masugu a Eliya, tangua mvula yatunyile gunoga ivo thathu nu mbeji samano. Mu tangua diene, nzala yakola yakhalele mu dimbo diagasue.
26 Uvi Nzambi gatuminego Eliya gudi mumoshi mukatshi dia akhetu awa, wamutumine phamba gudi mukhetu wa gafunda wa gu Salephata mu mavu a Sidona.
27 Luko, enya misongo ya hute akhalele avula mu Isalele mu masugu a profete Elisha; uvi nga mumoshi gasagewego,* phamba Namana muenya gu Siliya wasagewe.”
28 Tangua athu agasue akhalele mu sinagoga avuile ndaga eji, avuile khabu jiakola.
29 Ene azugile, amuzolele mu dimbo, ayile n’enji holu dia mulundu watungiwe dimbo diawo hagula amulutule abue muto hashi.
30 Uvi muene wabalegele mukatshi diawo, wayile genji.
31 Wabulumugile gu Kaphelenauma, dimbo dia gu Galilea. Wakhalele mulongesa athu mu Lusugu lua Guhuluguga.
32 Athu adihudile mangololo mukunda nu luholo luenji lua gulongesa, handaga wakhalele muzuela gifua muthu udi nu ufumu.
33 Mu sinagoga yene, guakhalele nu yala mumoshi wakhalele nu nyuma yabola, demo, wakalugile mangololo egi:
34 “Aa! Aye Yesu wa gu Nazaleta, mulonga utshi udi nawo nu esue? Aye waza ha gutushiya ba? Ngudi gugujiya muabonga, aye udi Muthu wa Gijila wa Nzambi.”
35 Uvi Yesu wabalele nyuma yene egi: “Hena tedie, zoga gudi muthu owu.” Demo diene diabuishile yala muene hashi mukatshi dia athu, gungima diazogele, uvi diamutshitshilego gubola.
36 Athu agasue ashimanele muavula, adihudile egi: “Eyi mbimbi ya luholo lutshi? Handaga muene udi muwambela nyuma jiabola nu ufumu nu ngolo jiagasue, yene idi muzoga!”
37 Lukuma luenji luamuanganele mu membo agasue a gu khanda inyi.
38 Hazogele muene mu sinagoga, wanginyine monzo ya Simona. Giwaji gia Simona gia mukhetu giakhalele nu tshuya tuakola gu muila;* hene atogele Yesu ha gumukuatesa.
39 Yesu washiwugile hehi n’enji, wabalediele* misongo yene, hene tshuya akhalele nato gu muila tuahuile. Mu tangua diene wazugile, wasendesele gualondela ima ya gudia.
40 Uvi hakhalele mushiwuga tangua, athu agasue akhalele nu enya misongo ya maluholo agasue, ayile nawo gudi Yesu. Muene washile mago enji holu dia muthu wagasue mukatshi diawo, waasagele.
41 Luko, bademo azogele gudi athu avula, akhalele mukaluga egi: “Aye udi Mun’a Nzambi.” Uvi Yesu waabalele, waatunyishile ha guzuela, handaga akhalele mujiya egi muene udi Klisto.
42 Hatshiele gisugu, Yesu wayile ha fundo dimoshi, wakhalele muene hakhenji. Uvi, athu avula asendesele gumukamba,* ahetele ha fundo diakhalele muene. Akambele gumukanga njila hagula muene gayigo gualeha nu ene.
43 Uvi muene waawambelele egi: “Ngudi naye nji gulongesa lukuma luabonga lua Ufumu wa Nzambi mu membo ako, handaga yene ndaga yangutumidile Nzambi.”
44 Hene, wayile mulongesa gu sinagoga jia gu Yudea.
Mbimbi goshi'a diyiji
^ Mu Greke: “wangukombelela mbala imoshi.”
^ Nga “guphelegetesewa.”
^ Nga “fievre yakola.”
^ Nga “wadingidile.”
^ Nga “gumuzomba.”
