Mukanda wa Luka 5:1-39
5 Lusugu lumoshi, Yesu wakhalele mulongesa mbimbi ya Nzambi mu khulo ya kianga gia Genesaleta.* Athu avula akhalele gumutegelela, akhalele n’enji kuma-kuma.
2 Wamonele mawato mbadi mu khulo ya kianga, uvi alowi a jishui azogele ha guya muweva mawanda awo.
3 Wanginyine mu wato umoshi; wato wene wakhalele wa Simona. Wawambelele Simona ha guya ndambo gualeha nu khulo ya kianga. Gungima Yesu wakhalele hashi mu wato, wasendesele gulongesa athu avula anyi akhalele hene.
4 Hamanesele muene guzuela, wawambelele Simona egi: “Suena ha fundo didi jinga, mbenu mawanda enu ha gukuata jishui.”
5 Simona wamuvutudile egi: “Mulongeshi, tuatshita mudimo phipha yagasue tuakuatelego nga gima. Uvi luholo aye wazuela, ngudi mumba mawanda.”
6 Hambile ene mawanda mu meya, akuatele* jishui jiavula. Mawanda awo asendesele gutawuga.
7 Atamegele alowi a jishui akhalele mu wato uko ha guza guakuatesa. Ene ajile, mawato agasue ayadi azalele, asendesele gushiwuga mu muta.
8 Tangua diamonele Simona Phetelo ndaga eyi, wabuile mu malu a Yesu, wazuelele egi: “Fumu, katuga hehi nu ame, handaga ngudi muenya gubola.”
9 Handaga muene nu athu agasue akhalele nawo, ashimanele muavula mukunda nu guvula gua jishui akuatele.
10 Yakhalele luholo lumoshi mukunda nu Yakoba nu Yone, ana a Zebedayo, anyi akhalele mafuta a Simona. Uvi Yesu wawambelele Simona egi: “Uvuigo woma. Sendese luenyelu, aye mbawubua mulowi wa athu.”
11 Ayile nu mawato awo mu khulo ya kianga, abembele ima yawo yagasue, amulanduile.
12 Lusugu luko, Yesu wakhalele mu dimbo dimoshi. Guakhalele nu yala mumoshi wakhalele waguzala nu misongo ya hute! Hamonele muene Yesu, wabuile mu malu enji phala mu mavu. Wamububidile egi: “Fumu, gula watshigina, wajiya gungusaga.”
13 Yesu wasunuine koko dienji, wamukuatele, wazuelele egi: “Ngatshigina! Vua muabonga.” Mu tangua diene, misongo yenji ya hute yahuile.
14 Yesu wawambelele yala muene egi awambelago nga muthu mumoshi ndaga yene. Wamulezele egi: “Uvi nda udimonese gudi nganga-nzambi, uhane mulambu wa gusagewa guaye gifua muazuelele Moize, ha gumonesa egi wasagewa.”
15 Uvi lukuma luenji luakhalele mumuangana muavula. Luko, athu avula adibungishile ha gumutegelela nu ha gusagewa gu misongo yawo.
16 Uvi muene wakhalele muya muavula mu mafundo a gudikhadila hakhenji ha gukombelela.
17 Lusugu lumoshi, Yesu wakhalele mulongesa mu inzo imoshi. Afalese nu alongeshi a Mikhuala akhalele hene. Ene akatugile gu membo agasue a gu Galilea, gu Yudea nu gu Yelusalema. Ngolo jia Yehowa jiakhalele mukuatesa Yesu ha gusaga athu.
18 Gungima, athu ajile nu muenya khonzo mumoshi wakhalele wagubanda ha gitanda; akhalele mukamba luholo lua gumunginyisa, ha gumuhaga gutuama dia Yesu.
19 Uvi athu akhalele avula, hene akhalelego nu luholo lua gumunginyisa. Anginyile holu dia inzo, akobuele yangi,* amubulumuishile ha gitanda mukatshi dia athu akhalele gutuama dia Yesu.
20 Hamonele Yesu gutshigina guawo, wawambelele muthu wakhalele nu misongo ya khonzo egi: “Gubola guaye guatotesewa.”
21 Gungima, Afalese nu alongeshi a mikhuala asendesele guzuela egi: “Muthu yowu udi mushingana Nzambi udi nanyi? Nanyi wajiya gutotesela athu gubola gula Nzambi ndo?”
22 Uvi Yesu wajiyile matangi awo, waahudile egi: “Itshi mudi mutangiza mu mitshima yenu?
23 Mulonga utshi udi wabalega guleba? Guzuela egi: ‘Gubola guaye guatotesewa,’ nga guzuela egi: ‘Zuga, wenda’?
24 Uvi hagula mujiye egi Mun’a muthu udi nu ngolo jia gutotesela athu gubola ha mavu ...” Wawambelele muenya khonzo egi: “Ngudi guguwambela egi, Zuga, zangula gitanda giaye, nda gumbo diaye.”
25 Yala muene wazugile mu molu ha meso awo, wazudile gitanda gienji, wayile gumbo dienji nu gutumbuisa Nzambi.
26 Mukut’awo agasue ashimanele muavula. Atumbuishile Nzambi. Avuile woma wavula, azuelele egi: “Mangino tuamona ndaga jia gushimana!”
27 Gungima Yesu wakatugile ha fundo diene, wamonele mufutshishi mumoshi wa gitadi, jina dienji Levi, wakhalele mu biro dia afutshishi a gitadi, wamuwambelele egi: “Iza ungulandule.”
28 Wazugile, wabembele ima yagasue, wamulanduile.
29 Levi walondele wano wakoma gumbo dienji mukunda nu Yesu. Guakhalele nu afutshishi a gitadi avula nu athu ako akhalele mudia* nawo.
30 Afalese nu alongeshi awo a mikhuala asendesele guzuela ndaga jiabola mukunda nu alandudi a Yesu; a ahudile gamba: “Mukunda natshi mudi mudia nu mudi munua nu afutshishi a gitadi nu enya gubola?”
31 Yesu waavutudile egi: “Athu adi muabonga, ana kambago munganga, uvi athu adi mukata, ene ana kamba munganga.
32 Ame ngajilego ha gutamega athu abonga, uvi ngajile ha gutamega enya gubola hagula abalumune mitshima yawo.”
33 Amuwambelele egi: “Alandudi a Yone ana tuna gudia iphungu yavula ha gukombelela. Ana kombelela nji mangololo. Alandudi a Afalese nji ana kalagala ngenyi; uvi alandudi aye, adi mudia nu adi munua.”
34 Yesu waahudile egi: “Enue muajiya guwambela mafuta a yala udi muzula mukhetu mu ulo ha gutuna gudia ha gukombelela tangua didi yala muene mukatshi diawo ba?
35 Uvi lusugu yala muene mbakatudiwa mukatshi diawo, ene mbaatuna giwa ima ya gudia ha gukombelela.”
36 Waahanele luko gifezegeselo gimoshi, wazuelele egi: “Gushigo muthu wajiya gubatula gibanji* gia mulele uhe-uhe, ha gugitunga holu dia mulele ukulu. Gula muene watshita ngenyi, gibanji gia mulele uhe-uhe mbagitawula mulele ukulu muavula, handaga gishigo luholo lumoshi nu mulele wene.
37 Luko, gushigo nu muthu wana gumba matombe ahe-ahe mu milondo ya ilema ikulu. Gula wamba, matombe ahe-ahe mbaatawula milondo, ngenyi matombe mbaabunduga, milondo mbayibola.
38 Uvi matombe ahe-ahe adi naye gumbiwa mu milondo ya ilema ihe-ihe.
39 Gushigo nu muthu gula muene wanua matombe akulu, atshigina luko gunua matombe ahe-ahe; handaha muene udi muzuela egi: ‘Matombe akulu adi afula sha.’”
Mbimbi goshi'a diyiji
^ Yakotelesa egi, Kianga gia Galilea.
^ Mu Greke: “abungishile.”
^ Nga “muto wa inzo.”
^ Nga “mudia gu mesa.”
^ Nga “gitshinyi.”
