Mukanda wa Luka 6:1-49
-
Yesu udi “Fumu wa Lusugu lua Guhuluguga” (1-5)
-
Yesu wasaga yala wakhalele nu koko dia gufua (6-11)
-
Yesu watomba apostolo 12 (12-16)
-
Yesu udi mulongesa nu udi musaga athu (17-19)
-
Athu adi nu gusuanguluga nu anyi ashigo nu gusuanguluga (20-26)
-
Guzumba mbalagaji (27-36)
-
Bembenu gusophesa athu (37-42)
-
Mutshi wabonga wana jiyiwa gu mabundu enji (43-45)
-
Inzo yatungiwe muabonga nu inzo yatungiwe fondasio ndo (46-49)
6 Mu lusugu lumoshi lua guhuluguga, Yesu wakhalele mubalega mu mahia a mbuto jia ble. Alandudi enji abelele ble, asendesele guyishishita ha mago ha gudia.
2 Afalese a ahudile egi: “Mukunda natshi mudi mukalagala ndaga idi mutunyisa mukhuala ha gutshita mu Lusugu lua Guhuluguga?”
3 Uvi Yesu waavutudile egi: “Enue khenji muatangelego ndaga yakalagele Davidi nu athu enji tangua akhalele nu nzala ba?
4 Muene wanginyile monzo ya Nzambi, amuhanele mapha a ahanewe gudi Nzambi,* waadile nu waahanele gudi athu akhalele n’enji. Uvi mukhuala wakhalele mutunyisa egi muthu muko gajiyilego gudia mapha ene phamba nganga-nzambi.”
5 Gungima waawambelele egi: “Mun’a muthu udi Fumu wa Lusugu lua Guhuluguga.”
6 Mu lusugu luko lua guhuluguga, Yesu wanginyile mu sinagoga, wasendesele gulongesa. Mu sinagoga yene muakhalele nu yala mumoshi wakhalele nu koko dia madia dia gufua.*
7 Alongeshi a mikhuala nu Afalese akhalele mutala Yesu muabonga ha gujiya gula muene uza musaga muthu mu Lusugu lua Guhuluguga, hagula ahete mulonga wa gumufundjila.
8 Uvi Yesu wajiyile matangi awo, hene, wawambelele yala wakhalele nu koko dia gufua* egi: “Zuga mu molu, iza ha katshi haha.” Yala muene wazugile, wamaganele ha fundo diene.
9 Gungima Yesu waalezele gamba: “Ngudi gumihula egi: Mukhuala udi muhana njila ha gutshita ndaga yabonga nga yabola, ha guhuluisa monyo nga guwushiya mu Lusugu lua Guhuluguga ba?”
10 Yesu wabalumugile, waatalele, wawambelele yala muene egi: “Sununa koko diaye.” Muene wasunuine koko dienji, koko diene diasagewe.
11 Uvi ene avuile khabu jiakola, asendesele guzuela mukatshi diawo ha gujiya ndaga ajiya gukalagala Yesu.
12 Lusugu lumoshi, wakandugile holu dia mulundu ha gukombelela; wabalegesele guene phipha yagasue ha gukombelela Nzambi.
13 Hatshiele gisugu, watamegele alandudi enji, watombele alandudi 12 mukatshi diawo, waatamegele egi apostolo:
14 Ene akhalele: Simona, wamuhanele luko jina egi Phetelo, nu phangi’enji Andele, Yakoba, Yone, Filipho, Baletelemi,
15 Matayo, Toma, Yakoba mun’a Alafayo, Simona munu wana tamegewa egi “muenya gikhesa,”
16 Yudasa mun’a Yakoba nu Yudasa Isakaliote, yonu wadigile Yesu gungima.
17 Gungima, wabulumugile nawo, wamaganele ha fundo diakhalelego mulundu. Ha fundo diene guakhalele nu alandudi enji avula nu athu avula akatugile gu khanda yagasue ya Yudea, gu Yelusalema, mu membo a gu Tile nu Sidona ha guza gumutegelela nu gusagewa gu misongo yawo.
18 Nu athu anyi akhalele musagesewa gudi nyuma jiabola asagewe.
19 Athu agasue akhalele mukamba gumukuata, handaga ngolo jiakhalele muzoga gudi muene jiakhalele guasaga mukut’awo agasue.
20 Gungima Yesu watalele alandudi enji, wasendesele guawambela egi:
“Gusuanguluga gudi nu enue phutu, handaga Ufumu wa Nzambi udi wenu.
21 “Gusuanguluga gudi nu enue mudi nu nzala henyaha, handaga mbamukuta.
“Gusuanguluga gudi nu enue mudi mudila henyaha, handaga mbamulela.
22 “Khalenu nu gusuanguluga gula athu adi n’enu umbalagaji, adi gumikaya, adi gumishinga nu adi musegulula* jina dienu mukunda nu Mun’a muthu.
23 Gula ndaga eji jiamibuila, suangulugenu. Khalenu nu gusuanguluga guavula, handaga gishimbigo gienu gidi giavula mu dilu, handaga akhakh’awo akhalele mukalagala nji ndaga jia ngenyi gudi baprofete.
24 “Uvi lamba dienu enue enya umonyi, handaga muahetshi gale gusuanguluga guenu guagasue.
25 “Lamba dienu enue mudi ya gukuta luenyelu, handaga mbamukhala nu nzala.
“Lamba dienu enue mudi mulela luenyelu, handaga mbamukhala nu gikenene nu mbamudila.
26 “Lamba dienu gula athu agasue adi muzuela ndaga jiabonga mukunda nu enue, handaga akhakh’awo akhalele nji mukalagala ngenyi gudi baprofete a mambo.
27 “Uvi enue mudi gungutegelela, ngudi gumiwambela egi: Landulenu guzumba mbalagaji jienu nu gutshita ndaga jiabonga gudi athu adi n’enu umbalagaji.
28 Landulenu guzuela ndaga jiabonga gudi athu adi gumita mikumbu, kombelelenu nji mukunda nu athu adi gumishinga.
29 Gula muthu wagubeta mbanda gu butu dimoshi, mubalumuine nji butu diko; gula muthu wagutambula mulele waye wa holu, umutunyisago ha guzangula mulele waye wa moshi.
30 Gula muthu wagutoga gima, muhane. Gula muthu wazangula ima yaye, umutogigo luko nayo.
31 “Luko, ndaga mudi mutshigina egi athu amikalegele, enue nji akalegelenu najio.
32 “Gula mudi muzumba phamba athu anyi ana gumizumba, gubonga gutshi mbamuheta? Handaga enya gubola nji ana guzumba athu anyi ana guazumba.
33 Gula mudi mukuatesa phamba athu anyi ana gumikuatesa, gubonga gutshi mbamuheta? Enya gubola nji ana kalagala ngenyi.
34 Luko, gula mudi musomba* phamba athu anyi mudi mutangiza egi ene mbaamivutudila, gubonga gutshi mbamuheta? Nu enya gubola nji ana gusomba enya gubola n’ako, handaga ana tangiza egi ene mbaavutudila nayo yagasue.
35 Uvi enue, landulenu guzumba mbalagaji jienu nu gutshita ndaga jiabonga nu gusomba athu ima, gutangiza ndo egi ene amivutudile.* Ngenyi, gishimbigo gienu mbagikhala giakoma. Enue mbamukhala ana a Nzambi wa Gudinyinyiga, handaga muene wana monesa mutshima wabonga gudi athu anago guhana mersi nu gudi athu abola.
36 Landulenu guvuila athu khenda, gifua luholo Tata wenu wana guvuila athu khenda.
37 “Luko, bembenu gusophesa athu, ngenyi enue nji mbamushigo musophesewa; bembenu gufuisa athu milonga, enue nji mbaashigo gumifuisa milonga. Landulenu gutotesela* athu ako, enue nji mbaamitotesela.*
38 Khalenu nu khadilo dia guhana, ngenyi enue nji athu mbaamihana. Mbaamimbila gizongelo gimoshi giabonga ha mulele wenu, gia gushidiga, gia gunyigisa nu gia gufuafuelela. Handaga gizongelo mudi muzongela athu ako, giene mbaamizongela nji enue.”
39 Gungima waahanele gifezegeselo egi: “Gifofo giajiya gutuameza gifofo n’a muko ba? Muyadi’awo mbaabua mu wina, ishigo ngenyi?
40 Mona khalasa* ganago gubalega mulongeshi wenji; uvi muthu wagasue walongesewa muabonga diago, mbawukhala gifua mulongeshi wenji.
41 Mukunda natshi udi mutala gamulenge gadi mu diso dia phangi’aye, uvi ushigo mumona mutshi wakoma udi mu diso diaye?
42 Luholo lutshi wajiya guwambela phangi’aye egi: ‘Phangi, iza ngugukatule gamulenge gadi mu diso diaye,’ uvi aye hakhaye ushigo mumona mutshi wakoma udi mu diso diaye? Muenya mambo! Katula thomo mutshi wakoma udi mu diso diaye, gungima mbawumona giwa muabonga luholo lua gukatula gamulenge gadi mu diso dia phangi’aye.
43 “Handaga mutshi wabonga wanago guhaga mabundu abola, mutshi wabola nji wanago guhaga mabundu abonga.
44 Handaga mutshi wagasue wana jiyiwa gu mabundu awo. Ha gufezegesa, athu anago guhela mabundu a figi gu mitshi ya miya. Anago nji guhela mabundu a vinyo gu mashui a miya.
45 Muthu wabonga wana zola ndaga jiabonga jidi mu gibambelo giabonga gia mutshima wenji. Uvi muthu wabola, wana zola ndaga jiabola jidi mu gibambelo gienji giabola; handaga kano diana zuela ndaga jidi jia guzala mu mutshima.
46 “Mukunda natshi mudi gungutamega egi: ‘Fumu! Fumu!’ uvi mushigo mukalagala ndaga ngudi muzuela?
47 Muthu wagasue udi muza gudi ame, udi muvua mbimbi jiami nu udi gujitumagela, mbangumiwambela gula muene udi gifua itshi.
48 Muene udi gifua muthu watungile inzo. Ha guyitunga, wahagele wina waleha, watungile fondasio holu dia seso. Tangua muta wazalele, meya abundjile inzo yene, uvi akhalelego nu ngolo jia guyibuisa handaga yatungiwe muabonga diago.
49 Uvi muthu udi muvua mbimbi jiami nu gashigo gujitumagela, udi gifua muthu watungile inzo holu dia mavu muene guhaga ndo fondasio. Meya a muta abundjile inzo yene, yabuile mbala imoshi nu yamuanganele yagasue.”
Mbimbi goshi'a diyiji
^ Nga “mapha a gijila.”
^ Nga “dia gimigina.”
^ Nga “dia gimigina.”
^ Nga “adi mutuna jina dienu gifua gima giabola.”
^ Yakotelesa egi, gusomba gunengena ndo egi atuvutudile nu ima iko holu.
^ Yakotelesa egi, gutangiza ndo egi amivutudile nu ima iko holu.
^ Nga “gubemba.”
^ Nga “mbaamibemba.”
^ Nga “mulandudi.”
